2 Mambo ya Nyakati 32

1Baada ya matendo haya ya uaminifu, Senakeribu mfalme wa Ashuru alikuja akaingia Yuda. Akapiga kambi dhidi ya miji yenye ngome, akikusudia kuivunja na kuiteka iwe yake. 2Hezekia alipoona kwamba Senakeribu amekuja, naye ameazimu kupigana vita dhidi ya Yerusalemu, 3alishauriana na maafisa wake na wapiganaji wake juu ya kuyaziba maji ya chemchemi zilizokuwa nje ya mji, nao wakamuunga mkono. 4Watu wengi sana walikusanyika wakaziba chemchemi zote na kijito kilichopita katikati ya nchi. Wakasema, “Kwa nini wafalme wa Ashuru waje na kukuta maji mengi?” 5Hezekia alipiga moyo konde. Aliujenga upya ukuta wote mahali ulipobomoka, akaupandisha mpaka kufikia minara, akajenga ukuta mwingine nje yake. Akaiimarisha Milo katika mji wa Daudi, akatengeneza silaha nyingi na ngao. 6Aliweka makamanda wa jeshi juu ya watu, akawakusanya kwake katika uwanja wa lango la mji. Kisha akawatia moyo, akisema, 7“Iweni hodari na jasiri. Msiogope wala msikate tamaa kwa sababu ya mfalme wa Ashuru na kundi lote kubwa lililo pamoja naye, kwa maana aliye upande wetu ni mkuu kuliko walio upande wake. 8Yeye ana mkono wa mwili tu, lakini sisi tunaye BWANA Mungu wetu pamoja nasi, kutusaidia na kutupigania vita vyetu.” Nao watu wakapata moyo kwa maneno ya Hezekia mfalme wa Yuda.

9Baada ya hayo, Senakeribu mfalme wa Ashuru alipokuwa akiuzingira Lakishi pamoja na majeshi yake yote, aliwatuma maafisa wake Yerusalemu, kwa Hezekia mfalme wa Yuda na kwa watu wote wa Yuda waliokuwa Yerusalemu, na ujumbe huu: 10“Hivi ndivyo asemavyo Senakeribu mfalme wa Ashuru: Mnategemea nini, hata mnakaa Yerusalemu mkiwa mmezingirwa? 11Je, Hezekia hawapotoshi, akiwatoa mfe kwa njaa na kiu, anaposema, ‘BWANA Mungu wetu atatuokoa kutoka mkononi mwa mfalme wa Ashuru’? 12Je, si Hezekia huyo huyo aliyeondoa mahali pake pa juu na madhabahu zake, akawaambia Yuda na Yerusalemu, ‘Ni lazima msujudu mbele ya madhabahu moja na kuteketeza sadaka zenu juu yake’? 13Je, hamjui yale ambayo mimi na mababu zangu tumewafanyia watu wote wa nchi nyingine? Je, miungu ya mataifa ya nchi hizo iliwahi kuweza kuiokoa nchi yao kutoka mkononi mwangu? 14Ni mungu yupi miongoni mwa miungu yote ya mataifa haya, ambayo mababu zangu waliyaangamiza kabisa, aliyeweza kuwaokoa watu wake kutoka mkononi mwangu? Basi Mungu wenu angewezaje kuwaokoa ninyi kutoka mkononi mwangu? 15Basi sasa msikubali Hezekia awadanganye wala awapotoshe hivi. Msimwamini. Hakuna mungu wa taifa lolote wala wa ufalme wowote aliyeweza kuwaokoa watu wake kutoka mkononi mwangu au kutoka mkononi mwa mababu zangu. Sembuse Mungu wenu atawaokoa kutoka mkononi mwangu!” 16Maafisa wake walisema mengine zaidi dhidi ya BWANA Mungu na dhidi ya mtumishi wake Hezekia. 17Pia aliandika barua za kumtukana BWANA, Mungu wa Israeli, na kusema dhidi yake: “Kama vile miungu ya mataifa ya nchi nyingine isivyowaokoa watu wao kutoka mkononi mwangu, vivyo hivyo Mungu wa Hezekia hatawaokoa watu wake kutoka mkononi mwangu.” 18Walipaza sauti kwa lugha ya Yuda kwa watu wa Yerusalemu waliokuwa juu ya ukuta, wakijaribu kuwatia hofu na kuwatisha ili wauteke mji. 19Walimsema Mungu wa Yerusalemu kana kwamba yeye ni mmoja wa miungu ya watu wa dunia, kazi ya mikono ya wanadamu.

20Kisha mfalme Hezekia na nabii Isaya mwana wa Amozi waliomba kuhusu jambo hili, wakalilia mbingu.

21BWANA alimtuma malaika, aliyewakatilia mbali mashujaa wote hodari, viongozi na makamanda katika kambi ya mfalme wa Ashuru. Senakeribu akarudi katika nchi yake kwa aibu. Naye alipoingia katika nyumba ya mungu wake, baadhi ya wazao wake mwenyewe walimuua huko kwa upanga. 22Kwa njia hii BWANA alimwokoa Hezekia na watu wa Yerusalemu kutoka mkononi mwa Senakeribu mfalme wa Ashuru na kutoka mkononi mwa wengine wote, akawatunza pande zote. 23Wengi walimletea BWANA matoleo huko Yerusalemu, na zawadi za thamani kwa Hezekia mfalme wa Yuda, na tangu hapo akaheshimiwa sana na mataifa yote.

24Siku hizo Hezekia aliugua, akakaribia kufa. Akamwomba BWANA, naye akamjibu na kumpa ishara. 25Lakini Hezekia hakujibu kwa kadiri ya wema aliotendewa, kwa sababu moyo wake ulijaa kiburi. Kwa hiyo ghadhabu ikaja juu yake na juu ya Yuda na Yerusalemu. 26Kisha Hezekia akajinyenyekeza kwa ajili ya kiburi cha moyo wake, yeye pamoja na watu wa Yerusalemu, kwa hiyo ghadhabu ya BWANA haikuwajia katika siku za Hezekia. 27Hezekia alikuwa na utajiri mwingi sana na heshima. Alijijengea hazina za fedha na dhahabu, za mawe ya thamani na manukato, za ngao na za kila aina ya vitu vya thamani, 28na ghala kwa ajili ya mavuno ya nafaka, divai mpya na mafuta. Pia alijenga mabanda kwa ajili ya kila aina ya mifugo na mazizi kwa ajili ya makundi. 29Pia alijijengea miji, akapata makundi mengi ya kondoo na ya ng’ombe, kwa maana Mungu alikuwa amempa utajiri mwingi sana. 30Ni Hezekia aliyeziba chanzo cha juu cha maji ya Gihoni, akayapitisha moja kwa moja chini mpaka upande wa magharibi wa mji wa Daudi. Hezekia alifanikiwa katika kila jambo alilofanya. 31Na hivyo, katika habari ya wajumbe wa maafisa wa Babeli waliotumwa kwake kuuliza kuhusu ishara iliyotokea katika nchi, Mungu alimwacha peke yake ili amjaribu, ajue yote yaliyokuwa moyoni mwake. 32Mambo mengine ya Hezekia na matendo yake ya uaminifu yameandikwa katika maono ya nabii Isaya mwana wa Amozi, katika Kitabu cha Wafalme wa Yuda na Israeli. 33Kisha Hezekia akapumzika pamoja na babu zake, wakamzika katika mwinuko unaoelekea makaburi ya wazao wa Daudi. Yuda wote na watu wa Yerusalemu walimheshimu alipokufa. Na mwanawe Manase akawa mfalme mahali pake.