1 Samweli 28

1Siku zile Wafilisti wakakusanya majeshi yao kwa vita, ili kupigana na Israeli. Akishi akamwambia Daudi, “Elewa hili waziwazi: wewe na watu wako mtatoka pamoja nami vitani, katika jeshi langu.” 2Daudi akamjibu Akishi, “Vyema, utajionea mwenyewe atakalofanya mtumishi wako.” Akishi akamwambia Daudi, “Vyema, nitakufanya mlinzi wangu maisha yako yote.”

3Samweli alikuwa amekwisha kufa. Israeli wote walikuwa wamemwombolezea, nao walikuwa wamemzika Rama, mji wake mwenyewe. Naye Sauli alikuwa amewaondoa katika nchi wanaowaita wafu na wapiga ramli. 4Wafilisti wakakusanyika, wakaja, wakapiga kambi Shunemu, naye Sauli akawakusanya Israeli wote, wakapiga kambi Gilboa. 5Sauli alipoliona jeshi la Wafilisti, akaogopa, na moyo wake ukatetemeka mno. 6Sauli akamwuliza BWANA, lakini BWANA hakumjibu, iwe kwa ndoto, au kwa Urimu, au kwa manabii. 7Sauli akawaambia watumishi wake, “Nitafutieni mwanamke anayewaita wafu, ili niende nikaulize kupitia kwake.” Watumishi wake wakamjibu, “Yuko mwanamke huko Endori anayewaita wafu.” 8Basi Sauli akajibadilisha kwa kuvaa mavazi mengine, akaondoka pamoja na watu wawili. Wakafika kwa yule mwanamke usiku, akamwambia, “Tafadhali uulize mzimu kwa ajili yangu, unipandishie yule nitakayekutajia.” 9Lakini mwanamke akamwambia, “Hakika unajua alichofanya Sauli, jinsi alivyowakatilia mbali katika nchi wanaowaita wafu na wapiga ramli. Kwa nini basi unanitegea mtego ili niuawe?” 10Sauli akamwapia kwa BWANA: “Kama BWANA aishivyo, hutapata adhabu yoyote kwa jambo hili.” 11Kisha mwanamke akauliza, “Nikupandishie nani?” Akasema, “Nipandishie Samweli.” 12Mwanamke alipomwona Samweli, akapiga yowe, akamwambia Sauli, “Kwa nini umenidanganya? Wewe ni Sauli!” 13Mfalme akamwambia, “Usiogope. Unaona nini?” Mwanamke akamjibu Sauli, “Ninaona kiumbe wa kimungu akipanda kutoka ardhini.” 14Akamwuliza, “Anaonekanaje?” Akasema, “Mzee anapanda, naye amejifunika joho.” Ndipo Sauli akajua kwamba ni Samweli. Akainama sana, uso wake hadi chini, akalala kifudifudi mbele yake.

15Samweli akamwuliza Sauli, “Kwa nini umenisumbua na kunipandisha?” Sauli akajibu, “Niko katika taabu kubwa. Wafilisti wanapigana nami, na Mungu ameniacha, wala hanijibu tena, iwe kupitia manabii au kwa ndoto. Ndiyo sababu nimekuita, ili uniambie ninalopaswa kufanya.”

16Samweli akasema, “Basi kwa nini uniulize mimi, wakati BWANA amekuacha na kuwa adui yako? 17BWANA amefanya kwa ajili yake mwenyewe kile hasa alichosema kupitia kwangu. BWANA ameurarua ufalme kutoka mkononi mwako, akampa jirani yako, Daudi. 18Kwa sababu hukumtii BWANA, wala hukutekeleza hasira yake kali juu ya Amaleki, BWANA amekutendea jambo hili leo. 19BWANA atawatia pia Israeli mikononi mwa Wafilisti pamoja nawe. Kesho wewe na wanao mtakuwa pamoja nami. BWANA atalitia jeshi la Israeli mikononi mwa Wafilisti vilevile.” 20Mara Sauli akaanguka chini kwa urefu wake wote, akiwa ameogopa sana kwa maneno ya Samweli. Hakubaki na nguvu yoyote, kwa sababu hakuwa amekula chochote mchana ule wote na usiku ule wote. 21Mwanamke akaja kwa Sauli, akaona kwamba amefadhaika sana, akamwambia, “Tazama, mtumishi wako amefanya ulichoomba. Nimeyahatarisha maisha yangu na kufanya ulichoniambia. 22Basi sasa, tafadhali nawe msikilize mtumishi wako. Niache nikuwekee chakula kidogo mbele yako. Ule, ili upate nguvu utakapoendelea na safari yako.” 23Akakataa, akasema, “Sitakula.” Lakini watumishi wake pamoja na yule mwanamke wakamsihi sana, naye akawasikiliza. Akainuka kutoka ardhini, akaketi kitandani. 24Mwanamke alikuwa na ndama aliyenenepeshwa nyumbani, akamchinja upesi. Akachukua unga, akaukanda, akaoka mikate isiyotiwa chachu. 25Akaviweka mbele ya Sauli na watumishi wake, nao wakala. Kisha wakainuka, wakaondoka usiku ule ule.