2 Mambo ya Nyakati 23

1Katika mwaka wa saba Yehoyada alipiga moyo konde. Akawaingiza wakuu wa mamia katika agano pamoja naye: Azaria mwana wa Yerohamu, Ishmaeli mwana wa Yehohanani, Azaria mwana wa Obedi, Maaseya mwana wa Adaya na Elishafati mwana wa Zikri. 2Walizunguka katika Yuda yote, wakawakusanya Walawi kutoka miji yote ya Yuda na wakuu wa jamaa za Israeli, wakaja Yerusalemu. 3Katika nyumba ya Mungu kusanyiko lote lilifanya agano na mfalme. Yehoyada akawaambia, “Huyu hapa mwana wa mfalme! Yeye atatawala, kama BWANA alivyoahidi kuhusu wazao wa Daudi. 4Hivi ndivyo mtakavyofanya. Theluthi moja yenu, makuhani na Walawi wanaoingia zamu siku ya Sabato, watakuwa mabawabu kwenye milango, 5theluthi moja watakuwa kwenye ikulu ya mfalme, na theluthi moja kwenye Lango la Msingi. Watu wote watakuwa katika nyua za nyumba ya BWANA. 6Mtu yeyote asiingie katika nyumba ya BWANA isipokuwa makuhani na Walawi wanaohudumu humo. Hao wanaweza kuingia kwa sababu ni watakatifu, lakini watu wote lazima washike agizo la BWANA. 7Walawi watamzunguka mfalme pande zote, kila mtu akiwa na silaha zake mkononi. Yeyote atakayeingia katika nyumba lazima auawe. Kaeni pamoja na mfalme popote aendapo.” 8Walawi na Yuda wote walifanya kila kitu ambacho Yehoyada kuhani aliamuru. Kila mmoja akaleta watu wake, wale walioingia zamu siku ya Sabato na wale waliotoka zamu siku hiyo, kwa kuwa Yehoyada kuhani hakuwa ameziruhusu zamu kuondoka. 9Yehoyada kuhani akawapa wakuu wa mamia mikuki na ngao za aina mbili zilizokuwa mali ya mfalme Daudi, zilizowekwa katika nyumba ya Mungu. 10Akawaweka watu wote mahali pao, kila mtu akiwa na silaha yake mkononi, kutoka upande wa kusini wa hekalu mpaka upande wa kaskazini, kando ya madhabahu na hekalu, wakimzunguka mfalme. 11Kisha wakamtoa mwana wa mfalme, wakamvika taji na kumpa Ushuhuda. Wakamfanya mfalme, naye Yehoyada na wanawe wakampaka mafuta, wakapaza sauti, “Mfalme aishi milele!”

12Athalia aliposikia kelele za watu walipokuwa wakikimbia na kumsifu mfalme, alikwenda kwa watu katika nyumba ya BWANA. 13Akatazama, na pale alikuwa mfalme amesimama karibu na nguzo yake kwenye maingilio, pamoja na wakuu na wapiga tarumbeta kando yake. Watu wote wa nchi walikuwa wakishangilia na kupiga tarumbeta, na waimbaji wenye vyombo vyao vya muziki walikuwa wakiongoza sifa. Athalia akararua mavazi yake, akalia, “Uhaini! Uhaini!”

14Yehoyada kuhani akawatoa wakuu wa mamia waliosimamia jeshi, akawaambia, “Mtoeni nje kati ya safu, na yeyote atakayemfuata auawe kwa upanga.” Kwa maana kuhani alikuwa amesema, “Msimwue katika nyumba ya BWANA.” 15Wakamkamata, na alipofika kwenye maingilio ya Lango la Farasi katika ikulu ya mfalme, wakamwua huko.

16Yehoyada alifanya agano lililomfunga yeye mwenyewe, watu wote na mfalme, kwamba watakuwa watu wa BWANA. 17Kisha watu wote wakaenda kwenye nyumba ya Baali, wakaibomoa. Wakazivunja madhabahu zake na sanamu zake, wakamwua Matani, kuhani wa Baali, mbele ya madhabahu. 18Yehoyada aliweka usimamizi wa nyumba ya BWANA mikononi mwa makuhani wa Kilawi, ambao Daudi alikuwa amewapanga katika zamu juu ya nyumba ya BWANA. Walipaswa kutoa sadaka za kuteketezwa za BWANA kama sheria ya Musa inavyoagiza, kwa furaha na kuimba, kama Daudi alivyoagiza. 19Aliweka mabawabu kwenye malango ya nyumba ya BWANA, ili kumzuia mtu yeyote aliye najisi kwa namna yoyote. 20Akawachukua pamoja naye wakuu wa mamia, wakuu, watawala wa watu na watu wote wa nchi. Akamshusha mfalme kutoka nyumba ya BWANA. Wakapita katika Lango la Juu mpaka ikulu ya mfalme, wakamketisha mfalme juu ya kiti cha enzi cha kifalme. 21Watu wote wa nchi wakashangilia, nao mji ukawa na amani. Athalia alikuwa ameuawa kwa upanga.