1 Samweli 16

1BWANA alimwambia Samweli, “Utaendelea kumwombolezea Sauli mpaka lini, hali mimi nimemkataa asiwe mfalme juu ya Israeli? Jaza pembe yako mafuta, uondoke. Ninakutuma kwa Yese wa Bethlehemu, kwa sababu nimemchagua mmoja wa wanawe awe mfalme kwa ajili yangu.” 2Samweli akasema, “Nitawezaje kwenda? Sauli atasikia habari hiyo, na ataniua.” BWANA akasema, “Chukua ng’ombe jike mchanga pamoja nawe, useme, ‘Nimekuja kumtolea BWANA dhabihu.’ 3Mwalike Yese kwenye dhabihu, nami nitakuonyesha la kufanya. Utampaka mafuta kwa ajili yangu yule nitakayekutajia.” 4Samweli akafanya kama BWANA alivyosema, akaenda Bethlehemu. Wazee wa mji wakatoka kumlaki wakitetemeka, wakamwuliza, “Je, umekuja kwa amani?” 5Akasema, “Kwa amani. Nimekuja kumtolea BWANA dhabihu. Jitakaseni, mje pamoja nami kwenye dhabihu.” Akamtakasa Yese na wanawe, akawaalika kwenye dhabihu. 6Walipofika, Samweli akamwona Eliabu, akawaza, “Hakika mfalme wake aliyempaka mafuta amesimama hapa mbele ya BWANA!” 7Lakini BWANA akamwambia Samweli, “Usijali sura yake wala urefu wake, kwa sababu nimemkataa. BWANA haoni kama mwanadamu aonavyo. Mwanadamu hutazama kile kinachoonekana kwa macho, lakini BWANA hutazama moyo.” 8Kisha Yese akamwita Abinadabu, akampitisha mbele ya Samweli. Lakini Samweli akasema, “Huyu naye BWANA hakumchagua.” 9Kisha Yese akampitisha Shama. Lakini Samweli akasema, “Huyu naye BWANA hakumchagua.” 10Yese akawapitisha wanawe saba mbele ya Samweli, lakini Samweli akamwambia Yese, “BWANA hakumchagua yeyote kati ya hawa.” 11Kisha Samweli akamwuliza Yese, “Je, hawa ndio vijana wako wote?” Yese akajibu, “Bado yupo mdogo kuliko wote. Yuko nje anachunga kondoo.” Samweli akamwambia Yese, “Mtumie mtu amlete hapa. Hatutaketi kula mpaka atakapofika.” 12Basi Yese akatuma aletwe ndani. Alikuwa na sura ya afya inayong’aa, macho mazuri, naye alikuwa mzuri wa umbo. Ndipo BWANA akasema, “Inuka umpake mafuta. Huyu ndiye.” 13Basi Samweli akachukua pembe ya mafuta, akampaka mafuta pale katikati ya ndugu zake. Roho wa BWANA akamjia Daudi kwa nguvu tangu siku ile. Kisha Samweli akaondoka, akarudi Rama.

14Basi Roho wa BWANA alikuwa amemwacha Sauli, na roho mbaya kutoka kwa BWANA ikamtesa. 15Maafisa wa Sauli wakamwambia, “Unaona kwamba roho mbaya kutoka kwa Mungu inakutesa. 16Bwana wetu na awaamuru watumishi wako walio hapa mbele yako, nao watamtafuta mtu anayejua kupiga kinubi. Kisha, kila mara roho mbaya kutoka kwa Mungu itakapokujia, atapiga kinubi, nawe utajisikia vizuri.”

17Basi Sauli akawaambia maafisa wake, “Nitafutieni mtu anayepiga vizuri, mmlete kwangu.” 18Mmoja wa vijana akajibu, “Nimemwona mwana wa Yese wa Bethlehemu aliye hodari wa kupiga kinubi. Tena ni shujaa mwenye nguvu na mtu wa vita. Anasema kwa busara, ni mzuri wa sura, na BWANA yu pamoja naye.” 19Basi Sauli akatuma wajumbe kwa Yese na ujumbe huu: “Nitumie Daudi mwanao, yule aliye na kondoo.” 20Basi Yese akachukua punda aliyebebeshwa mikate, pamoja na kiriba cha divai na mwanambuzi, akavipeleka kwa Sauli pamoja na mwanawe Daudi. 21Daudi akafika kwa Sauli, akaanza kumtumikia. Sauli akampenda sana, naye Daudi akawa mbeba silaha wake. 22Kisha Sauli akatuma ujumbe kwa Yese, “Tafadhali mwache Daudi abaki katika utumishi wangu, kwa maana nimependezwa naye sana.” 23Basi kila mara roho kutoka kwa Mungu ilipomjia Sauli, Daudi alichukua kinubi na kukipiga. Ndipo Sauli alipata nafuu na kujisikia vizuri, na ile roho mbaya ikamwacha.