1 Samweli 15

1Samweli akamwambia Sauli, “Mimi ndiye ambaye BWANA alinituma nikupake mafuta uwe mfalme juu ya watu wake Israeli. Basi sasa sikiliza yale BWANA anayosema.

2BWANA wa majeshi asema hivi: Nimeyaangalia yale Amaleki aliyowatendea Israeli, jinsi walivyowapinga Israeli njiani walipopanda kutoka Misri. 3Sasa nenda ukawapige Waamaleki. Viweke wakfu kwa maangamizi vyote walivyo navyo, wala usiwahurumie. Waue wanaume na wanawake, watoto na wachanga wanaonyonya, ng’ombe na kondoo, ngamia na punda.”

4Basi Sauli akaliita jeshi akalihesabu huko Telaimu: askari wa miguu laki mbili, na watu elfu kumi wa Yuda. 5Sauli akasonga mpaka mji wa Amaleki, akaweka waviziaji bondeni. 6Sauli akawaambia Wakeni, “Nendeni, ondokeni, jitengeni na Waamaleki, la sivyo nitawafagilia mbali pamoja nao. Kwa maana ninyi mliwatendea Waisraeli wote fadhili walipopanda kutoka Misri.” Basi Wakeni wakaondoka kutoka kati ya Waamaleki. 7Kisha Sauli akawapiga Waamaleki tangu Havila mpaka Shuri, ulio mashariki ya Misri. 8Akamteka Agagi mfalme wa Amaleki akiwa hai, na watu wote akawaweka wakfu kwa maangamizi kwa upanga. 9Lakini Sauli na askari wakamwacha Agagi hai. Wakawaacha pia kondoo na ng’ombe walio bora, wanyama walionona na wana-kondoo, na kila kitu kilichokuwa kizuri. Hawakutaka kuviweka wakfu kwa maangamizi. Kila kitu kilichokuwa duni na kisichofaa ndicho walichokiweka wakfu kwa maangamizi.

10Kisha neno la BWANA likamjia Samweli: 11“Ninajuta kwamba nilimfanya Sauli kuwa mfalme, kwa sababu ameacha kunifuata na hakutimiza amri zangu.” Samweli akakasirika, akamlilia BWANA usiku kucha. 12Samweli akaamka asubuhi na mapema ili kwenda kumlaki Sauli, na Samweli akaambiwa, “Sauli alikwenda Karmeli akajisimamishia mnara wa ukumbusho huko. Kisha akageuka akaendelea kushuka mpaka Gilgali.” 13Samweli alipomfikia Sauli, Sauli akamsalimu, “BWANA na akubariki! Nimeitimiza amri ya BWANA.” 14Samweli akajibu, “Basi ni nini mlio huu wa kondoo unaojaa masikioni mwangu, na mlio wa ng’ombe ninaousikia?” 15Sauli akajibu, “Wamewaleta kutoka kwa Waamaleki. Askari waliwabakiza kondoo na ng’ombe walio bora ili wawe dhabihu kwa BWANA Mungu wako, na vingine vyote tumeviweka wakfu kwa maangamizi.”

16Samweli akamwambia Sauli, “Inatosha! Niache nikuambie yale BWANA aliyoniambia usiku.” Sauli akajibu, “Endelea.”

17Samweli akasema, “Hata kama ulijiona mdogo machoni pako, je, wewe si kichwa juu ya makabila ya Israeli? BWANA alikupaka mafuta uwe mfalme wa Israeli. 18BWANA alikutuma kwa kazi maalumu akasema, ‘Nenda ukawaweke wakfu kwa maangamizi wale wenye dhambi, Waamaleki. Pigana nao mpaka uwafutilie mbali.’ 19Kwa nini hukuitii sauti ya BWANA? Kwa nini ulizirukia nyara na kutenda yaliyo maovu machoni pa BWANA?”

20Sauli akamwambia Samweli, “Lakini nimeitii sauti ya BWANA! Nilikwenda kwa kazi ile ambayo BWANA alinituma. Nimemrudisha Agagi mfalme wa Amaleki, na Waamaleki nimewaweka wakfu kwa maangamizi. 21Katika nyara, askari walichukua kondoo na ng’ombe, walio bora kabisa kati ya vile vilivyowekwa wakfu kwa maangamizi, ili wamtolee dhabihu BWANA Mungu wako huko Gilgali.” 22Samweli akasema, “Je, BWANA hupendezwa na sadaka za kuteketezwa na dhabihu kama anavyopendezwa na kuitii sauti ya BWANA? Tazama, kutii ni bora kuliko dhabihu, na kusikiliza ni bora kuliko mafuta ya kondoo dume. 23Kwa maana uasi ni dhambi kama uaguzi, na kiburi ni kama uovu na sanamu za miungu ya nyumbani. Umelikataa neno la BWANA, kwa hiyo naye amekukataa usiwe mfalme.”

24Ndipo Sauli akamwambia Samweli, “Nimetenda dhambi. Nimevunja amri ya BWANA na maagizo yako, kwa sababu niliwaogopa askari nikakubali walichosema. 25Sasa tafadhali nisamehe dhambi yangu, urudi pamoja nami ili nimwabudu BWANA.” 26Lakini Samweli akamwambia Sauli, “Sitarudi pamoja nawe. Umelikataa neno la BWANA, na BWANA amekukataa usiwe mfalme juu ya Israeli.”

27Samweli alipogeuka kuondoka, Sauli akashika pindo la joho lake, nalo likararuka. 28Ndipo Samweli akamwambia, “Leo BWANA ameurarua ufalme wa Israeli kutoka kwako, naye ameutoa kwa mmoja wa jirani zako, aliye bora kuliko wewe. 29Zaidi ya hayo, Utukufu wa Israeli hasemi uongo wala habadili nia yake, kwa maana yeye si mwanadamu hata abadili nia yake.” 30Sauli akasema, “Nimetenda dhambi. Lakini tafadhali uniheshimu sasa mbele ya wazee wa watu wangu na mbele ya Israeli. Rudi pamoja nami, niruhusu nimwabudu BWANA Mungu wako.” 31Basi Samweli akarudi pamoja na Sauli, na Sauli akamwabudu BWANA.

32Kisha Samweli akasema, “Nileteeni hapa Agagi mfalme wa Amaleki.” Agagi akamwendea kwa kujiamini, akasema, “Hakika uchungu wa kifo umepita.”

33Lakini Samweli akasema, “Kama upanga wako ulivyowanyang’anya wanawake watoto wao, ndivyo mama yako atakavyonyang’anywa mtoto wake kati ya wanawake.” Na Samweli akamkatakata Agagi vipande vipande mbele za BWANA huko Gilgali.

34Kisha Samweli akaenda Rama, na Sauli akapanda kwenda nyumbani kwake huko Gibea ya Sauli. 35Samweli hakwenda kumwona Sauli tena mpaka siku alipokufa, ingawa Samweli alimhuzunikia Sauli. Na BWANA akajuta kwa kumfanya Sauli kuwa mfalme juu ya Israeli.