1 Samweli 4

1Neno la Samweli likawafikia Israeli wote. Wakati huo Israeli walitoka kwenda kupigana na Wafilisti. Waisraeli wakapiga kambi Ebenezeri, na Wafilisti wakapiga kambi Afeki. 2Wafilisti wakajipanga kwa vita dhidi ya Israeli, na mapigano yalipoenea, Israeli wakashindwa na Wafilisti. Waliwaua watu wapata elfu nne katika safu za vita huko uwanjani. 3Askari waliporudi kambini, wazee wa Israeli wakasema, “Kwa nini BWANA ametupiga mbele ya Wafilisti leo? Na tulilete sanduku la agano la BWANA kutoka Shilo. Hapo litakuwa kati yetu na kutuokoa na nguvu za adui zetu.” 4Basi watu wakatuma ujumbe Shilo, nao wakalichukua kutoka huko sanduku la agano la BWANA wa majeshi, aketiye juu ya kiti cha enzi kati ya makerubi. Na wana wawili wa Eli, Hofni na Finehasi, waliandamana na sanduku la agano la Mungu. 5Sanduku la agano la BWANA lilipofika kambini, Israeli wote wakapiga kelele kuu hata ardhi ikatetemeka. 6Wafilisti waliposikia sauti ya kelele hizo, wakauliza, “Kelele hizi kuu katika kambi ya Waebrania ni za nini?” Ndipo wakagundua kwamba sanduku la BWANA lilikuwa limeingia kambini. 7Wafilisti wakaogopa, kwa sababu walisema, “Mungu ameingia kambini.” Wakasema, “Ole wetu! Jambo kama hili halijawahi kutokea kamwe. 8Ole wetu! Ni nani atakayetuokoa na nguvu za miungu hii yenye nguvu? Hii ndiyo miungu iliyowapiga Wamisri kwa kila aina ya pigo jangwani. 9Iweni hodari, enyi Wafilisti, mjionyeshe kuwa wanaume, la sivyo mtakuwa watumwa wa Waebrania kama wao walivyokuwa watumwa wenu. Jionyesheni kuwa wanaume, mpigane!” 10Basi Wafilisti wakapigana, na Israeli wakashindwa, na kila mtu akakimbilia nyumbani kwake. Machinjo yalikuwa makubwa sana: askari wa miguu elfu thelathini wa Israeli waliuawa. 11Sanduku la Mungu likatekwa, na wana wote wawili wa Eli, Hofni na Finehasi, wakafa. 12Mtu mmoja wa kabila la Benyamini alikimbia kutoka safu ya vita akafika Shilo siku ile ile. Nguo zake zilikuwa zimeraruka, na kichwani mwake palikuwa na mavumbi. 13Alipofika, Eli alikuwa ameketi kitini mwake kando ya njia akitazama, kwa sababu moyo wake ulitetemeka kwa ajili ya sanduku la Mungu. Yule mtu akaingia mjini kutoa habari, na mji wote ukalia kwa sauti. 14Eli aliposikia sauti ya kilio hicho, akauliza, “Sauti ya ghasia hii ni ya nini?” Yule mtu akaharakisha kwenda kumweleza Eli. 15Eli alikuwa na umri wa miaka tisini na minane, na macho yake yalikuwa yamesimama, hata asiweze kuona. 16Yule mtu akamwambia Eli, “Mimi ndiye niliyetoka vitani. Nimekimbia kutoka safu ya vita leo.” Eli akauliza, “Kumetokea nini, mwanangu?” 17Mjumbe akajibu, “Israeli wamewakimbia Wafilisti, na pamekuwa na machinjo makubwa kati ya askari. Wana wako wawili, Hofni na Finehasi, nao wamekufa, na sanduku la Mungu limetekwa.”

18Mara tu yule mtu alipotaja sanduku la Mungu, Eli akaanguka kitini kwa nyuma kando ya lango. Shingo yake ikavunjika akafa, kwa kuwa alikuwa mzee na mzito. Alikuwa ameiamua Israeli kwa miaka arobaini. 19Basi mkwe wake, mke wa Finehasi, alikuwa mja mzito na karibu kujifungua. Aliposikia habari kwamba sanduku la Mungu limetekwa na kwamba baba mkwe wake na mumewe wamekufa, akainama akajifungua, kwa sababu uchungu wa kuzaa ulimshika ghafla. 20Alipokuwa akifa, wanawake waliosimama karibu naye wakamwambia, “Usiogope; umezaa mtoto wa kiume.” Lakini hakujibu wala hakujali. 21Akampa mtoto jina Ikabodi, akisema, “Utukufu umekwenda uhamishoni kutoka Israeli.” Alisema hivyo kwa sababu sanduku la Mungu lilikuwa limetekwa, na kwa sababu ya baba mkwe wake na mumewe. 22Akasema, “Utukufu umekwenda uhamishoni kutoka Israeli, kwa sababu sanduku la Mungu limetekwa.”