2 Mambo ya Nyakati 16

1Katika mwaka wa thelathini na sita wa utawala wa Asa, Baasha mfalme wa Israeli alipanda kuishambulia Yuda, akaiimarisha Rama, ili mtu yeyote asiweze kutoka wala kuingia kwa Asa mfalme wa Yuda. 2Ndipo Asa akatoa fedha na dhahabu katika hazina za nyumba ya BWANA na za ikulu ya mfalme, akampelekea Ben-hadadi mfalme wa Aramu, aliyetawala huko Dameski, na ujumbe huu: 3“Na pawe na agano kati yangu na wewe, kama lilivyokuwa kati ya baba yangu na baba yako. Ninakuletea fedha na dhahabu. Nenda ukavunje agano lako na Baasha mfalme wa Israeli, naye ataniondokea.” 4Ben-hadadi akakubali maneno ya mfalme Asa, akawatuma wakuu wa majeshi yake kushambulia miji ya Israeli. Wakaiteka Iyoni, Dani, Abel-maimu na miji yote ya ghala ya Naftali. 5Baasha aliposikia habari hiyo, aliacha kuijenga Rama, akaiacha kazi yake.

6Kisha mfalme Asa akawaleta Yuda wote, nao wakayabeba mawe na miti ambayo Baasha alitumia kuijenga Rama. Kwa vitu hivyo akaiimarisha Geba na Mizpa.

7Wakati ule mwonaji Hanani alikuja kwa Asa mfalme wa Yuda, akamwambia, “Ulimtegemea mfalme wa Aramu wala hukumtegemea BWANA Mungu wako. Kwa sababu hiyo, jeshi la mfalme wa Aramu limekuponyoka. 8Je, Wakushi na Walibia hawakuwa jeshi kubwa sana, lenye magari ya vita na wapanda farasi wengi mno? Lakini wewe ulimtegemea BWANA, naye akawatia mikononi mwako. 9Kwa maana macho ya BWANA yanazunguka duniani kote, ili aonyeshe nguvu zake kwa ajili ya wale ambao mioyo yao imejitoa kwake kikamilifu. Umetenda kwa upumbavu katika jambo hili, na tangu sasa utakabiliwa na vita.” 10Asa alimkasirikia mwonaji, akamtia gerezani kwenye mkatale, kwa sababu alikuwa na ghadhabu juu yake kwa jambo hili. Na wakati ule Asa aliwatendea baadhi ya watu kwa ukali. 11Mambo ya Asa, tangu mwanzo hadi mwisho, yameandikwa katika Kitabu cha Wafalme wa Yuda na Israeli. 12Katika mwaka wa thelathini na tisa wa utawala wake, Asa aliugua miguu, na ugonjwa wake ukawa mkali sana. Hata katika ugonjwa wake hakumtafuta BWANA; aliwatafuta waganga tu. 13Kisha Asa akapumzika pamoja na babu zake; alikufa katika mwaka wa arobaini na mmoja wa utawala wake. 14Walimzika katika kaburi lake mwenyewe alilokuwa amejichongea katika mji wa Daudi, wakamlaza juu ya jeneza lililojaa manukato na aina nyingi za marashi zilizochanganywa kwa ustadi wa mtengeneza marashi. Wakawasha moto mkubwa sana kwa heshima yake.