2 Mambo ya Nyakati 19

1Yehoshafati mfalme wa Yuda alirudi salama ikulu kwake huko Yerusalemu. 2Yehu mwana wa Hanani mwonaji alitoka kwenda kumlaki mfalme, akamwambia Yehoshafati, “Je, ni sawa wewe kuwasaidia waovu na kuwapenda wale wanaomchukia BWANA? Kwa sababu hiyo ghadhabu imekujia kutoka kwa BWANA. 3Hata hivyo, kuna mema ndani yako, kwa maana umeiondoa nchini miti ya Ashera, nawe umeuelekeza moyo wako kumtafuta Mungu.” 4Yehoshafati alikaa Yerusalemu, lakini alitoka tena kwenda kati ya watu, tangu Beer-sheba mpaka nchi ya milima ya Efraimu. Akawarudisha kwa BWANA, Mungu wa babu zao. 5Aliweka waamuzi katika nchi yote, katika miji yote yenye ngome ya Yuda, mji kwa mji. 6Akawaambia waamuzi, “Fikirini mnachokifanya. Hamhukumu kwa ajili ya wanadamu bali kwa ajili ya BWANA, naye yuko pamoja nanyi mnapotoa hukumu. 7Basi sasa, hofu ya BWANA na iwe juu yenu. Kuweni waangalifu katika mnachokifanya, kwa maana BWANA Mungu wetu hatendi uovu, hana upendeleo, wala hapokei rushwa.” 8Katika Yerusalemu pia Yehoshafati aliweka baadhi ya Walawi na makuhani na baadhi ya wakuu wa jamaa za Israeli, ili watoe hukumu kwa ajili ya BWANA na kuamua mashauri. Nao wakarudi Yerusalemu. 9Akawapa agizo hili: “Hivi ndivyo mnavyopaswa kutenda: katika hofu ya BWANA, kwa uaminifu, na kwa moyo usiogawanyika. 10Kila shauri litakapowajia kutoka kwa ndugu zenu wanaoishi katika miji yao, likiwa ni la umwagaji damu, au la sheria na amri, kanuni na maamuzi, mnapaswa kuwaonya wasije wakawa na hatia mbele za BWANA, na ghadhabu ikawajia ninyi na ndugu zenu. Fanyeni hivyo, nanyi hamtakuwa na hatia. 11Amaria kuhani mkuu atakuwa juu yenu katika kila jambo linalomhusu BWANA. Katika kila jambo linalomhusu mfalme, Zebadia mwana wa Ishmaeli, kiongozi wa nyumba ya Yuda, atakuwa juu yenu. Walawi watawatumikia kama maafisa. Tendeni kwa ujasiri, na BWANA awe pamoja na wale watendao mema.”