1 Samweli 18

1Daudi alipomaliza kuzungumza na Sauli, maisha ya Yonathani yakafungamana na maisha ya Daudi, naye Yonathani akampenda kama alivyojipenda mwenyewe. 2Tangu siku ile Sauli akamweka Daudi pamoja naye, wala hakumruhusu arudi nyumbani kwa baba yake. 3Yonathani akafanya agano na Daudi, kwa sababu alimpenda kama alivyojipenda mwenyewe. 4Yonathani akalivua joho alilokuwa amevaa, akampa Daudi, pamoja na mavazi yake ya vita, hata upanga wake, upinde wake na mshipi wake. 5Daudi alikwenda kila mahali Sauli alipomtuma, akafanikiwa kila mara, hivyo Sauli akamweka kuwa mkuu wa askari. Jambo hili likawapendeza watu wote, na maafisa wa Sauli pia.

6Jeshi lilipokuwa likirudi nyumbani, Daudi aliporudi kutoka kumwua Mfilisti, wanawake wakatoka katika kila mji wa Israeli kumlaki Mfalme Sauli, wakiimba na kucheza kwa matari, kwa nyimbo za furaha na kwa vyombo vya muziki. 7Walipokuwa wakishangilia, wanawake waliimba wakijibizana, “Sauli amewapiga maelfu yake, na Daudi makumi ya maelfu yake.” 8Sauli akakasirika mno, na maneno hayo hayakumpendeza. Akasema, “Wamempa Daudi makumi ya maelfu, nami wamenipa maelfu tu. Amebakiwa na nini tena ila ufalme?” 9Tangu siku ile, Sauli alimtazama Daudi kwa mashaka.

10Siku iliyofuata, roho mbaya kutoka kwa Mungu ikamjia Sauli kwa nguvu, akapayuka ndani ya nyumba, Daudi alipokuwa akipiga kinubi kama alivyofanya kila siku. Sauli alikuwa ameshika mkuki mkononi. 11Sauli akautupa mkuki, akiwaza, “Nitamchoma Daudi na kumbana ukutani.” Lakini Daudi akamponyoka mara mbili. 12Sauli akamwogopa Daudi, kwa sababu BWANA alikuwa pamoja na Daudi, naye alikuwa amemwacha Sauli. 13Basi Sauli akamwondoa mbele yake, akamfanya kuwa mkuu wa askari elfu. Daudi akaliongoza jeshi katika vita vyake.

14Daudi alifanikiwa katika kila jambo alilofanya, kwa maana BWANA alikuwa pamoja naye. 15Sauli alipoona jinsi Daudi alivyofanikiwa sana, akamhofu mno. 16Lakini Israeli wote na Yuda walimpenda Daudi, kwa sababu ndiye aliyewaongoza katika vita vyao.

17Sauli akamwambia Daudi, “Binti yangu mkubwa Merabu yuko hapa. Nitakupa umwoe. Ila tu uwe shujaa hodari kwa ajili yangu na upigane vita vya BWANA.” Kwa maana Sauli aliwaza, “Sitainua mkono wangu juu yake. Wafilisti ndio watakaofanya hivyo.”

18Daudi akamjibu Sauli, “Mimi ni nani, na jamaa yangu, ukoo wa baba yangu katika Israeli, ni nini, hata niwe mkwe wa mfalme?” 19Lakini wakati ulipofika wa Merabu binti ya Sauli kupewa Daudi, alipewa badala yake Adrieli wa Mehola kuwa mke wake. 20Basi Mikali binti ya Sauli alimpenda Daudi. Sauli alipoambiwa habari hiyo, akapendezwa. 21Sauli aliwaza, “Nitampa awe mke wake ili awe mtego kwake, na Wafilisti wapate kumwua.” Basi Sauli akamwambia Daudi, “Leo umepata nafasi ya pili ya kuwa mkwe wangu.” 22Kisha Sauli akawaagiza maafisa wake, “Zungumzeni na Daudi faraghani, mkamwambie, ‘Mfalme amependezwa nawe, na maafisa wake wote wanakupenda. Sasa ndio wakati wa kuwa mkwe wa mfalme.’” 23Maafisa wa Sauli wakamwambia Daudi maneno hayo. Lakini Daudi akasema, “Mnadhani ni jambo dogo kuwa mkwe wa mfalme? Mimi ni mtu maskini tu, nisiye na cheo.” 24Maafisa wa Sauli wakamwambia, “Hivi ndivyo Daudi alivyosema.”

25Sauli akajibu, “Mwambieni Daudi hivi: ‘Mfalme hataki mahari yoyote ila magovi mia moja ya Wafilisti, ili kulipiza kisasi kwa adui za mfalme.’” Sauli alikuwa akipanga Daudi auawe na Wafilisti. 26Maafisa wake walipomwambia Daudi maneno hayo, Daudi akapendezwa na wazo la kuwa mkwe wa mfalme. Kabla muda haujaisha, 27Daudi akaondoka, akatoka pamoja na watu wake, akawaua Wafilisti mia mbili. Akaleta magovi yao, nayo yakahesabiwa yote kamili mbele ya mfalme, ili Daudi apate kuwa mkwe wa mfalme. Ndipo Sauli akampa binti yake Mikali kuwa mke wake.

28Sauli akaona na kuelewa kwamba BWANA alikuwa pamoja na Daudi, na kwamba binti yake mwenyewe Mikali alimpenda. 29Sauli akazidi kumwogopa Daudi, naye Sauli akawa adui wa Daudi maisha yake yote yaliyobaki.

30Majemadari wa Wafilisti waliendelea kutoka kupigana, na kila mara walipotoka, Daudi alifanikiwa kuliko maafisa wengine wote wa Sauli. Hivyo jina lake likaheshimiwa sana.