2 Mambo ya Nyakati 18

1Yehoshafati alikuwa na utajiri mwingi na heshima kubwa, naye akafanya mapatano ya ndoa na Ahabu. 2Miaka kadhaa baadaye alishuka kumtembelea Ahabu huko Samaria. Ahabu akachinja kondoo na ng’ombe wengi kwa ajili yake na kwa ajili ya watu waliokuwa pamoja naye, akamhimiza apande kupigana na Ramoth-gileadi. 3Ahabu mfalme wa Israeli akamwuliza Yehoshafati mfalme wa Yuda, “Je, utakwenda pamoja nami Ramoth-gileadi?” Akajibu, “Mimi ni kama wewe, na askari wangu ni kama askari wako. Tutakuwa pamoja nawe vitani.” 4Lakini Yehoshafati akamwambia mfalme wa Israeli, “Kwanza, tafadhali, ulitafute neno la BWANA.” 5Basi mfalme wa Israeli akawakusanya manabii, watu 400, akawauliza, “Je, twende vitani kupigana na Ramoth-gileadi, au nijizuie?” Wakajibu, “Panda, kwa maana Mungu ataitia mkononi mwa mfalme.” 6Lakini Yehoshafati akasema, “Je, hakuna nabii mwingine wa BWANA hapa ambaye tunaweza kumwuliza?” 7Mfalme wa Israeli akamjibu Yehoshafati, “Bado yupo mtu mmoja ambaye kupitia yeye tungeweza kumwuliza BWANA: Mikaya mwana wa Imla. Lakini mimi namchukia, kwa sababu hanitabirii kamwe mema juu yangu, ila mabaya tu siku zote.” Yehoshafati akasema, “Mfalme asiseme hivyo.” 8Basi mfalme wa Israeli akamwita mmoja wa maafisa wa ikulu, akasema, “Mlete Mikaya mwana wa Imla mara moja.” 9Wakati huo mfalme wa Israeli na Yehoshafati mfalme wa Yuda walikuwa wameketi juu ya viti vyao vya enzi, wamevaa mavazi yao ya kifalme. Walikuwa wameketi kwenye uwanja wa kupuria nafaka karibu na lango la Samaria, na manabii wote walikuwa wakitabiri mbele yao. 10Sedekia mwana wa Kenaana alikuwa amejitengenezea pembe za chuma, akasema, “Hivi ndivyo BWANA asemavyo: ‘Kwa hizi utawapiga pembe Waaramu mpaka waangamie.’” 11Manabii wote walikuwa wakitabiri jambo lile lile: “Panda Ramoth-gileadi ushinde. BWANA ataitia mkononi mwa mfalme.” 12Mjumbe aliyekwenda kumwita Mikaya akamwambia, “Sikiliza, manabii wote wanasema kwa sauti moja, na wanayoyasema ni mema kwa mfalme. Tafadhali neno lako na liwe kama la mmoja wao, useme mema.” 13Lakini Mikaya akasema, “Kama BWANA aishivyo, lolote asemalo Mungu wangu ndilo nitakalolisema.” 14Alipofika kwa mfalme, mfalme akamwuliza, “Mikaya, je, twende vitani kupigana na Ramoth-gileadi, au nijizuie?” Akajibu, “Pandeni mshinde. Watatiwa mikononi mwenu.” 15Lakini mfalme akamwambia, “Ni mara ngapi nikuapishe uniambie kweli tu kwa jina la BWANA?” 16Ndipo Mikaya akasema, “Niliwaona Israeli wote wametawanyika juu ya vilima, kama kondoo wasio na mchungaji. Naye BWANA akasema, ‘Hawa hawana bwana; kila mmoja wao na arudi nyumbani kwa amani.’” 17Mfalme wa Israeli akamwambia Yehoshafati, “Je, sikukuambia kwamba hanitabirii lolote jema, ila mabaya tu?”

18Mikaya akaendelea, “Basi sikieni neno la BWANA. Nilimwona BWANA ameketi juu ya kiti chake cha enzi, na jeshi lote la mbinguni limesimama upande wake wa kulia na upande wake wa kushoto. 19BWANA akasema, ‘Ni nani atakayemshawishi Ahabu mfalme wa Israeli apande na kuanguka huko Ramoth-gileadi?’ Wengine wakashauri hili na wengine lile. 20Kisha roho mmoja akajitokeza, akasimama mbele za BWANA, akasema, ‘Mimi nitamshawishi.’ BWANA akamwuliza, ‘Kwa namna gani?’ 21Akasema, ‘Nitatoka niwe roho ya uongo katika kinywa cha manabii wake wote.’ BWANA akasema, ‘Utamshawishi, nawe utafaulu. Nenda ukafanye hivyo.’ 22Basi sasa BWANA ametia roho ya uongo katika kinywa cha manabii wako hawa. BWANA ameamuru maafa juu yako.”

23Ndipo Sedekia mwana wa Kenaana akamwendea Mikaya, akampiga kofi shavuni. Akamwuliza, “Roho wa BWANA alishika njia gani alipotoka kwangu ili aseme nawe?” 24Mikaya akajibu, “Utajua siku ile utakapoingia katika chumba cha ndani ili kujificha.” 25Kisha mfalme wa Israeli akaamuru, “Mchukueni Mikaya mkamrudishe kwa Amoni, gavana wa mji, na kwa Yoashi, mwana wa mfalme, 26mkawaambie, ‘Hivi ndivyo mfalme asemavyo: “Mtieni mtu huyu gerezani, mkamlishe mkate kidogo na maji kidogo mpaka nitakaporudi salama.”’” 27Mikaya akasema, “Kama utarudi salama hata kidogo, basi BWANA hakusema kupitia mimi.” Akaongeza, “Sikilizeni, enyi mataifa yote!”

28Basi mfalme wa Israeli akapanda kwenda Ramoth-gileadi, na Yehoshafati mfalme wa Yuda pamoja naye. 29Mfalme wa Israeli akamwambia Yehoshafati, “Nitaingia vitani nikiwa nimejibadilisha, lakini wewe vaa mavazi yako ya kifalme.” Basi mfalme wa Israeli akajibadilisha, nao wawili wakaingia vitani. 30Mfalme wa Aramu alikuwa amewapa wakuu wake wa magari ya vita amri hii: “Msipigane na mtu yeyote, mdogo au mkubwa, ila mfalme wa Israeli peke yake.” 31Wakuu wa magari ya vita walipomwona Yehoshafati, walisema, “Huyo ndiye mfalme wa Israeli!” Basi wakamzunguka ili kumshambulia, naye Yehoshafati akapiga kelele. BWANA akamsaidia; Mungu akawavuta mbali naye. 32Wakuu wa magari ya vita walipoona kwamba yeye si mfalme wa Israeli, waliacha kumfukuza. 33Lakini mtu mmoja akavuta upinde wake bila kulenga mtu fulani, akampiga mfalme wa Israeli kati ya viungo vya deraya yake ya magamba na kifuko cha kifua. Mfalme akamwambia dereva wa gari lake, “Geuza unitoe vitani, kwa sababu nimejeruhiwa.” 34Siku ile yote vita vikazidi kuwa vikali, naye mfalme wa Israeli akajishikilia wima garini akiwaelekea Waaramu mpaka jioni. Jua lilipozama, akafa.