1 Samweli 27

1Lakini Daudi akajisemea moyoni, “Siku moja Sauli ataniangamiza. Jambo bora kwangu ni kukimbilia upesi nchi ya Wafilisti. Ndipo Sauli ataacha kunitafuta popote katika nchi ya Israeli, nami nitakuwa mbali na mkono wake.” 2Basi Daudi akaondoka, akavuka pamoja na wale watu mia sita waliokuwa pamoja naye, akaenda kwa Akishi mwana wa Maoki, mfalme wa Gathi. 3Daudi na watu wake wakakaa na Akishi huko Gathi, kila mtu na jamaa yake. Daudi alikuwa na wake zake wawili, Ahinoamu wa Yezreeli na Abigaili wa Karmeli, mjane wa Nabali. 4Habari ilipomfikia Sauli kwamba Daudi amekimbilia Gathi, akaacha kumtafuta.

5Kisha Daudi akamwambia Akishi, “Ikiwa nimepata kibali kwako, tafadhali nipewe mahali katika mmoja wa miji ya mashambani, nikae huko. Kwa nini mtumishi wako akae katika mji wa kifalme pamoja nawe?” 6Basi siku ile Akishi akampa Siklagi. Ndiyo sababu Siklagi umekuwa mali ya wafalme wa Yuda mpaka leo.

7Daudi aliishi katika nchi ya Wafilisti kwa mwaka mmoja na miezi minne. 8Daudi na watu wake walikuwa wakipanda na kuwavamia Wageshuri, Wagizri na Waamaleki. Watu hao waliishi katika nchi hiyo tangu zamani za kale, katika eneo linaloenea kuelekea Shuri mpaka nchi ya Misri. 9Kila mara Daudi alipolishambulia eneo, hakumwacha hai mwanamume wala mwanamke. Alichukua kondoo, ng’ombe, punda, ngamia na mavazi, kisha akarudi kwa Akishi. 10Akishi alipouliza, “Je, leo hamkwenda kuvamia?” Daudi alijibu, “Tulivamia Negebu ya Yuda,” au “Negebu ya Wayerameeli,” au “Negebu ya Wakeni.” 11Daudi hakumwacha hai mwanamume wala mwanamke wa kuletwa Gathi, kwa maana aliwaza, “Wangeweza kutuchongea na kusema, ‘Hivi ndivyo Daudi alivyofanya.’” Hiyo ndiyo ilikuwa desturi yake muda wote alioishi katika nchi ya Wafilisti. 12Akishi akamwamini Daudi, akawaza, “Amejifanya kuchukiwa kabisa na watu wake mwenyewe, Waisraeli, kwa hiyo atakuwa mtumishi wangu maisha yake yote.”