1 Samweli 25

1Samweli akafa, na Israeli wote wakakusanyika, wakamwombolezea. Wakamzika nyumbani kwake huko Rama. Kisha Daudi akaondoka, akashuka mpaka nyika ya Parani.

2Palikuwa na mtu mmoja huko Maoni aliyekuwa na mali huko Karmeli. Alikuwa tajiri sana: alikuwa na kondoo 3,000 na mbuzi 1,000. Naye alikuwa akiwakata kondoo wake manyoya huko Karmeli. 3Jina la mtu huyo lilikuwa Nabali, na jina la mkewe lilikuwa Abigaili. Alikuwa mwanamke mwenye busara na mzuri wa sura, lakini mumewe alikuwa mkali na mwovu katika matendo yake. Alikuwa wa uzao wa Kalebu. 4Akiwa nyikani, Daudi akasikia kwamba Nabali alikuwa akiwakata kondoo wake manyoya. 5Basi Daudi akatuma vijana kumi, akawaambia, “Pandeni Karmeli, mwende kwa Nabali, mkamsalimu kwa jina langu. 6Mwambieni hivi: ‘Uishi maisha marefu! Amani iwe kwako, amani iwe kwa nyumba yako, na amani iwe kwa vyote ulivyo navyo. 7Nimesikia kwamba unakata manyoya. Wachungaji wako walikuwa pamoja nasi, nasi hatukuwatendea vibaya. Hakuna kitu chao kilichopotea muda wote walipokuwa Karmeli. 8Waulize vijana wako mwenyewe, nao watakuambia. Kwa hiyo vijana hawa na wapate kibali kwako, kwa kuwa tumekuja siku ya sikukuu. Tafadhali uwape watumishi wako na mwanao Daudi chochote ulicho nacho.” 9Vijana wa Daudi walipofika, wakampa Nabali ujumbe huo wote kwa jina la Daudi. Kisha wakangoja. 10Lakini Nabali akawajibu watumishi wa Daudi, “Daudi ni nani? Huyu mwana wa Yese ni nani? Siku hizi kuna watumwa wengi wanaowatoroka mabwana zao. 11Je, nichukue mkate wangu na maji yangu, na nyama niliyowachinjia wakata manyoya wangu, niwape watu wasiojulikana wanakotoka?” 12Basi vijana wa Daudi wakageuka, wakarudi. Walipofika, wakamweleza maneno hayo yote. 13Daudi akawaambia watu wake, “Kila mtu ajifunge upanga wake!” Basi kila mmoja akajifunga upanga wake, naye Daudi akajifunga wake pia. Watu kama 400 wakapanda pamoja na Daudi, na 200 wakabaki na mizigo. 14Wakati huo mmoja wa vijana akamwambia Abigaili, mke wa Nabali, “Daudi alituma wajumbe kutoka nyikani kumsalimu bwana wetu, lakini yeye akawarukia kwa matusi. 15Lakini watu hao walikuwa wema sana kwetu. Hatukutendewa vibaya, na hakuna kitu chetu kilichopotea muda wote tulipokuwa pamoja nao huko mashambani. 16Walikuwa kama ukuta wa ulinzi kutuzunguka usiku na mchana, muda wote tulipokuwa pamoja nao tukichunga kondoo. 17Sasa fikiri uamue la kufanya, kwa sababu maafa yamekusudiwa juu ya bwana wetu na nyumba yake yote. Yeye ni mtu asiyefaa kitu kiasi kwamba hakuna awezaye kusema naye.” 18Abigaili akafanya haraka. Akachukua mikate 200, viriba viwili vya divai, kondoo watano walio tayari kupikwa, karibu lita 35 za nafaka iliyokaangwa, vishada 100 vya zabibu kavu na maandazi 200 ya tini zilizoshindiliwa, akavipakia juu ya punda. 19Akawaambia watumishi wake, “Tangulieni mbele yangu; mimi nitawafuata.” Lakini hakumwambia mumewe Nabali neno. 20Alipokuwa akishuka kwa punda wake katika sehemu iliyofichika ya mlima, Daudi na watu wake walikuwa wakishuka kumwelekea, naye akakutana nao. 21Daudi alikuwa amesema hivi punde, “Ilikuwa bure kabisa kwamba nililinda kila kitu alichokuwa nacho mtu huyu nyikani, hata hakuna kitu chake kilichopotea. Amenilipa mabaya kwa mema. 22Mungu na awatendee adui za Daudi hivyo, na kuzidi, ikiwa kufikia asubuhi nitamwacha hai hata mwanamume mmoja kati ya wote walio wake!” 23Abigaili alipomwona Daudi, akashuka upesi kutoka juu ya punda wake, akaanguka kifudifudi mbele ya Daudi, akasujudu hadi chini. 24Akaanguka miguuni pake, akasema, “Lawama na iwe juu yangu peke yangu, bwana wangu! Tafadhali mwache mtumishi wako aseme nawe, nawe usikilize yale mtumishi wako anayotaka kusema. 25Tafadhali, bwana wangu, usimjali mtu huyu asiyefaa kitu, Nabali. Yeye ni sawasawa na jina lake. Jina lake ni Nabali, yaani Mpumbavu, na upumbavu uko pamoja naye. Lakini mimi mtumishi wako sikuwaona vijana wale bwana wangu aliowatuma. 26Basi sasa, bwana wangu, kama BWANA aishivyo na kama uishivyo, ni BWANA aliyekuzuia usimwage damu na kujilipizia kisasi kwa mkono wako mwenyewe. Basi sasa adui zako na wote wanaotaka kumdhuru bwana wangu wawe kama Nabali. 27Basi sasa zawadi hii ambayo mtumishi wako amemletea bwana wangu, na wapewe vijana wanaomfuata bwana wangu. 28Tafadhali umsamehe mtumishi wako kosa lake. Hakika BWANA atamjengea bwana wangu nyumba itakayodumu, kwa sababu bwana wangu anapigana vita vya BWANA, wala hakuna ovu litakaloonekana kwako maisha yako yote. 29Mtu yeyote akiinuka kukufuatia na kukuondolea uhai, uhai wa bwana wangu utafungwa salama katika furushi la walio hai, chini ya ulinzi wa BWANA Mungu wako. Lakini maisha ya adui zako atayatupa mbali kama jiwe kutoka katika mfuko wa kombeo. 30BWANA atakapokuwa amemtendea bwana wangu kila jambo jema alilokuahidi, na kukufanya kiongozi juu ya Israeli, 31bwana wangu hatakuwa na jambo hili moyoni, wala dhamiri itakayomsumbua kwa kumwaga damu bila sababu au kwa kujilipizia kisasi mwenyewe. Na BWANA atakapokuwa amemtendea bwana wangu mema, umkumbuke mtumishi wako.”

