2 Mambo ya Nyakati 33

1Manase alikuwa na umri wa miaka kumi na miwili alipoanza kutawala, naye akatawala miaka hamsini na mitano huko Yerusalemu. 2Alifanya maovu machoni pa BWANA, akifuata desturi za kuchukiza za mataifa ambayo BWANA aliyafukuza mbele ya Waisraeli. 3Alijenga upya mahali pa juu ambapo baba yake Hezekia alipabomoa. Akasimamisha madhabahu kwa ajili ya Mabaali, akafanya miti ya Ashera. Akalisujudia jeshi lote la mbinguni na kulitumikia. 4Alijenga madhabahu katika nyumba ya BWANA, nyumba ambayo BWANA alikuwa amesema habari zake, “Jina langu litakuwa katika Yerusalemu milele.” 5Alilijengea jeshi lote la mbinguni madhabahu katika nyua mbili za nyumba ya BWANA. 6Aliwapitisha wanawe motoni katika Bonde la Ben-hinomu, akapiga bao, akatazama ishara, akatumia uchawi, akawaendea wanaowaita wafu na wapiga ramli. Alizidi kufanya maovu machoni pa BWANA, akamkasirisha. 7Aliweka sanamu ya kuchonga aliyoifanya ndani ya nyumba ya Mungu, ambayo Mungu alikuwa amemwambia Daudi na mwanawe Sulemani habari zake, “Katika nyumba hii, na katika Yerusalemu, mji niliouchagua katikati ya makabila yote ya Israeli, nitaliweka jina langu milele. 8Wala sitaifanya tena miguu ya Israeli iondoke katika nchi niliyowapa babu zenu, ikiwa tu watakuwa waangalifu kufanya yote niliyowaamuru, sheria yote, amri na maagizo yaliyotolewa kupitia Musa.” 9Manase aliwapotosha Yuda na watu wa Yerusalemu, hata wakafanya maovu zaidi kuliko mataifa ambayo BWANA aliyaangamiza mbele ya Waisraeli.

10BWANA alisema na Manase na watu wake, lakini hawakujali. 11Kwa hiyo BWANA alileta dhidi yao makamanda wa jeshi la mfalme wa Ashuru, waliomkamata Manase kwa kulabu, wakamfunga kwa minyororo ya shaba, wakampeleka Babeli. 12Katika dhiki yake aliutafuta wema wa BWANA Mungu wake, akajinyenyekeza sana mbele za Mungu wa babu zake. 13Alimwomba, naye akaguswa na maombi yake. Akasikia dua yake ya rehema, akamrudisha Yerusalemu, katika ufalme wake. Ndipo Manase akajua kwamba BWANA ndiye Mungu. 14Baada ya hayo alijenga ukuta wa nje wa mji wa Daudi, upande wa magharibi wa Gihoni bondeni, mpaka maingilio ya Lango la Samaki. Akauzungusha Ofeli, akaujenga juu sana. Pia aliweka makamanda wa jeshi katika miji yote yenye ngome ya Yuda. 15Aliiondoa miungu ya kigeni katika nyumba ya BWANA, pamoja na kinyago, na kila madhabahu aliyoijenga juu ya mlima wa hekalu na mahali pengine katika Yerusalemu, akazitupa nje ya mji. 16Aliirejesha madhabahu ya BWANA, akatoa juu yake sadaka za amani na sadaka za shukrani, akawaamuru Yuda wamtumikie BWANA, Mungu wa Israeli. 17Hata hivyo watu waliendelea kutoa dhabihu mahali pa juu, ingawa kwa BWANA Mungu wao tu. 18Mambo mengine ya Manase, pamoja na maombi aliyomwomba Mungu wake na maneno ya waonaji waliosema naye kwa jina la BWANA, Mungu wa Israeli, yameandikwa katika Kumbukumbu za Wafalme wa Israeli. 19Maombi yake na jinsi Mungu alivyojibu dua yake, kila dhambi yake na kila tendo la kukosa uaminifu, na mahali alipojenga mahali pa juu na kusimamisha miti ya Ashera na sanamu za kuchonga kabla hajajinyenyekeza, yameandikwa katika Kumbukumbu za Hozai. 20Kisha Manase akapumzika pamoja na babu zake, wakamzika katika ikulu yake. Na mwanawe Amoni akawa mfalme mahali pake.

21Amoni alikuwa na umri wa miaka ishirini na miwili alipoanza kutawala, naye akatawala miaka miwili huko Yerusalemu. 22Alifanya maovu machoni pa BWANA, kama baba yake Manase alivyofanya, akitoa dhabihu kwa sanamu zote za kuchonga ambazo baba yake alizifanya na kuzitumikia. 23Tofauti na baba yake Manase, hakujinyenyekeza mbele za BWANA. Badala yake Amoni aliendelea kuongeza hatia yake zaidi na zaidi. 24Maafisa wake walifanya njama dhidi yake, wakamwua ndani ya ikulu yake. 25Kisha watu wa nchi wakawaua wote waliokuwa wamefanya njama dhidi ya mfalme Amoni, nao watu wa nchi wakamtawaza mwanawe Yosia kuwa mfalme mahali pake.