2 Mambo ya Nyakati 34

1Yosia alikuwa na umri wa miaka minane alipoanza kutawala, naye akatawala miaka thelathini na mmoja huko Yerusalemu. 2Alifanya yaliyo sawa machoni pa BWANA, akaenenda katika njia za babu yake Daudi. Hakugeuka kwenda kulia wala kushoto. 3Katika mwaka wake wa nane wa utawala, alipokuwa bado kijana, alianza kumtafuta Mungu wa babu yake Daudi. Katika mwaka wa kumi na mbili akaanza kuitakasa Yuda na Yerusalemu, akiondoa mahali pa juu, miti ya Ashera, sanamu za kuchonga na sanamu za kusubu. 4Chini ya uongozi wake walizibomoa madhabahu za Mabaali, naye akazikata madhabahu za uvumba zilizokuwa juu yake. Akaivunja miti ya Ashera, sanamu za kuchonga na sanamu za kusubu, akazisaga ziwe mavumbi, akayanyunyiza mavumbi hayo juu ya makaburi ya wale waliozitolea dhabihu. 5Aliiteketeza mifupa ya makuhani juu ya madhabahu zao, na hivyo akaitakasa Yuda na Yerusalemu. 6Katika miji ya Manase, Efraimu na Simeoni, hata Naftali, katika magofu yao pande zote, 7alizibomoa madhabahu na miti ya Ashera, akazisaga sanamu za kuchonga ziwe mavumbi, akazikata madhabahu zote za uvumba katika kila sehemu ya nchi ya Israeli. Kisha akarudi Yerusalemu.

8Alipokwisha kuitakasa nchi na nyumba, katika mwaka wa kumi na nane wa utawala wake, alimtuma Shafani mwana wa Azalia, Maaseya mkuu wa mji na Yoa mwana wa Yoahazi, mwandishi wa kumbukumbu, kuitengeneza nyumba ya BWANA Mungu wake. 9Walikwenda kwa Hilkia kuhani mkuu, wakamkabidhi fedha iliyoletwa katika nyumba ya Mungu, ambayo Walawi waliolinda milango walikuwa wameikusanya kutoka Manase na Efraimu, kutoka kwa Israeli wote waliobaki, na kutoka Yuda yote na Benyamini, kisha wakarudi Yerusalemu. 10Waliikabidhi kwa watu wanaofanya kazi, waliowekwa kuisimamia nyumba ya BWANA, nao wakawalipa mafundi waliofanya kazi katika nyumba ya BWANA ili kuitengeneza na kuikarabati nyumba. 11Waliwapa mafundi na wajenzi ili wanunue mawe yaliyochongwa, na mbao kwa ajili ya viunganishi na kwa ajili ya boriti za majengo ambayo wafalme wa Yuda walikuwa wameyaacha yaharibike. 12Watu hao walifanya kazi kwa uaminifu. Juu yao waliwekwa Yahathi na Obadia, Walawi wa wazao wa Merari, na Zekaria na Meshulamu, wa wazao wa Kohathi, ili kuiongoza kazi. Na Walawi, wote waliokuwa stadi wa vyombo vya muziki, 13walisimamia wachukuzi na kuwaongoza wafanyakazi wote katika kila aina ya kazi. Baadhi ya Walawi walikuwa waandishi, maafisa na mabawabu. 14Walipokuwa wakiitoa fedha iliyoletwa katika nyumba ya BWANA, kuhani Hilkia alikiona kitabu cha Sheria ya BWANA, iliyotolewa kupitia Musa. 15Hilkia akamwambia Shafani katibu, “Katika nyumba ya BWANA nimekiona kitabu cha Sheria.” Hilkia akampa Shafani kitabu hicho. 16Shafani alimpelekea mfalme kitabu hicho, akampa pia taarifa: “Maafisa wako wanafanya kila kitu walichokabidhiwa. 17Wameimimina fedha iliyopatikana katika nyumba ya BWANA, wakaikabidhi kwa wasimamizi na kwa watu wanaofanya kazi.” 18Kisha Shafani katibu akamwambia mfalme, “Hilkia kuhani amenipa kitabu.” Naye Shafani akasoma ndani yake kwa sauti mbele ya mfalme. 19Mfalme alipoyasikia maneno ya Sheria, aliyararua mavazi yake. 20Kisha mfalme akatoa amri kwa Hilkia, Ahikamu mwana wa Shafani, Abdoni mwana wa Mika, Shafani katibu, na Asaya afisa wa mfalme: 21“Nendeni mkamwulize BWANA kwa niaba yangu, na kwa niaba ya wale waliobaki katika Israeli na katika Yuda, kuhusu maneno ya kitabu kilichopatikana. Hasira ya BWANA iliyomiminwa juu yetu ni kubwa, kwa sababu babu zetu hawakulishika neno la BWANA wala kufanya yote yaliyoandikwa katika kitabu hiki.”

