1 Samweli 19

1Sauli akazungumza na mwanawe Yonathani na maafisa wake wote juu ya kumwua Daudi. Lakini Yonathani mwana wa Sauli alimpenda Daudi sana. 2Yonathani akamwambia Daudi, “Baba yangu Sauli anatafuta njia ya kukuua. Kwa hiyo tafadhali uwe mwangalifu asubuhi. Kaa mahali palipofichika, usionekane. 3Nitatoka nikasimame kando ya baba yangu katika shamba ulimo, nizungumze naye juu yako. Lolote nitakalogundua, nitakujulisha.”

4Yonathani akamsemea Daudi mema kwa baba yake Sauli. Akasema, “Mfalme asitende dhambi juu ya Daudi mtumishi wake. Daudi hajakutendea dhambi yoyote, na mambo aliyofanya yamekufaa sana. 5Aliyahatarisha maisha yake, akampiga Mfilisti, na BWANA akawapa Israeli wote ushindi mkuu. Uliona, ukafurahi. Basi kwa nini utende dhambi juu ya damu isiyo na hatia kwa kumwua Daudi bila sababu?” 6Sauli akamsikiliza Yonathani, akaapa, “Kama BWANA aishivyo, hatauawa.” 7Kisha Yonathani akamwita Daudi, akamweleza yote yaliyosemwa. Yonathani akamleta Daudi kwa Sauli, naye Daudi akamtumikia kama hapo awali.

8Vita vikazuka tena. Daudi akatoka, akapigana na Wafilisti. Akawashinda na kuwaua wengi, nao wakamkimbia. 9Kisha roho mbaya kutoka kwa BWANA ikamjia Sauli. Alikuwa ameketi nyumbani mwake, mkuki mkononi, Daudi alipokuwa akipiga kinubi. 10Sauli akajaribu kumchoma Daudi kwa mkuki na kumbana ukutani, lakini Daudi akamponyoka, na Sauli akaupigilia mkuki ukutani. Daudi akakimbia, akaokoka usiku ule.

11Sauli akatuma wajumbe nyumbani kwa Daudi wamlinde na kumwua asubuhi. Lakini Mikali, mke wa Daudi, akamwonya, “Usipojiokoa usiku huu, kesho utakuwa umekufa.” 12Basi Mikali akamshusha Daudi kupitia dirishani, naye akaondoka, akakimbia, akaokoka. 13Kisha Mikali akachukua sanamu ya miungu ya nyumbani, akailaza kitandani. Akaweka mkeka wa singa za mbuzi kichwani pake, akaifunika kwa vazi.

14Sauli alipotuma wajumbe kumkamata Daudi, Mikali akasema, “Ni mgonjwa.”

15Kisha Sauli akawatuma tena wale wajumbe wakamwone Daudi wao wenyewe. Akawaambia, “Mleteni kwangu akiwa kitandani mwake, ili nimwue.” 16Wajumbe walipoingia, kumbe ni ile sanamu ya miungu ya nyumbani iliyokuwa kitandani, na mkeka wa singa za mbuzi kichwani pake. 17Sauli akamwambia Mikali, “Kwa nini umenidanganya hivi na kumwachilia adui yangu, hata akatoroka?” Mikali akajibu, “Aliniambia, ‘Niache niende! Kwa nini nilazimike kukuua?’” 18Basi Daudi akakimbia, akaokoka. Akaenda kwa Samweli huko Rama, akamweleza yote ambayo Sauli alikuwa amemtendea. Kisha yeye na Samweli wakaenda, wakakaa Nayothi. 19Sauli akaambiwa, “Daudi yuko Nayothi huko Rama.” 20Sauli akatuma wajumbe kumkamata Daudi. Lakini walipoona kundi la manabii wakitabiri, na Samweli amesimama pale kama kiongozi wao, Roho wa Mungu akawajia wajumbe wa Sauli, nao pia wakatabiri. 21Sauli alipoambiwa, akatuma wajumbe wengine, nao pia wakatabiri. Sauli akatuma wajumbe mara ya tatu, nao pia wakatabiri. 22Kisha Sauli mwenyewe akaenda Rama. Akafika kwenye kisima kikubwa huko Seku, akauliza, “Samweli na Daudi wako wapi?” Mtu mmoja akasema, “Wako Nayothi huko Rama.” 23Basi akaenda huko, kuelekea Nayothi katika Rama. Roho wa Mungu akamjia yeye pia, naye akaendelea kutembea akitabiri mpaka alipofika Nayothi katika Rama. 24Yeye pia akavua mavazi yake, naye pia akatabiri mbele ya Samweli. Akalala pale uchi mchana ule wote na usiku ule wote. Ndiyo sababu watu husema, “Je, Sauli naye yumo miongoni mwa manabii?”