2 Mambo ya Nyakati 15

1Roho wa Mungu alimjia Azaria mwana wa Odedi. 2Alitoka kwenda kumlaki Asa, akamwambia, “Nisikieni, Asa, na Yuda wote na Benyamini. BWANA yuko pamoja nanyi maadamu ninyi mko pamoja naye. Mkimtafuta, atawawezesha kumpata; lakini mkimwacha, atawaacha.

3Kwa muda mrefu Israeli waliishi bila Mungu wa kweli, bila kuhani wa kuwafundisha, na bila sheria. 4Lakini katika dhiki yao walimrudia BWANA, Mungu wa Israeli; walimtafuta, naye akawawezesha kumpata. 5Nyakati zile hapakuwa na amani kwa mtu yeyote aliyetoka wala aliyeingia, kwa sababu ghasia kubwa ziliwasumbua wote walioishi katika nchi zile. 6Taifa lilivunjwa na taifa, na mji kwa mji, kwa sababu Mungu aliwasumbua kwa kila aina ya dhiki. 7Lakini ninyi, iweni hodari wala msiiache mikono yenu ilegee, kwa maana kazi yenu italipwa.”

8Asa aliposikia maneno haya na unabii wa Odedi nabii, alipata ujasiri. Akaziondoa sanamu za kuchukiza katika nchi yote ya Yuda na Benyamini na katika miji aliyoiteka katika nchi ya milima ya Efraimu, akaitengeneza upya madhabahu ya BWANA iliyokuwa mbele ya baraza la nyumba ya BWANA. 9Aliwakusanya Yuda wote na Benyamini, pamoja na watu wa Efraimu, Manase na Simeoni walioishi kati yao kama wageni. Watu wengi sana walikuwa wamehamia kwake kutoka Israeli, kwa sababu waliona kwamba BWANA Mungu wake alikuwa pamoja naye.

10Walikusanyika Yerusalemu katika mwezi wa tatu wa mwaka wa kumi na tano wa utawala wa Asa. 11Siku ile walimtolea BWANA dhabihu kutoka katika nyara walizoleta: ng’ombe 700 na kondoo 7,000. 12Waliingia katika agano: wangemtafuta BWANA, Mungu wa babu zao, kwa moyo wao wote na kwa roho yao yote, 13na yeyote, mdogo au mkubwa, mwanamume au mwanamke, ambaye angekataa kumtafuta BWANA, Mungu wa Israeli, angeuawa. 14Walimwapia BWANA kiapo kwa sauti kuu, kwa kelele za furaha, na kwa tarumbeta na baragumu za pembe za kondoo. 15Yuda wote walifurahia kiapo hicho, kwa sababu walikuwa wameapa kwa moyo wao wote na kumtafuta kwa shauku yao yote, naye akawawezesha kumpata. Hivyo BWANA akawapa raha pande zote. 16Mfalme Asa hata alimwondoa Maaka mama yake katika cheo cha mama wa mfalme, kwa sababu alikuwa ametengeneza sanamu ya kuchukiza kwa ajili ya Ashera. Asa akaikata sanamu yake, akaiponda, akaiteketeza katika Bonde la Kidroni. 17Hata hivyo, mahali pa juu hapakuondolewa katika Israeli. Lakini moyo wa Asa ulijitoa kikamilifu maisha yake yote. 18Akaleta ndani ya nyumba ya Mungu vitu ambavyo baba yake alikuwa ameviweka wakfu na vitu ambavyo yeye mwenyewe aliviweka wakfu: fedha, dhahabu na vyombo. 19Hapakuwa na vita mpaka mwaka wa thelathini na tano wa utawala wa Asa.