1 Samweli 9

1Palikuwa na mtu wa kabila la Benyamini jina lake Kishi. Alikuwa mwana wa Abieli, mwana wa Serori, mwana wa Bekorathi, mwana wa Afia, mwana wa Mbenyamini mmoja, naye alikuwa mtu mwenye mali na heshima. 2Alikuwa na mwana aitwaye Sauli, kijana mzuri. Hapakuwa na mtu kati ya Waisraeli aliyekuwa mzuri kuliko yeye, naye alikuwa mrefu kuliko watu wote kwa kimo cha mabega na kichwa. 3Basi punda wa Kishi, baba yake Sauli, walikuwa wamepotea. Kwa hiyo Kishi akamwambia mwanawe Sauli, “Mchukue mmoja wa watumishi pamoja nawe, mwende mkawatafute punda.” 4Akapita katika nchi ya milima ya Efraimu na katika eneo la Shalisha, lakini hawakuwaona. Wakapita katika eneo la Shaalimu, lakini punda hawakuwamo. Kisha akapita katika nchi ya Benyamini, na bado hawakuwaona. 5Walipofika katika eneo la Sufu, Sauli akamwambia mtumishi aliyekuwa pamoja naye, “Njoo, turudi, la sivyo baba yangu ataacha kuwafikiria punda na kuanza kuwa na wasiwasi juu yetu.” 6Lakini mtumishi akajibu, “Sikiliza, yuko mtu wa Mungu katika mji huu, naye anaheshimiwa sana. Kila asemalo hutimia. Twende huko sasa. Huenda anaweza kutuambia jambo kuhusu safari hii tuliyoianza.” 7Sauli akamwambia mtumishi wake, “Lakini tukienda, tutampelekea mtu huyo nini? Mkate katika mifuko yetu umekwisha, wala hatuna zawadi ya kumpelekea mtu wa Mungu. Tuna nini?” 8Mtumishi akamjibu Sauli tena, “Tazama, nina karibu gramu 3 za fedha. Ninaweza kumpa mtu wa Mungu, ili atuambie habari ya safari yetu.” 9(Zamani katika Israeli, mtu yeyote aliyekwenda kumwuliza Mungu shauri alisema, “Njooni, twende kwa mwonaji.” Kwa maana yule anayeitwa nabii sasa zamani aliitwa mwonaji.) 10Sauli akamwambia mtumishi wake, “Hilo ni wazo zuri. Haya, twende.” Basi wakaenda mjini alimokuwa mtu wa Mungu. 11Walipokuwa wakipanda kilima kuelekea mjini, wakakutana na wasichana waliokuwa wakitoka kwenda kuteka maji, wakawauliza, “Je, mwonaji yuko hapa?” 12Wakajibu, “Ndiyo, yuko. Yuko mbele yenu kidogo. Harakisheni sasa; amekuja mjini leo kwa sababu watu wanatoa dhabihu mahali pa juu. 13Mara mtakapoingia mjini mtamkuta, kabla hajapanda mahali pa juu kwa ajili ya chakula. Watu hawali mpaka afike, kwa sababu ni lazima aibariki dhabihu; baada ya hapo wageni hula. Pandeni sasa, kwa maana huu ndio wakati hasa wa kumpata.” 14Basi wakapanda mjini. Walipokuwa wakiingia, kumbe Samweli alikuwa akitoka kuwaelekea, akiwa njiani kupanda mahali pa juu.

15Basi siku moja kabla Sauli hajaja, BWANA alikuwa amemfunulia Samweli jambo hili, 16“Kesho karibu wakati kama huu nitakutumia mtu kutoka nchi ya Benyamini. Mpake mafuta awe kiongozi juu ya watu wangu Israeli. Yeye atawaokoa watu wangu na nguvu za Wafilisti, kwa maana nimewaangalia watu wangu, kwa sababu kilio chao kimenifikia.” 17Mara Samweli alipomwona Sauli, BWANA akamwambia, “Huyo ndiye mtu niliyekuambia habari zake. Yeye ndiye atakayewaongoza watu wangu.” 18Sauli akamwendea Samweli ndani ya lango, akamwuliza, “Tafadhali niambie, nyumba ya mwonaji iko wapi?” 19Samweli akamjibu Sauli, “Mimi ndimi mwonaji. Tangulia mbele yangu mpaka mahali pa juu, kwa maana leo nyote wawili mtakula pamoja nami. Asubuhi nitakuaga uende zako, nami nitakueleza yote yaliyo moyoni mwako. 20Usiwe na wasiwasi kuhusu punda waliopotea siku tatu zilizopita; wamepatikana. Na matumaini yote ya Israeli yameelekezwa kwa nani? Je, si kwako wewe na kwa jamaa yote ya baba yako?”

21Sauli akajibu, “Lakini mimi ni Mbenyamini, wa kabila dogo kuliko yote ya Israeli, na ukoo wangu ndio mdogo kuliko koo zote za kabila la Benyamini. Kwa nini unaniambia jambo kama hili?”

22Samweli akawachukua Sauli na mtumishi wake akawaingiza ukumbini, akawapa nafasi za mbele kabisa kati ya wageni, waliokuwa watu wapata thelathini. 23Samweli akamwambia mpishi, “Leta lile fungu nililokupa, lile nililokuambia uliweke kando.” 24Basi mpishi akainua paja pamoja na kilichokuwa juu yake akakiweka mbele ya Sauli. Samweli akasema, “Hiki ndicho kilichowekwa kwa ajili yako. Kula, kwa sababu kimehifadhiwa kwa ajili yako kwa tukio hili, tangu niliposema, ‘Nimewaalika wageni.’” Basi Sauli akala pamoja na Samweli siku ile. 25Waliposhuka kutoka mahali pa juu wakaingia mjini, Samweli akazungumza na Sauli juu ya dari. 26Wakaamka mapema, na kulipopambazuka Samweli akamwita Sauli juu ya dari, “Amka, nami nitakuaga uende zako.” Sauli akaamka, naye pamoja na Samweli wakatoka nje. 27Walipokuwa wakishuka kufika mwisho wa mji, Samweli akamwambia Sauli, “Mwambie mtumishi atangulie mbele yetu,” naye akatangulia, “lakini wewe baki hapa kidogo, ili nikupe ujumbe kutoka kwa Mungu.”