32Daudi akamjibu Abigaili, “Na abarikiwe BWANA, Mungu wa Israeli, aliyekutuma leo kuja kunilaki. 33Na ibarikiwe busara yako, na ubarikiwe wewe, kwa kunizuia leo nisimwage damu wala kujilipizia kisasi kwa mkono wangu mwenyewe. 34Lakini kama BWANA, Mungu wa Israeli, aishivyo, aliyenizuia nisikudhuru, kama usingeharakisha kuja kunilaki, hakuna hata mwanamume mmoja wa Nabali ambaye angebaki hai kufikia mapambazuko.” 35Kisha Daudi akapokea kutoka mkononi mwake vile alivyomletea, akamwambia, “Rudi nyumbani kwa amani. Nimesikiliza maneno yako, nami nimekubali ombi lako.” 36Abigaili aliporudi kwa Nabali, alikuta anafanya karamu nyumbani mwake, karamu inayomfaa mfalme. Nabali alikuwa na furaha tele, naye alikuwa amelewa sana, kwa hiyo hakumwambia lolote kabisa mpaka mapambazuko. 37Asubuhi, Nabali alipokuwa amelevuka, mkewe akamweleza mambo hayo yote. Moyo wake ukazimia, naye akawa kama jiwe. 38Baada ya siku kama kumi, BWANA akampiga Nabali, naye akafa. 39Daudi aliposikia kwamba Nabali amekufa, akasema, “Na abarikiwe BWANA, aliyenitetea dhidi ya Nabali kwa matusi aliyonitukana, naye amemzuia mtumishi wake asitende uovu. BWANA ameurudisha uovu wa Nabali juu ya kichwa chake mwenyewe.” Kisha Daudi akatuma ujumbe kwa Abigaili, akimwomba awe mke wake. 40Watumishi wa Daudi wakafika kwa Abigaili huko Karmeli, wakamwambia, “Daudi ametutuma kwako tukuchukue uwe mke wake.” 41Akainuka, akasujudu kifudifudi hadi chini, akasema, “Mtumishi wako yuko tayari kuwa kijakazi wa kuwaosha miguu watumishi wa bwana wangu.” 42Abigaili akainuka upesi, akapanda punda wake, akiwa na vijakazi wake watano wakimhudumia. Akawafuata wajumbe wa Daudi, akawa mke wake. 43Daudi alikuwa amemwoa pia Ahinoamu wa Yezreeli, kwa hiyo wote wawili wakawa wake zake.

44Naye Sauli alikuwa amempa Palti mwana wa Laishi, wa Galimu, binti yake mwenyewe Mikali, aliyekuwa mke wa Daudi.