1 Samweli 7

1Basi watu wa Kiriath-yearimu wakaja wakalichukua sanduku la BWANA. Wakalileta katika nyumba ya Abinadabu iliyokuwa kilimani, nao wakamtakasa Eleazari mwanawe ili alilinde sanduku la BWANA.

2Tangu siku ile sanduku lilipoanza kukaa Kiriath-yearimu, muda mrefu ulipita, miaka ishirini kwa jumla, na nyumba yote ya Israeli ikaomboleza ikimtamani BWANA.

3Ndipo Samweli akaiambia nyumba yote ya Israeli, “Ikiwa mnamrudia BWANA kwa moyo wenu wote, iondoeni miungu ya kigeni na Ashtarothi zilizo kati yenu. Ielekezeni mioyo yenu kwa BWANA kwa uthabiti, mmtumikie yeye peke yake, naye atawaokoa na nguvu za Wafilisti.” 4Basi Waisraeli wakawaondoa Mabaali na Ashtarothi, wakamtumikia BWANA peke yake.

5Ndipo Samweli akasema, “Wakusanyeni Israeli wote pamoja huko Mizpa, nami nitamwomba BWANA kwa ajili yenu.” 6Walipokwisha kukusanyika Mizpa, wakateka maji wakayamimina mbele za BWANA. Wakafunga siku ile, wakakiri huko, “Tumemtenda BWANA dhambi.” Huko Mizpa ndiko Samweli alikowaamua Waisraeli. 7Wafilisti waliposikia kwamba Waisraeli wamekusanyika Mizpa, wakuu wa Wafilisti wakapanda kuwashambulia Israeli. Waisraeli waliposikia habari hiyo wakawaogopa Wafilisti. 8Waisraeli wakamwambia Samweli, “Usiache kumlilia BWANA Mungu wetu kwa ajili yetu, ili atuokoe na nguvu za Wafilisti.” 9Ndipo Samweli akachukua mwanakondoo mchanga ambaye bado ananyonya, akamtoa mzima kuwa sadaka ya kuteketezwa kwa BWANA. Akamlilia BWANA kwa ajili ya Israeli, na BWANA akamjibu. 10Samweli alipokuwa katikati ya kutoa sadaka ya kuteketezwa, Wafilisti wakakaribia kuwashambulia Israeli. Lakini siku ile BWANA akanguruma dhidi ya Wafilisti kwa ngurumo kuu, akawatia katika hofu, nao wakashindwa mbele ya Israeli. 11Watu wa Israeli wakatoka Mizpa, wakawafukuza Wafilisti na kuwapiga njia yote mpaka mahali chini ya Beth-kari. 12Kisha Samweli akachukua jiwe moja akaliweka kati ya Mizpa na Sheni. Akaliita Ebenezeri, akasema, “Mpaka hapa BWANA ametusaidia.” 13Basi Wafilisti wakashushwa chini, wala hawakuivamia tena nchi ya Israeli. Mkono wa BWANA ulikuwa dhidi ya Wafilisti siku zote za Samweli. 14Miji ambayo Wafilisti walikuwa wameiteka kutoka kwa Israeli ilirudishwa kwa Israeli, tangu Ekroni mpaka Gathi, nao Israeli wakaikomboa nchi iliyoizunguka na nguvu za Wafilisti. Pia palikuwa na amani kati ya Israeli na Waamori. 15Samweli aliwaamua Israeli siku zote za maisha yake. 16Kila mwaka alizunguka Betheli, Gilgali na Mizpa, akiwaamua Israeli katika kila mahali hapo. 17Kisha alirudi Rama, kwa kuwa nyumbani kwake kulikuwa huko, naye aliwaamua Israeli huko pia. Akamjengea BWANA madhabahu huko.