22Basi Hilkia na wale ambao mfalme aliwatuma walikwenda kwa nabii Hulda, mke wa Shalumu mwana wa Tokhathi, mwana wa Hasra, mtunzaji wa mavazi. Aliishi katika Mtaa wa Pili wa Yerusalemu, nao wakazungumza naye juu ya jambo hilo.

23Akawaambia, “Hivi ndivyo BWANA, Mungu wa Israeli, asemavyo: Mwambieni mtu yule aliyewatuma kwangu,

24‘Hivi ndivyo BWANA asemavyo: Ninakaribia kuleta maafa juu ya mahali hapa na juu ya wale wanaoishi humo, laana zote zilizoandikwa katika kitabu kilichosomwa mbele ya mfalme wa Yuda, 25kwa sababu wameniacha na kuifukizia uvumba miungu mingine, wakinikasirisha kwa kazi zote za mikono yao. Kwa hiyo ghadhabu yangu itamiminika juu ya mahali hapa, wala haitazimwa.’ 26Lakini mwambieni mfalme wa Yuda, aliyewatuma kumwuliza BWANA, hivi: ‘Hivi ndivyo BWANA, Mungu wa Israeli, asemavyo: Kuhusu maneno uliyoyasikia, 27kwa sababu moyo wako ulikuwa mwepesi wa kuguswa, nawe uliposikia maneno yake juu ya mahali hapa na watu wake ukajinyenyekeza mbele za Mungu; na kwa sababu ulijinyenyekeza mbele yangu, ukayararua mavazi yako na kulia mbele yangu, mimi nami nimekusikia, asema BWANA. 28Nitakukusanya kwa babu zako, nawe utakusanywa kaburini mwako kwa amani. Hutaona kwa macho yako maafa yote nitakayoleta juu ya mahali hapa na juu ya wale wanaoishi humo.’” Kisha wakampelekea mfalme jibu lake.

29Kisha mfalme alituma ujumbe, akawakusanya wazee wote wa Yuda na Yerusalemu. 30Mfalme alipanda kwenda nyumba ya BWANA, na pamoja naye wakaenda watu wote wa Yuda na wote walioishi Yerusalemu, makuhani na Walawi, na watu wote, tangu mkubwa hadi mdogo. Akasoma wakisikia maneno yote ya kitabu cha agano, kilichokuwa kimepatikana katika nyumba ya BWANA. 31Mfalme alisimama mahali pake, akafanya agano mbele za BWANA: kumfuata BWANA na kuzishika amri zake, maagizo yake na masharti yake kwa moyo wake wote na nafsi yake yote, na hivyo kuyatimiza maneno ya agano yaliyoandikwa katika kitabu hiki. 32Aliwafanya wote waliokuwapo Yerusalemu na Benyamini wajifunge kwa agano hilo, nao watu wa Yerusalemu wakatenda kulingana na agano la Mungu, Mungu wa babu zao. 33Yosia aliondoa vitu vyote vya kuchukiza katika nchi zote zilizokuwa za Waisraeli, akawafanya wote waliokuwapo katika Israeli wamtumikie BWANA Mungu wao. Muda wote alipokuwa hai, hawakuacha kumfuata BWANA, Mungu wa babu zao.