1 Samweli 17

1Wafilisti walikusanya majeshi yao kwa ajili ya vita. Wakakusanyika Soko katika Yuda, wakapiga kambi Efes-damimu, kati ya Soko na Azeka. 2Sauli na watu wa Israeli nao wakakusanyika. Wakapiga kambi katika Bonde la Ela, wakajipanga kwa vita wakiwakabili Wafilisti. 3Wafilisti walishika mlima upande mmoja, na Israeli walishika mlima upande mwingine, na bonde likiwa katikati yao. 4Kisha bingwa mmoja akatoka katika kambi ya Wafilisti. Jina lake lilikuwa Goliathi, naye alitoka Gathi. Urefu wake ulikuwa karibu mita 2.9. 5Alikuwa na kofia ya chuma ya shaba kichwani, naye alivaa dirii ya magamba ya shaba yenye uzito wa karibu kilo 57. 6Miguu yake ilikuwa imefunikwa kwa vilinda-miguu vya shaba, na mkuki mfupi wa shaba ulikuwa mgongoni mwake. 7Mti wa mkuki wake ulikuwa kama boriti ya mfumaji, na ncha yake ya chuma ilikuwa na uzito wa karibu kilo 7. Mtu aliyembebea ngao alitembea mbele yake. 8Akasimama, akazipigia kelele safu za Israeli, “Kwa nini mmetoka kujipanga kwa vita? Mimi ni yule Mfilisti, nanyi ni watumishi wa Sauli, sivyo? Jichagulieni mtu, aje chini kwangu. 9Akiweza kupigana nami na kuniua, sisi tutakuwa watumwa wenu. Lakini nikimshinda na kumwua, ninyi mtakuwa watumwa wetu na kututumikia.” 10Mfilisti akasema, “Leo ninazitukana safu za Israeli! Nipeni mtu, tupigane sisi wawili.” 11Sauli na Israeli wote waliposikia maneno ya Mfilisti, walivunjika moyo na kuogopa mno.

12Basi Daudi alikuwa mwana wa yule Mwefrathi wa Bethlehemu katika Yuda, aitwaye Yese. Yese alikuwa na wana wanane, na wakati wa Sauli alikuwa tayari mzee mwenye umri mkubwa. 13Wana watatu wakubwa wa Yese walikuwa wamemfuata Sauli vitani. Majina ya hao watatu waliokwenda vitani yalikuwa Eliabu mzaliwa wa kwanza, Abinadabu wa pili, na Shama wa tatu. 14Daudi alikuwa mdogo kuliko wote, na wale watatu wakubwa walikuwa wamemfuata Sauli.

15Daudi alikuwa akienda na kurudi kati ya utumishi wa Sauli na kuchunga kondoo wa baba yake huko Bethlehemu. 16Wakati huo Mfilisti alijitokeza kila asubuhi na jioni, akasimama mahali pake kwa siku arobaini.

17Yese akamwambia mwanawe Daudi, “Tafadhali chukua karibu lita 22 ya nafaka iliyokaangwa na mikate hii kumi kwa ajili ya ndugu zako, uharakishe kuvipeleka kambini kwa ndugu zako. 18Pia mpelekee kamanda wa kikosi chao jibini hizi kumi. Uone hali ya ndugu zako ilivyo, ukalete ishara fulani kutoka kwao.” 19Sauli alikuwa katika Bonde la Ela pamoja na ndugu hao na watu wote wa Israeli, wakiwa vitani na Wafilisti. 20Daudi akaamka asubuhi na mapema, akawaacha kondoo kwa mtu wa kuwalinda, akabeba vyakula, akaondoka kama Yese alivyomwagiza. Akafika kambini wakati jeshi lilipokuwa likitoka kwenda kwenye nafasi zake za vita, likipiga kelele za vita. 21Israeli na Wafilisti wakajipanga, safu ya vita ikiikabili safu ya vita. 22Daudi akamwachia mlinzi wa vyakula mzigo wake, akakimbia kwenye safu ya vita, akaenda kuwasalimu ndugu zake na kuwauliza hali yao. 23Alipokuwa akizungumza nao, yule bingwa, Mfilisti wa Gathi aitwaye Goliathi, akapanda kutoka katika safu za Wafilisti, akasema maneno yale yale ya mwanzo, naye Daudi akayasikia. 24Kila mara watu wa Israeli walipomwona mtu huyo, wote walimkimbia kwa hofu kuu. 25Watu wa Israeli walikuwa wakisema, “Mmemwona mtu huyu anayepanda? Anapanda ili kuwatukana Israeli! Mfalme atampa utajiri mwingi mtu atakayemwua. Atampa pia binti yake, na ataifanya jamaa ya baba yake kuwa huru katika Israeli.” 26Daudi akawauliza watu waliosimama karibu naye, “Atafanyiwa nini mtu atakayemwua Mfilisti huyu na kuiondoa aibu ya Israeli? Mfilisti huyu asiyetahiriwa ni nani, hata athubutu kuzitukana safu za Mungu aliye hai?” 27Askari wakamrudishia maneno yale yale: “Hivi ndivyo atakavyofanyiwa mtu atakayemwua.” 28Eliabu, ndugu yake mkubwa, alipomsikia akizungumza na wale watu, alimkasirikia Daudi, akasema, “Kwa nini umeshuka huku? Wale kondoo wachache kule nyikani umemwachia nani? Ninakijua kiburi chako na uovu wa moyo wako. Umeshuka tu ili uone vita!” 29Daudi akasema, “Nimefanya nini sasa? Je, siwezi hata kuuliza swali?” 30Akamwacha, akamgeukia mtu mwingine na kuuliza jambo lile lile, nao askari wakampa jibu lile lile la kwanza. 31Maneno aliyosema Daudi yakasikiwa na kuripotiwa kwa Sauli, naye Sauli akatuma aitwe. 32Daudi akamwambia Sauli, “Mtu yeyote asife moyo kwa sababu ya mtu huyu! Mtumishi wako atakwenda kupigana na Mfilisti huyu.” 33Sauli akamjibu Daudi, “Huwezi kwenda kupambana na Mfilisti huyu na kupigana naye. Wewe ni kijana tu, naye amefunzwa vita tangu ujana wake.”

