2 Mambo ya Nyakati 20

1Baada ya haya Wamoabu na Waamoni, pamoja na baadhi ya Wameuni, walikuja kupigana vita na Yehoshafati. 2Watu fulani walikuja wakamwambia Yehoshafati, “Jeshi kubwa linakuja kukushambulia kutoka ng’ambo ya Bahari ya Chumvi, kutoka Edomu. Tayari wako Hazazon-tamari, yaani En-gedi.” 3Yehoshafati aliogopa, akaamua kumtafuta BWANA. Akatangaza mfungo kwa Yuda yote. 4Watu wa Yuda walikusanyika kutafuta msaada kwa BWANA; walikuja kutoka kila mji wa Yuda kumtafuta BWANA. 5Yehoshafati alisimama katika kusanyiko la Yuda na Yerusalemu kwenye nyumba ya BWANA, mbele ya ua mpya. 6Akasema, “Ee BWANA, Mungu wa babu zetu, je, wewe si Mungu aliye mbinguni? Wewe unatawala falme zote za mataifa. Mkononi mwako mna uwezo na nguvu, wala hakuna anayeweza kusimama dhidi yako. 7Ee Mungu wetu, je, si wewe uliyewafukuza watu walioishi katika nchi hii watu wako Israeli walipoingia, ukaipa wazao wa rafiki yako Abrahamu iwe yao daima? 8Wamekaa ndani yake, nao wamekujengea humo patakatifu kwa ajili ya jina lako, wakisema, 9‘Msiba ukitujia, uwe upanga wa hukumu, au tauni, au njaa, tutasimama mbele ya nyumba hii na mbele yako, kwa kuwa nyumba hii inaitwa kwa jina lako. Tutakulilia katika taabu yetu, nawe utasikia na kutuokoa.’ 10Lakini sasa watazame watu wa Amoni, Moabu na mlima Seiri. Hukuwaruhusu Israeli kuwavamia walipotoka katika nchi ya Misri, kwa hiyo Israeli waliwaepuka, wala hawakuwaangamiza, 11na tazama jinsi wanavyotulipa: wanakuja kutufukuza kutoka katika milki yako, nchi uliyotupa tuwe nayo kama mali yetu. 12Ee Mungu wetu, je, hutawahukumu? Hatuna nguvu ya kulikabili jeshi hili kubwa linalokuja kutushambulia. Hatujui la kufanya, lakini macho yetu yanakutazama wewe.” 13Watu wote wa Yuda walisimama mbele za BWANA, pamoja na watoto wao wadogo, wake zao na watoto wao.

