1 Samweli 29

1Wafilisti wakakusanya majeshi yao yote huko Afeki, nao Israeli walikuwa wamepiga kambi karibu na chemchemi iliyoko Yezreeli. 2Wakuu wa Wafilisti walipokuwa wakipita na vikosi vyao vya mamia na maelfu, Daudi na watu wake walikuwa wakitembea nyuma pamoja na Akishi. 3Majemadari wa Wafilisti wakauliza, “Waebrania hawa wanafanya nini hapa?” Akishi akawajibu majemadari wa Wafilisti, “Je, huyu si Daudi, mtumishi wa Sauli mfalme wa Israeli? Amekuwa pamoja nami kwa muda sasa, mwaka mmoja au zaidi, na tangu siku alipohamia kwangu mpaka leo sijaona kosa lolote kwake.”

4Lakini majemadari wa Wafilisti wakamkasirikia Akishi, wakamwambia, “Mrudishe mtu huyu! Arudi mahali ulipomweka. Asishuke pamoja nasi vitani, la sivyo atatugeuka vita vikianza. Mtu huyu angewezaje kupata tena kibali cha bwana wake? Hakika ni kwa vichwa vya watu walio hapa! 5Je, huyu si yule Daudi waliyemwimba wakijibizana walipokuwa wakicheza, ‘Sauli amewapiga maelfu yake, na Daudi makumi ya maelfu yake’?”

6Basi Akishi akamwita Daudi, akamwambia, “Kama BWANA aishivyo, umekuwa mwaminifu, nami ningefurahi kutoka na kurudi pamoja nawe katika jeshi. Sijaona kosa lolote kwako tangu siku ulipokuja kwangu mpaka leo. Lakini wakuu hawakukubali. 7Basi sasa rudi, uende kwa amani. Usifanye lolote litakalowachukiza wakuu wa Wafilisti.”

8Daudi akamwambia Akishi, “Lakini nimefanya nini? Umeona kosa gani kwa mtumishi wako tangu siku nilipoingia katika utumishi wako mpaka sasa, hata nisiende kupigana na adui za bwana wangu mfalme?” 9Akishi akamjibu Daudi, “Ninajua kwamba wewe ni mwema machoni pangu kama malaika wa Mungu. Lakini majemadari wa Wafilisti wamesema, ‘Asipande pamoja nasi vitani.’ 10Basi amka asubuhi na mapema, wewe na watumishi wa bwana wako waliokuja pamoja nawe. Ondokeni asubuhi na mapema, na kukishapambazuka, nendeni zenu.” 11Basi Daudi na watu wake wakaamka mapema ili kuondoka asubuhi na kurudi katika nchi ya Wafilisti, nao Wafilisti wakapanda kwenda Yezreeli.