2 Mambo ya Nyakati 7

1Mara Sulemani alipomaliza kuomba, moto ulishuka kutoka mbinguni ukaila sadaka ya kuteketezwa na dhabihu, nayo nyumba ikajaa utukufu wa BWANA. 2Makuhani hawakuweza kuingia katika nyumba ya BWANA, kwa kuwa nyumba ya BWANA ilijaa utukufu wa BWANA. 3Waisraeli wote waliuona moto ukishuka na utukufu wa BWANA juu ya nyumba, wakapiga magoti na kuinamisha nyuso zao mpaka chini juu ya sakafu ya mawe. Wakaabudu na kumshukuru BWANA, kwa maana yeye ni mwema; upendo wake usiokoma unadumu milele. 4Kisha mfalme na watu wote wakatoa dhabihu mbele za BWANA.

5Mfalme Sulemani alitoa dhabihu ng’ombe 22,000 na kondoo 120,000. Hivyo mfalme na watu wote wakaiweka wakfu nyumba ya Mungu. 6Makuhani walisimama kazini mwao, vivyo hivyo Walawi wakiwa na vyombo vya muziki vya BWANA ambavyo mfalme Daudi alikuwa amevifanya kwa ajili ya kumshukuru BWANA, kwa maana upendo wake usiokoma unadumu milele, kila Daudi alipotoa sifa kupitia wao. Mbele yao makuhani walipiga tarumbeta, na Israeli wote walikuwa wamesimama.

7Sulemani aliitakasa sehemu ya katikati ya ua ulio mbele ya nyumba ya BWANA. Huko alitoa sadaka za kuteketezwa na sehemu za mafuta za sadaka za amani, kwa sababu madhabahu ya shaba aliyoifanya Sulemani haikuweza kupokea sadaka za kuteketezwa, sadaka za nafaka na mafuta. 8Basi wakati ule Sulemani aliifanya sikukuu kwa siku saba, na Israeli wote pamoja naye, kusanyiko kubwa mno tangu Lebo-hamathi mpaka kijito cha Misri. 9Siku ya nane walifanya kusanyiko takatifu, kwa kuwa walikuwa wameadhimisha kuwekwa wakfu kwa madhabahu kwa siku saba, na sikukuu kwa siku saba. 10Siku ya ishirini na tatu ya mwezi wa saba aliwaaga watu waende nyumbani, wakifurahi na wenye mioyo mikunjufu kwa ajili ya mema ambayo BWANA alikuwa amemtendea Daudi na Sulemani na Israeli watu wake. 11Basi Sulemani aliimaliza nyumba ya BWANA na ikulu ya mfalme. Kila kitu alichokuwa ameweka moyo wake kukifanya katika nyumba ya BWANA na katika ikulu yake mwenyewe, alikitekeleza kwa mafanikio.

12Kisha usiku BWANA alimtokea Sulemani, akamwambia, “Nimesikia sala yako, nami nimepachagua mahali hapa kwa ajili yangu mwenyewe kuwa nyumba ya dhabihu. 13Nitakapolifunga anga mvua isinyeshe, au kuwaamuru nzige waile nchi, au kupeleka tauni kati ya watu wangu, 14kama watu wangu wanaoitwa kwa jina langu watajinyenyekeza na kuomba, wakautafuta uso wangu na kuziacha njia zao mbaya, basi mimi mwenyewe nitasikia kutoka mbinguni. Nitasamehe dhambi yao na kuiponya nchi yao. 15Sasa macho yangu yatakuwa wazi, na masikio yangu yatasikiliza sala inayoombwa mahali hapa. 16Sasa nimeichagua nyumba hii na kuiweka wakfu, ili jina langu likae huko milele. Macho yangu na moyo wangu vitakuwa huko daima. 17Na wewe, ukiishi mbele yangu kama baba yako Daudi alivyoishi, ukitenda yote niliyokuamuru na kushika kanuni zangu na maamuzi yangu, 18ndipo nitakiimarisha kiti cha enzi cha ufalme wako, kama nilivyomwahidi baba yako Daudi katika agano langu niliposema, ‘Daima kutakuwa na mtu wa ukoo wako atakayetawala katika Israeli.’ 19Lakini ninyi nyote mkigeuka na kuziacha kanuni zangu na amri zangu nilizoweka mbele yenu, badala yake mkaenda kuitumikia miungu mingine na kuisujudia, 20ndipo nitawang’oa kutoka katika nchi yangu niliyowapa, na nyumba hii niliyoiweka wakfu kwa ajili ya jina langu nitaitupa mbali na macho yangu. Nitaifanya kuwa mithali na kitu cha dhihaka kati ya mataifa yote. 21Na nyumba hii, ijapokuwa iliinuka juu, kila apitaye karibu nayo atashangaa. Watauliza, ‘Kwa nini BWANA ameitendea hivi nchi hii na nyumba hii?’ 22Na watu watajibu, ‘Ni kwa sababu walimwacha BWANA, Mungu wa babu zao, aliyewatoa katika nchi ya Misri, wakaikumbatia miungu mingine, wakaiabudu na kuitumikia. Ndiyo sababu ameleta juu yao maafa haya yote.’”