14Ndipo Roho wa BWANA akamjia Yahazieli mwana wa Zekaria, mwana wa Benaya, mwana wa Yeieli, mwana wa Matania, Mlawi wa ukoo wa Asafu, pale katikati ya kusanyiko. 15Akasema, “Sikilizeni, Yuda wote, watu wa Yerusalemu, na mfalme Yehoshafati! Hivi ndivyo BWANA asemavyo kwenu: ‘Msiogope wala msikate tamaa kwa sababu ya jeshi hili kubwa, kwa maana vita si vyenu; ni vya Mungu. 16Kesho shukeni mkapigane nao. Watakuwa wakipanda kwa Mwinuko wa Sisi; mtawakuta mahali bonde linapoishia, mkabala na jangwa la Yerueli. 17Hamtahitaji kupigana katika vita hivi. Shikeni nafasi zenu, simameni imara, mwone jinsi BWANA atakavyowaokoa, Ee Yuda na Yerusalemu. Msiogope wala msikate tamaa. Kesho tokeni mkakabiliane nao, naye BWANA atakuwa pamoja nanyi.’” 18Yehoshafati aliinama uso wake hadi chini, nao Yuda wote na watu wa Yerusalemu wakaanguka mbele za BWANA ili kumsujudia BWANA. 19Kisha Walawi wa Wakohathi na Wakora walisimama kumsifu BWANA, Mungu wa Israeli, kwa sauti kubwa sana. 20Asubuhi na mapema waliondoka kwenda jangwa la Tekoa. Walipokuwa wakitoka, Yehoshafati alisimama akasema, “Nisikieni, Yuda na watu wa Yerusalemu! Simameni imara katika kumwamini BWANA Mungu wenu, nanyi mtasimamishwa imara. Waaminini manabii wake, nanyi mtafanikiwa.” 21Baada ya kushauriana na watu, aliweka waimbaji wamwimbie BWANA na kumsifu katika uzuri wa utakatifu walipotangulia mbele ya jeshi, wakisema, “Mshukuruni BWANA, kwa maana upendo wake usiokoma unadumu milele.” 22Mara walipoanza kupiga kelele za shangwe na kusifu, BWANA aliweka waviziaji dhidi ya wavamizi wa Amoni, Moabu na mlima Seiri waliokuja kuishambulia Yuda, nao wakashindwa. 23Watu wa Amoni na Moabu waliwageukia watu wa mlima Seiri ili kuwaweka wakfu kwa maangamizi na kuwafutilia mbali. Walipokwisha kuwamaliza watu wa Seiri, wakasaidiana kuangamizana wao kwa wao. 24Watu wa Yuda walipofika mahali pa kulinda panapotazama jangwa na kuangalia upande wa lile jeshi kubwa, waliona maiti tu zimelala chini; hakuna hata mmoja aliyeokoka. 25Yehoshafati na askari wake walipokuja kuchukua nyara, walikuta kati yao, pamoja na maiti, mali nyingi na vitu vya thamani. Wakajichukulia zaidi ya walivyoweza kubeba. Nyara zilikuwa nyingi kiasi kwamba ziliwachukua siku tatu kuzikusanya. 26Siku ya nne walikusanyika katika Bonde la Beraka, kwa sababu huko walimbariki BWANA. Ndiyo sababu mahali pale pameitwa Bonde la Beraka mpaka leo. 27Kisha watu wote wa Yuda na Yerusalemu, Yehoshafati akiwaongoza, walirudi Yerusalemu kwa furaha, kwa sababu BWANA alikuwa amewapa furaha juu ya adui zao. 28Waliingia Yerusalemu kwa vinubi, zeze na tarumbeta, wakaenda kwenye nyumba ya BWANA. 29Falme zote za nchi zilipopata habari kwamba BWANA alikuwa amepigana na adui za Israeli, hofu ya Mungu ikawaangukia. 30Hivyo ufalme wa Yehoshafati ulikuwa na amani, kwa maana Mungu wake alimpa raha pande zote.

31Yehoshafati alitawala juu ya Yuda. Alikuwa na umri wa miaka thelathini na mitano alipoanza kutawala, naye akatawala miaka ishirini na mitano huko Yerusalemu. Mama yake aliitwa Azuba binti Shilhi. 32Alifuata njia za Asa baba yake, wala hakugeuka kando kutoka kwazo, akafanya yaliyo sawa machoni pa BWANA. 33Hata hivyo, mahali pa juu hapakuondolewa, na watu walikuwa bado hawajaikaza mioyo yao kwa Mungu wa babu zao. 34Mambo mengine ya Yehoshafati, tangu mwanzo hadi mwisho, yameandikwa katika kumbukumbu za Yehu mwana wa Hanani, zilizoingizwa katika Kitabu cha Wafalme wa Israeli. 35Baadaye Yehoshafati mfalme wa Yuda aliungana na Ahazia mfalme wa Israeli, mtu aliyetenda maovu. 36Aliungana naye katika kujenga merikebu za kwenda Tarshishi, nao wakazijenga merikebu hizo huko Esion-geberi. 37Ndipo Eliezeri mwana wa Dodavahu wa Maresha akatabiri dhidi ya Yehoshafati: “Kwa kuwa umeungana na Ahazia, BWANA atabomoa ulichokitengeneza.” Merikebu hizo zikavunjika, wala hazikuweza kusafiri kwenda Tarshishi.