1 Samweli 24

1Sauli aliporudi kutoka kuwafuatia Wafilisti, akaletewa habari: “Daudi yuko katika nyika ya En-gedi.”

2Basi Sauli akachukua watu 3,000 waliochaguliwa katika Israeli yote, akaenda kumtafuta Daudi na watu wake upande wa mashariki wa Miamba ya Mbuzi-mwitu. 3Akafika kwenye mazizi ya kondoo kando ya njia. Palikuwa na pango pale, naye Sauli akaingia kujisaidia, wakati Daudi na watu wake walikuwa wameketi ndani kabisa ya pango. 4Watu wa Daudi wakamwambia, “Hii ndiyo siku ambayo BWANA alisema habari zake alipokuambia, ‘Nitamtia adui yako mikononi mwako, nawe utamtendea lolote unaloona kuwa jema.’” Ndipo Daudi akainuka, akakata kimya kimya pindo la joho la Sauli. 5Baadaye dhamiri ya Daudi ikamsumbua kwa sababu alikuwa amekata pindo la joho la Sauli.

6Akawaambia watu wake, “BWANA apishe mbali nisimtendee bwana wangu jambo hili, yeye mfalme wa BWANA aliyempaka mafuta, na kuinua mkono wangu juu yake! Yeye ni mfalme wa BWANA aliyempaka mafuta.” 7Kwa maneno hayo Daudi akawazuia watu wake, wala hakuwaruhusu wamshambulie Sauli. Sauli akainuka, akatoka pangoni, akaenda zake.

8Baadaye Daudi naye akainuka, akatoka pangoni, akamwita Sauli kwa sauti, “Bwana wangu mfalme!” Sauli alipotazama nyuma, Daudi akainama uso wake hadi chini, akasujudu mbele yake.

9Daudi akamwambia Sauli, “Kwa nini unawasikiliza watu wanaposema, ‘Daudi anataka kukudhuru’? 10Leo umeona kwa macho yako mwenyewe jinsi BWANA alivyokutia mikononi mwangu pangoni. Nilihimizwa nikuue, lakini nilikuhurumia. Nilisema, ‘Sitainua mkono wangu juu ya bwana wangu, kwa sababu yeye ni mfalme wa BWANA aliyempaka mafuta.’ 11Baba yangu, tazama! Tazama pindo la joho lako hapa mkononi mwangu! Nilikata pindo la joho lako, lakini sikukuua. Kwa hili ujue hakika kwamba sina nia ya kukudhuru wala kukuasi. Sijakukosea, lakini wewe unaniwinda ili kuniondolea uhai wangu. 12BWANA na ahukumu kati yetu, na BWANA na alipize ubaya ulionitendea. Lakini mimi sitainua mkono wangu juu yako. 13Kama isemavyo methali ya zamani, ‘Uovu hutoka kwa waovu.’ Lakini mkono wangu hautakuwa juu yako. 14Mfalme wa Israeli ametoka kumfukuza nani? Unamfuatia nani? Mbwa mfu! Kiroboto mmoja tu! 15BWANA na awe mwamuzi, aamue kati yako na mimi. Yeye na aone jambo hili, aitetee kesi yangu na kuniokoa kutoka mikononi mwako kwa kunipa haki.”

16Daudi alipomaliza kumwambia Sauli maneno hayo, Sauli akasema, “Je, hiyo ni sauti yako, Daudi mwanangu?” Sauli akalia kwa sauti. 17Akamwambia Daudi, “Wewe ni mwenye haki kuliko mimi. Umenilipa mema, hali mimi nimekulipa mabaya. 18Leo umeonyesha jinsi ulivyonitendea vyema: BWANA alinitia mikononi mwako, nawe hukuniua. 19Ni nani aliyewahi kumpata adui yake na kumwacha aende zake salama? BWANA na akulipe mema kwa jinsi ulivyonitendea leo. 20Sasa ninajua kwamba hakika utakuwa mfalme, na kwamba ufalme wa Israeli utaimarishwa mikononi mwako. 21Basi sasa niapie kwa BWANA kwamba hutawaangamiza wazao wangu baada yangu, wala hutalifuta jina langu katika jamaa ya baba yangu.” 22Basi Daudi akamwapia Sauli. Kisha Sauli akarudi nyumbani, naye Daudi na watu wake wakapanda kwenda ngomeni.