34Lakini Daudi akamwambia Sauli, “Mtumishi wako amekuwa akichunga kondoo wa baba yake, na kila mara simba au dubu alipokuja na kumnyakua kondoo kundini, 35Nilimfuatia, nikampiga, nikamwokoa kondoo kinywani mwake. Akinigeukia, nilimkamata taya, nikampiga, nikamwua. 36Simba na dubu, mtumishi wako amewaua wote, na Mfilisti huyu asiyetahiriwa atakuwa kama mmoja wao, kwa kuwa amezitukana safu za Mungu aliye hai.”

37Daudi akaendelea, “BWANA aliniokoa katika nguvu za simba na za dubu, na yeye ataniokoa katika nguvu za Mfilisti huyu.” Ndipo Sauli akamwambia Daudi, “Nenda. BWANA na awe pamoja nawe.” 38Sauli akamvika Daudi mavazi yake mwenyewe ya vita. Akamvika kofia ya chuma ya shaba kichwani, akamvalisha dirii. 39Daudi akaufunga upanga wa Sauli juu ya mavazi hayo, akajaribu kutembea, kwa kuwa hakuwahi kuvaa vitu kama hivyo. Kisha akamwambia Sauli, “Siwezi kutembea na vitu hivi vyote; sijavizoea.” Basi Daudi akavivua vyote. 40Akachukua fimbo yake mkononi, akachagua mawe matano laini kutoka kwenye mkondo wa kijito, akayatia ndani ya mfuko wake wa kichungaji, katika mkoba wake. Kisha, akiwa na kombeo lake mkononi, akamwendea Mfilisti. 41Mfilisti akaendelea kuja, akizidi kumkaribia Daudi, na mbeba ngao wake akiwa mbele yake. 42Mfilisti alipomtazama Daudi, akamdharau, kwa sababu alikuwa kijana tu, mwenye sura ya afya inayong’aa na mzuri wa sura. 43Mfilisti akamwambia Daudi, “Je, mimi ni mbwa, hata unanijia na fimbo?” Akamlaani Daudi kwa miungu yake. 44Mfilisti akamwambia Daudi, “Njoo huku kwangu, nami nitawapa ndege wa angani na wanyama wa porini mwili wako uwe chakula chao!”

45Daudi akamwambia Mfilisti, “Wewe umetoka kupigana nami ukiwa na upanga, mkuki na mkuki mfupi. Mimi nimetoka kupigana nawe kwa jina la BWANA wa majeshi, Mungu wa safu za Israeli, yeye uliyemtukana. 46Leo BWANA atakutia mikononi mwangu. Nitakupiga na kukukata kichwa, na leo hii nitawapa ndege wa angani na wanyama wa porini maiti za jeshi la Wafilisti. Ndipo ulimwengu wote utajua kwamba Israeli ana Mungu, 47na wote waliokusanyika hapa watajua kwamba BWANA haokoi kwa upanga wala kwa mkuki. Vita ni vya BWANA, naye atawatia ninyi mikononi mwetu.” 48Mfilisti aliposonga mbele na kumkaribia Daudi ili kukutana naye, Daudi akakimbia upesi kuelekea safu ya vita ili kukutana naye. 49Daudi akatia mkono mfukoni, akatoa jiwe, akalitupa kwa kombeo, akampiga Mfilisti kwenye paji la uso. Jiwe likazama ndani ya paji la uso wake, naye akaanguka chini kifudifudi. 50Hivyo Daudi akamshinda Mfilisti kwa kombeo na jiwe. Akampiga Mfilisti na kumwua, ingawa Daudi hakuwa na upanga mkononi mwake. 51Daudi akakimbia, akasimama juu ya Mfilisti. Akaushika upanga wa Mfilisti, akauchomoa katika ala yake, akammaliza, kisha akamkata kichwa kwa upanga huo. Wafilisti walipoona kwamba bingwa wao amekufa, wakakimbia. 52Ndipo watu wa Israeli na Yuda wakainuka kwa kelele za vita, wakawafukuza Wafilisti mpaka bondeni na mpaka malango ya Ekroni. Maiti za Wafilisti zikawa zimetapakaa katika njia ya Shaaraimu mpaka Gathi na Ekroni. 53Waisraeli waliporudi kutoka kuwafukuza Wafilisti, wakateka nyara kambi yao. 54Daudi akakichukua kichwa cha Mfilisti, akakileta Yerusalemu, na silaha za Mfilisti akaziweka katika hema yake mwenyewe.

55Sauli alipokuwa amemtazama Daudi akitoka kwenda kukutana na Mfilisti, alikuwa amemwuliza Abneri, mkuu wa jeshi, “Abneri, kijana huyu ni mwana wa nani?” Abneri akajibu, “Kama uishivyo, Ee mfalme, sijui.” 56Mfalme akasema, “Tafuta ujue kijana huyu ni mwana wa nani.”

57Mara Daudi aliporudi kutoka kumwua Mfilisti, Abneri akamchukua, akamleta kwa Sauli, akiwa bado ameshika kichwa cha Mfilisti mkononi mwake. 58Sauli akamwuliza, “Kijana, wewe ni mwana wa nani?” Daudi akajibu, “Mwana wa mtumishi wako Yese wa Bethlehemu.”