2 Mambo ya Nyakati 8

1Mwisho wa miaka ishirini ambayo Sulemani alitumia kujenga nyumba ya BWANA na ikulu yake mwenyewe, 2Sulemani aliijenga upya miji ambayo Huramu alikuwa amempa, akawakalisha Waisraeli ndani yake. 3Sulemani alikwenda Hamath-soba akaiteka. 4Alijenga Tadmori nyikani na miji yote ya ghala aliyoijenga katika Hamathi. 5Alijenga pia Beth-horoni ya Juu na Beth-horoni ya Chini kuwa miji yenye ngome, yenye kuta, malango na makomeo, 6na Baalathi, miji yote ya ghala aliyokuwa nayo Sulemani, miji yote ya magari yake ya vita na ya wapanda farasi wake, na chochote Sulemani alichotamani kujenga huko Yerusalemu, Lebanoni na katika nchi yote aliyoitawala. 7Kuhusu watu wote waliosalia wa Wahiti, Waamori, Waperizi, Wahivi na Wayebusi, ambao hawakuwa sehemu ya Israeli, 8wazao wao waliosalia katika nchi, ambao Waisraeli hawakuwaangamiza, Sulemani aliwaandikisha kwa kazi ya kulazimishwa, mpaka leo. 9Lakini Sulemani hakumfanya mtumwa yeyote wa Waisraeli kwa kazi yake. Wao walikuwa askari wake, wakuu wa maafisa wake, na wakuu wa magari yake ya vita na wapanda farasi wake.

10Hawa ndio waliokuwa maafisa wakuu wa mfalme Sulemani: 250, waliowaongoza watu. 11Sulemani alimhamisha binti Farao kutoka mji wa Daudi mpaka nyumba aliyokuwa amemjengea. Sababu yake ilikuwa hii: “Hakuna mke wangu atakayeishi katika nyumba ya Daudi mfalme wa Israeli, kwa kuwa mahali ambapo sanduku la BWANA limefika ni patakatifu.”

12Kisha Sulemani akamtolea BWANA sadaka za kuteketezwa juu ya madhabahu ya BWANA, aliyokuwa ameijenga mbele ya baraza, 13akitoa sadaka zilizohitajika kila siku, sawasawa na amri ya Musa, siku za Sabato, za mwezi mpya, na za sikukuu zilizoamriwa mara tatu kwa mwaka: Sikukuu ya Mikate Isiyotiwa Chachu, Sikukuu ya Majuma na Sikukuu ya Vibanda. 14Kwa kufuata agizo la baba yake Daudi, aliweka zamu za makuhani katika huduma yao, na Walawi katika kazi zao za kusifu na kuhudumu pamoja na makuhani kama ilivyohitajika kila siku, na mabawabu kwa zamu zao katika kila lango. Kwa maana hivyo ndivyo Daudi mtu wa Mungu alivyokuwa ameamuru. 15Hawakuiacha amri ya mfalme kwa makuhani na Walawi katika jambo lolote, hata kuhusu hazina. 16Hivyo kazi yote ya Sulemani ilitekelezwa, tangu siku msingi wa nyumba ya BWANA ulipowekwa mpaka ilipokamilika. Nyumba ya BWANA ikawa imekamilika.

17Kisha Sulemani alikwenda Esion-geberi na Elothi, pwani ya bahari katika nchi ya Edomu. 18Huramu alimpelekea merikebu chini ya uongozi wa watumishi wake mwenyewe, pamoja na watumishi walioijua bahari. Walikwenda pamoja na watumishi wa Sulemani mpaka Ofiri, wakaleta kutoka huko karibu kilo 15,300 za dhahabu, wakamkabidhi mfalme Sulemani.