2 Mambo ya Nyakati 10

1Rehoboamu alikwenda Shekemu, kwa sababu Israeli wote walikuwa wamekusanyika Shekemu ili kumfanya mfalme. 2Yeroboamu mwana wa Nebati aliposikia habari hiyo, alikuwa Misri, alikokimbilia kujificha kwa mfalme Sulemani, naye akarudi kutoka Misri. 3Basi wakatuma watu kumwita, naye Yeroboamu pamoja na Israeli wote wakaja, wakamwambia Rehoboamu, 4“Baba yako aliifanya nira yetu kuwa ngumu. Sasa basi, upunguze kazi ngumu aliyotudai baba yako na nira nzito aliyotutwika, nasi tutakutumikia.” 5Akawaambia, “Rudini kwangu baada ya siku tatu.” Basi watu wakaondoka.

6Ndipo mfalme Rehoboamu akataka shauri kwa wazee waliomtumikia Sulemani baba yake alipokuwa hai. Akauliza, “Mnanishauri niwajibu nini watu hawa?” 7Wakamjibu, “Ikiwa utakuwa mpole kwa watu hawa na kuwaonyesha fadhili, na kuwaambia maneno mazuri, watakuwa watumishi wako siku zote.” 8Lakini akakataa shauri ambalo wazee walimpa, akataka shauri kwa vijana waliokua pamoja naye na ambao sasa walimtumikia. 9Akawauliza, “Ninyi mnashauri nini? Tuwajibu vipi watu hawa walioniambia, ‘Upunguze nira aliyotutwika baba yako’?” 10Vijana waliokua pamoja naye wakamjibu, “Watu hawa wamekuambia, ‘Baba yako aliifanya nira yetu kuwa nzito, lakini wewe lazima utupunguzie.’ Wape jibu hili: ‘Kidole changu kidogo ni kinene kuliko kiuno cha baba yangu. 11Basi sasa: baba yangu aliwatwika nira nzito, lakini mimi nitaifanya nira yenu kuwa nzito zaidi. Baba yangu aliwaadhibu kwa mijeledi, lakini mimi nitawaadhibu kwa nge.’”

12Siku ya tatu Yeroboamu na watu wote wakaja kwa Rehoboamu, kama mfalme alivyowaambia: “Rudini kwangu siku ya tatu.” 13Mfalme akawapa jibu kali. Mfalme Rehoboamu akakataa shauri la wazee. 14Akasema nao kama vijana walivyomshauri: “Nitaifanya nira yenu kuwa nzito, nami nitauongeza uzito wake. Baba yangu aliwaadhibu kwa mijeledi, lakini mimi nitawaadhibu kwa nge.” 15Basi mfalme hakuwasikiliza watu, kwa maana mageuzi haya ya mambo yalitoka kwa Mungu, ili BWANA alitimize neno alilolinena kupitia Ahiya Mshiloni kwa Yeroboamu mwana wa Nebati. 16Israeli wote walipoona kwamba mfalme hatawasikiliza, watu wakamjibu mfalme: “Tuna sehemu gani katika Daudi? Hatuna urithi katika mwana wa Yese! Hemani kwenu, kila mtu, Israeli! Sasa jitunzie nyumba yako mwenyewe, Daudi!” Basi Israeli wote wakaenda nyumbani.

17Lakini Rehoboamu akatawala juu ya Waisraeli waliokaa katika miji ya Yuda. 18Kisha mfalme Rehoboamu akamtuma Hadoramu, msimamizi wa kazi ya kulazimishwa, lakini Waisraeli wakampiga kwa mawe hata akafa. Mfalme Rehoboamu akafaulu kupanda gari lake na kukimbilia Yerusalemu.

19Hivyo Israeli wamekuwa katika uasi dhidi ya nyumba ya Daudi mpaka leo.