2 Mambo ya Nyakati 5

1Basi kazi yote ambayo Sulemani aliifanya katika nyumba ya BWANA ikakamilika. Kisha Sulemani akaleta vitu ambavyo baba yake Daudi alikuwa ameviweka wakfu, akaweka fedha, dhahabu na vyombo vyote katika hazina za nyumba ya Mungu.

2Kisha Sulemani aliwaita pamoja huko Yerusalemu wazee wa Israeli, wakuu wote wa makabila na viongozi wa jamaa za Waisraeli. Walipaswa kulipandisha sanduku la agano la BWANA kutoka mji wa Daudi, yaani Sayuni. 3Watu wote wa Israeli walikusanyika mbele ya mfalme wakati wa sikukuu, iliyokuwa katika mwezi wa saba. 4Wazee wote wa Israeli walipokuwa wamefika, Walawi wakaliinua sanduku. 5Walilipandisha sanduku, Hema la Kukutania na vyombo vyote vitakatifu vilivyokuwa ndani ya hema. Makuhani wa Kilawi ndio waliovibeba. 6Mfalme Sulemani na jumuiya yote ya Israeli waliokuwa wamekusanyika kwake walikuwa mbele ya sanduku, wakitoa dhabihu za kondoo na ng’ombe wengi mno wasioweza kuhesabika wala kutolewa idadi. 7Kisha makuhani wakalileta sanduku la agano la BWANA mahali pake katika chumba cha ndani cha nyumba, Patakatifu pa Patakatifu, chini ya mabawa ya makerubi. 8Makerubi yalinyoosha mabawa yao juu ya mahali sanduku lilipokaa, hivyo makerubi yakawa kifuniko juu ya sanduku na mipiko yake. 9Mipiko ilikuwa mirefu hata ncha zake, zikitokeza kutoka kwenye sanduku, zilionekana mbele ya chumba cha ndani, ingawa hazikuonekana kutoka nje. Liko huko mpaka leo. 10Ndani ya sanduku hapakuwa na kitu ila zile mbao mbili ambazo Musa aliziweka humo huko Horebu, mahali BWANA alipofanya agano na Waisraeli baada ya kutoka Misri.

11Kisha makuhani wakatoka patakatifu. Makuhani wote waliokuwapo walikuwa wamejitakasa, bila kujali zamu zao. 12Walawi wote waliokuwa waimbaji, Asafu, Hemani na Yeduthuni pamoja na wana wao na jamaa zao, walikuwa wamesimama upande wa mashariki wa madhabahu, wamevaa kitani safi, wakiwa na matoazi, vinubi na zeze. Pamoja nao walikuwa makuhani 120 wakipiga tarumbeta. 13Wapiga tarumbeta na waimbaji waliungana kama mtu mmoja, wakitoa sauti moja ikasikika walipomsifu na kumshukuru BWANA. Walipopaza sauti kwa tarumbeta, matoazi na vyombo vingine vya muziki, wakimsifu BWANA, “Kwa maana yeye ni mwema; upendo wake usiokoma unadumu milele,” nyumba, yaani nyumba ya BWANA, ikajaa wingu, 14na makuhani hawakuweza kusimama kufanya huduma yao kwa sababu ya wingu, kwa kuwa nyumba ya Mungu ilijaa utukufu wa BWANA.