1 Samweli 2

1Kisha Hana akaomba, akasema: “Moyo wangu unafurahi ndani ya BWANA; ndani ya BWANA pembe yangu imeinuliwa juu. Ninajivuna kwa sauti juu ya adui zangu, kwa sababu ninashangilia wokovu wako. 2Hakuna aliye mtakatifu kama BWANA; hakika, hakuna mwingine ila wewe, wala hakuna mwamba ulio kama Mungu wetu. 3Msiendelee kusema kwa majivuno hivyo, wala maneno ya kiburi yasitoke midomoni mwenu, kwa maana BWANA ni Mungu ajuaye mambo yote, naye hupima kila tendo. 4Pinde za mashujaa zimevunjwa, na wale waliojikwaa wamevikwa nguvu. 5Wale waliokuwa wameshiba wanajiajiri kwa ajili ya mkate, lakini wenye njaa hawaoni njaa tena. Mwanamke asiye na watoto anazaa saba, lakini mama wa wana wengi anafifia. 6BWANA huleta kifo na hutoa uzima; huwashusha Kuzimu na kuwapandisha tena. 7BWANA huwafanya wengine maskini na wengine matajiri; huwanyenyekeza, na pia huwakweza. 8Humwinua maskini kutoka mavumbini na kumpandisha mhitaji kutoka jaani, ili awakalishe pamoja na wakuu na kuwapa kiti cha heshima kiwe chao. Kwa maana nguzo za dunia ni mali ya BWANA; juu yake ameuweka ulimwengu. 9Huzilinda hatua za waaminifu wake, lakini waovu hunyamazishwa gizani, kwa maana hakuna mtu ashindaye kwa nguvu. 10Wale wanaompinga BWANA watavunjwa vipande vipande; atanguruma juu yao kutoka mbinguni. BWANA atahukumu miisho ya dunia; atampa mfalme wake nguvu na kuiinua juu pembe ya mpakwa mafuta wake.”

11Kisha Elkana akaenda nyumbani Rama, lakini mtoto akabaki akimtumikia BWANA chini ya Eli kuhani. 12Basi wana wa Eli walikuwa watu wasiofaa kitu; hawakumjua BWANA. 13Basi hii ndiyo iliyokuwa desturi ya makuhani kwa watu: kila mtu alipotoa dhabihu, mtumishi wa kuhani alikuja nyama ilipokuwa ikichemka, akiwa amebeba uma wenye meno matatu, 14naye aliuchomeka ndani ya kikaango au birika au sufuria au chungu. Chochote ambacho uma ulipandisha, kuhani alijichukulia. Ndivyo walivyowatendea Waisraeli wote waliokuja huko Shilo. 15Zaidi ya hayo, hata kabla mafuta hayajateketezwa yakawa moshi, mtumishi wa kuhani alikuja na kumwambia mtu aliyekuwa akitoa dhabihu, “Lete nyama kuhani aichome. Hatakubali kwako nyama iliyochemshwa, ila mbichi tu.” 16Kama mtu yule alijibu, “Mafuta yateketezwe kwanza yawe moshi, kisha uchukue chochote unachotaka,” yule mtumishi angesema, “Hapana, toa sasa hivi. Usipotoa, nitachukua kwa nguvu.” 17Kwa hiyo dhambi ya vijana hao ilikuwa kubwa mno machoni pa BWANA, kwa sababu walidharau sadaka ya BWANA. 18Wakati huo Samweli alikuwa akihudumu mbele za BWANA, mtoto aliyevaa efodi ya kitani. 19Kila mwaka mama yake alimshonea kanzu ndogo na kumletea alipopanda pamoja na mumewe kwa ajili ya dhabihu ya mwaka. 20Eli aliwabariki Elkana na mkewe akisema, “BWANA na akupe watoto kwa mwanamke huyu, wachukue nafasi ya yule aliyemwomba na kumtoa kwa BWANA.” Kisha walirudi nyumbani. 21BWANA akamsaidia Hana: akapata mimba, akazaa wana watatu na binti wawili. Wakati huo wote mtoto Samweli alikuwa akikua mbele za BWANA.

22Eli sasa alikuwa mzee sana. Aliendelea kusikia yote ambayo wanawe walikuwa wakiwatendea Israeli wote, na kwamba walilala na wanawake waliohudumu mlangoni pa Hema la Kukutania. 23Akawaambia, “Kwa nini mnafanya mambo haya? Ninaendelea kusikia kutoka kwa watu wote habari za maovu mnayoyatenda. 24Hapana, wanangu! Habari ninazosikia zikienea kati ya watu wa BWANA si nzuri. 25Mtu mmoja akimkosea mwingine, Mungu anaweza kulisuluhisha jambo hilo; lakini mtu akimkosea BWANA, ni nani awezaye kumtetea?” Lakini hawakumsikiliza baba yao, kwa sababu BWANA alikuwa ameamua kuwaua. 26Wakati huo mtoto Samweli aliendelea kukua, naye BWANA na watu wakapendezwa naye.

27Mtu wa Mungu akamjia Eli, akamwambia, “BWANA asema hivi: ‘Je, sikujifunua waziwazi kwa jamaa ya babu yako walipokuwa Misri, chini ya nyumba ya Farao? 28Je, sikumchagua kutoka katika makabila yote ya Israeli awe kuhani wangu, apande juu ya madhabahu yangu, afukize uvumba na kuvaa efodi mbele yangu? Nami nikaipa jamaa ya babu yako sadaka zote za chakula za Waisraeli. 29Kwa nini mnazipiga teke dhabihu na sadaka zangu, nilizoziamuru kwa ajili ya maskani yangu? Kwa nini unawaheshimu wanao kuliko mimi, mkijinenepesha kwa sehemu bora za kila sadaka inayotolewa na Israeli, watu wangu? 30Kwa hiyo BWANA, Mungu wa Israeli, asema: Kweli niliahidi kwamba jamaa yako na jamaa ya babu yako wangetembea mbele yangu milele. Lakini sasa BWANA asema: Hilo halitakuwa kamwe! Kwa maana nitawaheshimu wanaoniheshimu, na wanaonidharau watahesabiwa kuwa si kitu. 31Wakati unakuja nitakapozivunja nguvu zako na nguvu za jamaa ya babu yako, ili mtu yeyote katika jamaa yako asiishi mpaka uzee. 32Utaona dhiki katika maskani yangu, hata wakati Israeli inapopewa kila jambo jema, na hakuna mtu katika jamaa yako atakayeishi mpaka uzee kamwe. 33Hata hivyo mmoja wa wazao wako sitamkatilia mbali asihudumu katika madhabahu yangu, ili macho yako yafifie kwa kulia na moyo wako uhuzunike. Wazao wako wengine wote watakufa wakiwa katika ujana wao. 34Kitakachowapata wana wako wawili, Hofni na Finehasi, kitakuwa ishara kwako: wote wawili watakufa siku moja. 35Nitajiinulia kuhani mwaminifu, atakayetenda yaliyo moyoni na akilini mwangu. Nitamjengea nyumba ya kudumu, naye atatembea mbele ya mpakwa mafuta wangu siku zote. 36Kisha kila mtu atakayebaki katika jamaa yako atakuja kumsujudia ili apate fedha kidogo na mkate mmoja, na kusema, “Tafadhali nipe nafasi katika mojawapo ya kazi za ukuhani ili nipate kipande cha mkate cha kula.”’”