2 Mambo ya Nyakati 2

1Sulemani aliamua kujenga nyumba kwa ajili ya jina la BWANA, na ikulu kwa ajili ya utawala wake.

2Sulemani aliweka watu 70,000 wabebe mizigo, na watu 80,000 wachonge mawe katika nchi ya milima, na watu 3,600 wawasimamie.

3Sulemani alimpelekea Huramu mfalme wa Tiro ujumbe huu: “Nitendee kama ulivyomtendea baba yangu Daudi, ulipompelekea mierezi ya kujenga nyumba ya kuishi. 4Sasa ninakwenda kujenga nyumba kwa ajili ya jina la BWANA Mungu wangu na kuiweka wakfu kwake, ili kufukiza uvumba wa manukato mbele yake, kupanga mikate safu kwa safu daima, na kutoa sadaka za kuteketezwa kila asubuhi na jioni, siku za Sabato, za mwezi mpya na za sikukuu zilizoamriwa za BWANA Mungu wetu. Hili ni agizo ambalo Israeli wanapaswa kulishika milele. 5Nyumba ninayoijenga itakuwa kubwa, kwa sababu Mungu wetu ni mkuu kuliko miungu yote. 6Lakini ni nani awezaye kumjengea nyumba, wakati mbingu zenyewe, hata mbingu za juu kabisa, haziwezi kumtosha? Basi mimi ni nani nimjengee nyumba, isipokuwa iwe mahali pa kufukiza sadaka mbele yake? 7Basi sasa nitumie mtu stadi wa kufanya kazi ya dhahabu, fedha, shaba na chuma, na ya uzi wa zambarau, mwekundu na wa samawati, ambaye pia anajua kuchora nakshi. Atafanya kazi pamoja na mafundi stadi nilio nao hapa Yuda na Yerusalemu, ambao baba yangu Daudi aliwaweka tayari. 8Nitumie pia magogo ya mierezi, misunobari na msandali kutoka Lebanoni, kwa maana najua kwamba watumishi wako ni stadi wa kukata miti ya Lebanoni. Watumishi wangu watafanya kazi pamoja na watumishi wako, 9ili kunitayarishia mbao nyingi, kwa sababu nyumba nitakayoijenga itakuwa kubwa na ya ajabu. 10Nitawapa watumishi wako, wakataji wanaokata miti, karibu lita milioni 4.4 za ngano iliyopondwa, karibu lita milioni 4.4 za shayiri, karibu lita 440,000 za divai na karibu lita 440,000 za mafuta.”

11Huramu mfalme wa Tiro alijibu kwa barua aliyompelekea Sulemani: “Kwa sababu BWANA anawapenda watu wake, amekufanya mfalme wao.” 12Huramu akasema pia, “Na abarikiwe BWANA, Mungu wa Israeli, Muumba wa mbingu na nchi, aliyempa mfalme Daudi mwana mwenye hekima, aliyejaa busara na ufahamu, atakayejenga nyumba kwa ajili ya BWANA na ikulu ya kifalme kwa ajili yake mwenyewe. 13Sasa ninakutumia mtu stadi aliye na ufahamu, Huramu-abi, 14mwana wa mwanamke wa kabila la Dani, na baba yake alikuwa mtu wa Tiro. Amefundishwa kufanya kazi ya dhahabu na fedha, shaba na chuma, mawe na miti, na ya uzi wa zambarau, samawati na mwekundu, na kitani safi. Anaweza kuchora nakshi za kila aina na kutekeleza mpango wowote atakaopewa. Atafanya kazi pamoja na mafundi wako na mafundi wa bwana wangu Daudi, baba yako. 15Basi sasa bwana wangu na awapelekee watumishi wake ngano na shayiri, mafuta na divai, kama alivyoahidi. 16Tutakata magogo yote unayohitaji kutoka Lebanoni na kukuletea kama matarafa kwa njia ya bahari mpaka Yafa. Kutoka huko unaweza kuyapandisha mpaka Yerusalemu.”

17Sulemani aliwahesabu wageni wote waliokaa katika nchi ya Israeli, baada ya hesabu ile ambayo baba yake Daudi alikuwa ameifanya, nao walikuwa 153,600. 18Aliwaweka 70,000 kati yao wabebe mizigo, na 80,000 wachonge mawe katika nchi ya milima, na 3,600 wawasimamie na kuwafanya watu waendelee na kazi.