1 Samweli 6

1Sanduku la BWANA lilikaa katika nchi ya Wafilisti kwa miezi saba. 2Ndipo Wafilisti wakawaita makuhani na waaguzi wakasema, “Tufanye nini na sanduku la BWANA? Tuambieni tulipeleke pamoja na nini tunapolirudisha mahali pake.” 3Wakajibu, “Ikiwa mnalirudisha sanduku la Mungu wa Israeli, msilirudishe mikono mitupu. Hakikisheni mnamrudishia sadaka ya hatia. Ndipo mtaponywa, nanyi mtajua kwa nini mkono wake haujaondolewa juu yenu.” 4Wakauliza, “Tumrudishie sadaka gani ya hatia?” Wakajibu, “Majipu matano ya dhahabu na panya watano wa dhahabu, moja kwa kila mkuu wa Wafilisti, kwa sababu pigo lile lile liliwapata watu wote na wakuu wenu. 5Basi tengenezeni sanamu za majipu yenu na sanamu za panya wenu wanaoiharibu nchi, mkampe Mungu wa Israeli utukufu. Huenda atapunguza uzito wa mkono wake juu yenu, juu ya miungu yenu na juu ya nchi yenu. 6Kwa nini kuifanya mioyo yenu migumu kama Wamisri na Farao walivyoifanya yao? Alipokwisha kuwatendea kwa ukali, je, hawakuwaacha Waisraeli waende, nao wakaondoka? 7Basi sasa, andaeni gari jipya na ng’ombe wawili wanaonyonyesha ndama ambao hawajawahi kufungwa nira. Wafungeni ng’ombe hao kwenye gari, lakini ndama wao mwaondoe kwao mwarudishe nyumbani. 8Chukueni sanduku la BWANA mkaliweke juu ya gari, na vitu vya dhahabu mnavyomrudishia kama sadaka ya hatia viwekeni katika kasha kando yake. Kisha liacheni liende zake. 9Kisha angalieni. Likipanda njia ya kwenda nchi yake, kuelekea Beth-shemeshi, basi ni yeye aliyetuletea maafa haya makubwa. Lakini kama sivyo, tutajua kwamba si mkono wake uliotupiga. Yametupata kwa bahati tu.” 10Watu hao wakafanya hivyo. Wakachukua ng’ombe wawili waliokuwa wakinyonyesha ndama, wakawafunga kwenye gari, na ndama wao wakawafungia zizini nyumbani. 11Wakaliweka sanduku la BWANA juu ya gari, pamoja na kasha, panya wa dhahabu na sanamu za majipu yao. 12Ng’ombe wakaenda moja kwa moja katika njia ya kwenda Beth-shemeshi. Walishika barabara ile moja, wakilia walipokuwa wakienda, wala hawakugeuka kulia wala kushoto. Wakuu wa Wafilisti wakatembea nyuma yao mpaka mpakani mwa Beth-shemeshi. 13Basi watu wa Beth-shemeshi walikuwa bondeni wakivuna ngano. Walipoinua macho wakaliona lile sanduku, wakafurahi kuliona. 14Gari likafika katika shamba la Yoshua wa Beth-shemeshi, likasimama pale palipokuwa na jiwe kubwa. Watu wakazipasua mbao za gari wakawatoa wale ng’ombe kuwa sadaka ya kuteketezwa kwa BWANA.

15Walawi walikuwa wamelishusha sanduku la BWANA na kasha lililokuwa pamoja nalo lenye vitu vya dhahabu, wakaviweka juu ya jiwe lile kubwa. Siku ile watu wa Beth-shemeshi wakamtolea BWANA sadaka za kuteketezwa na dhabihu nyingine. 16Wakuu watano wa Wafilisti walipokwisha kuona hayo, wakarudi Ekroni siku ile ile.

17Haya ndiyo majipu ya dhahabu ambayo Wafilisti walirudisha kuwa sadaka ya hatia kwa BWANA: moja kwa ajili ya Ashdodi, moja kwa ajili ya Gaza, moja kwa ajili ya Ashkeloni, moja kwa ajili ya Gathi na moja kwa ajili ya Ekroni.

18Panya wa dhahabu walilingana na hesabu ya miji yote ya Wafilisti iliyokuwa mali ya wakuu watano, tangu miji yenye ngome mpaka vijiji vya mashambani, mpaka lile jiwe kubwa ambalo juu yake waliliweka sanduku la BWANA. Jiwe hilo bado liko mpaka leo katika shamba la Yoshua wa Beth-shemeshi. 19Lakini akawaua baadhi ya watu wa Beth-shemeshi kwa sababu walichungulia ndani ya sanduku la BWANA. Akawaua watu sabini kati ya watu, watu elfu hamsini. Watu wakaomboleza kwa sababu BWANA alikuwa amewapiga pigo zito namna hiyo. 20Ndipo watu wa Beth-shemeshi wakauliza, “Ni nani awezaye kusimama mbele za BWANA, Mungu huyu mtakatifu? Na atapanda kwenda kwa nani kutoka hapa, aondoke kwetu?”

21Basi wakatuma wajumbe kwa watu wa Kiriath-yearimu kusema, “Wafilisti wamelirudisha sanduku la BWANA. Shukeni mlichukue mlipandishe mjini kwenu.”