2 Mambo ya Nyakati 11

1Rehoboamu alipofika Yerusalemu, aliikusanya nyumba ya Yuda na Benyamini, wapiganaji hodari 180,000 waliochaguliwa, ili kupigana na Israeli na kumrudishia Rehoboamu ufalme.

2Lakini neno la BWANA likamjia Shemaya mtu wa Mungu: 3“Mwambie Rehoboamu mwana wa Sulemani, mfalme wa Yuda, na Israeli wote walio katika Yuda na Benyamini, uwaambie, 4‘Hivi ndivyo BWANA asemavyo: Msiende kupigana na ndugu zenu. Rudini nyumbani, kila mmoja wenu, kwa maana jambo hili limetoka kwangu.’” Basi wakayatii maneno ya BWANA, wakarudi wasiende kumshambulia Yeroboamu.

5Rehoboamu alikaa Yerusalemu, akaijenga miji katika Yuda iwe ngome za ulinzi. 6Aliziimarisha Bethlehemu, Etamu, Tekoa, 7Beth-suri, Soko, Adulamu, 8Gathi, Maresha, Zifu, 9Adoraimu, Lakishi, Azeka, 10Sora, Aiyaloni na Hebroni, miji yenye ngome katika Yuda na Benyamini. 11Aliziimarisha ngome, akaweka ndani yake makamanda, pamoja na akiba ya chakula, mafuta na divai. 12Katika kila mji aliweka ngao kubwa na mikuki, akaifanya miji kuwa imara sana. Hivyo Yuda na Benyamini wakabaki kuwa wake.

13Makuhani na Walawi walioishi katika Israeli yote walisimama upande wake, wakija kutoka katika maeneo yao yote. 14Walawi waliacha malisho yao na mali yao, wakaja Yuda na Yerusalemu, kwa sababu Yeroboamu na wanawe walikuwa wamewafukuza wasiendelee na huduma yao ya ukuhani kwa BWANA. 15Akaweka makuhani wake mwenyewe kwa ajili ya mahali pa juu, kwa ajili ya mashetani-mbuzi na kwa ajili ya ndama aliowafanya. 16Wakiwafuata, watu kutoka makabila yote ya Israeli walioweka mioyo yao kumtafuta BWANA, Mungu wa Israeli, walikuja Yerusalemu kumtolea dhabihu BWANA, Mungu wa babu zao. 17Wakaupa nguvu ufalme wa Yuda na kumuunga mkono Rehoboamu mwana wa Sulemani kwa miaka mitatu, kwa kuwa kwa miaka mitatu walienenda katika njia ya Daudi na Sulemani. 18Rehoboamu alimwoa Mahalathi, ambaye baba yake alikuwa Yerimothi mwana wa Daudi, na mama yake alikuwa Abihaili binti Eliabu mwana wa Yese. 19Akamzalia wana: Yeushi, Shemaria na Zahamu. 20Baada yake alimwoa Maaka binti Absalomu, naye akamzalia Abiya, Atai, Ziza na Shelomithi. 21Rehoboamu alimpenda Maaka binti Absalomu kuliko wake zake wengine wote na masuria wake. Alikuwa ameoa wake kumi na wanane na masuria sitini, naye akazaa wana ishirini na wanane na binti sitini. 22Rehoboamu alimweka Abiya mwana wa Maaka kuwa mkuu, kiongozi kati ya ndugu zake, kwa sababu alikusudia kumfanya mfalme. 23Alitenda kwa busara: aliwatawanya baadhi ya wanawe katika maeneo yote ya Yuda na Benyamini, katika miji yote yenye ngome. Akawapa chakula kingi na kuwatafutia wake wengi.