1 Samweli 23

1Daudi akaambiwa, “Wafilisti wanaushambulia Keila na kuteka nyara viwanja vya kupuria nafaka.” 2Basi Daudi akamwuliza BWANA, “Je, niende kuwashambulia Wafilisti hawa?” BWANA akamjibu Daudi, “Nenda, uwashambulie Wafilisti na kuuokoa Keila.” 3Lakini watu wa Daudi wakamwambia, “Hata hapa katika Yuda tunaishi kwa hofu. Itakuwa vibaya zaidi kama nini tukienda Keila kukabiliana na jeshi la Wafilisti!”

4Daudi akamwuliza BWANA mara nyingine, na BWANA akamjibu, “Ondoka, ushuke Keila, kwa maana ninawatia Wafilisti mikononi mwako.” 5Basi Daudi na watu wake wakaenda Keila, wakapigana na Wafilisti. Akachukua mifugo yao, akawashinda vibaya sana. Hivyo Daudi akawaokoa watu wa Keila.

6Basi Abiathari mwana wa Ahimeleki alipokimbilia kwa Daudi huko Keila, alishuka akiwa na efodi mkononi mwake. 7Sauli akaambiwa kwamba Daudi amekwenda Keila, akasema, “Mungu amemtia mikononi mwangu. Amejifungia ndani kwa kuingia katika mji wenye malango na makomeo.” 8Sauli akawaita askari wote kwa vita, ili kushuka Keila na kumzingira Daudi na watu wake. 9Daudi alipojua kwamba Sauli alikuwa akipanga njama ya kumdhuru, akamwambia Abiathari kuhani, “Leta efodi hapa.”

10Kisha Daudi akasema, “Ee BWANA, Mungu wa Israeli, mtumishi wako amesikia kwa hakika kwamba Sauli anakusudia kuja Keila na kuuharibu mji kwa sababu yangu. 11Je, viongozi wa Keila watanitia mikononi mwake? Je, Sauli atashuka, kama mtumishi wako alivyosikia? Ee BWANA, Mungu wa Israeli, tafadhali mwambie mtumishi wako.” BWANA akajibu, “Atashuka.” 12Daudi akauliza tena, “Je, viongozi wa Keila watanitia mimi na watu wangu mikononi mwa Sauli?” BWANA akajibu, “Watakutia mikononi mwake.”

13Basi Daudi na watu wake, kama mia sita, wakaondoka, wakatoka Keila, wakaendelea kuhama kutoka mahali hadi mahali. Sauli alipoambiwa kwamba Daudi ameponyoka kutoka Keila, akaacha safari yake. 14Daudi akakaa katika ngome za nyikani, katika nchi ya milima ya nyika ya Zifu. Sauli akamtafuta siku baada ya siku, lakini Mungu hakumtia Daudi mikononi mwake. 15Daudi akaona kwamba Sauli ametoka ili kumwondolea uhai wake. Wakati huo Daudi alikuwa Horeshi katika nyika ya Zifu.

16Kisha Yonathani mwana wa Sauli akaondoka, akaenda kwa Daudi huko Horeshi, akamtia nguvu mpya katika Mungu. 17Akamwambia, “Usiogope. Baba yangu Sauli hatakutia mkononi. Wewe utatawala juu ya Israeli, nami nitakuwa wa pili kwako, kando yako. Hata baba yangu Sauli anajua kwamba ndivyo ilivyo.” 18Wawili hao wakafanya agano mbele za BWANA. Kisha Daudi akabaki Horeshi, naye Yonathani akarudi nyumbani.

19Baadhi ya Wazifi wakapanda kwa Sauli huko Gibea, wakasema, “Je, Daudi hajifichi kwetu? Yuko katika ngome za Horeshi, juu ya kilima cha Hakila, upande wa kusini wa Yeshimoni. 20Basi sasa, Ee mfalme, shuka wakati wowote utakapo. Kazi yetu itakuwa kumtia mikononi mwa mfalme.” 21Sauli akasema, “BWANA awabariki, kwa kuwa mmenionea huruma. 22Nendeni sasa mkahakikishe zaidi. Mjue hasa mahali anapokwenda na ni nani aliyemwona huko. Nimesikia kwamba ni mjanja sana. 23Chunguzeni kila mahali pa kujificha anapotumia, mpajue pote, kisha mrudi kwangu na habari za hakika. Ndipo nitakwenda pamoja nanyi, na kama yuko popote katika eneo hili, nitamsaka kati ya koo zote za Yuda.” 24Basi wakaondoka, wakarudi Zifu wakimtangulia Sauli. Wakati huo Daudi na watu wake walikuwa wamekwenda katika nyika ya Maoni, katika Araba kusini mwa Yeshimoni. 25Sauli na watu wake wakatoka kumtafuta. Lakini Daudi akaambiwa, akashuka kwenye mwamba, akabaki katika nyika ya Maoni. Sauli aliposikia hayo, akamfuatia Daudi katika nyika ya Maoni. 26Sauli alikwenda upande mmoja wa mlima, na Daudi na watu wake upande mwingine. Daudi alikuwa akiharakisha kumkimbia Sauli, nao Sauli na watu wake walikuwa wakiwazingira Daudi na watu wake ili kuwakamata. 27Lakini mjumbe akaja kwa Sauli, akasema, “Njoo upesi! Wafilisti wameivamia nchi.” 28Basi Sauli akaacha kumfuatia Daudi, akaenda kukabiliana na Wafilisti. Ndiyo sababu mahali pale pakaitwa Sela-hamalekothi.

29Daudi akapanda kutoka huko, akakaa katika ngome za En-gedi.