1 Samweli 31

1Basi Wafilisti walikuwa wakipigana na Israeli. Watu wa Israeli wakawakimbia Wafilisti, na wengi wakaanguka wamekufa katika mlima Gilboa. 2Wafilisti wakawafikia Sauli na wanawe, wakawaua Yonathani, Abinadabu na Malki-shua, wana wa Sauli. 3Mapigano yakamwelemea Sauli. Wapiga upinde wakampata kwa mishale yao, naye akajeruhiwa vibaya nao. 4Sauli akamwambia mbeba silaha wake, “Chomoa upanga wako unichome nao, la sivyo watu hawa wasiotahiriwa watakuja kunichoma na kunifanyia mzaha.” Lakini mbeba silaha wake hakukubali, kwa sababu aliogopa mno. Basi Sauli akachukua upanga wake mwenyewe, akauangukia. 5Mbeba silaha wake alipoona kwamba Sauli amekufa, naye pia akauangukia upanga wake mwenyewe, akafa pamoja naye. 6Hivyo Sauli akafa, pamoja na wanawe watatu, mbeba silaha wake na watu wake wote, siku ile ile pamoja. 7Watu wa Israeli waliokuwa upande wa pili wa bonde na ng’ambo ya Yordani walipoona kwamba jeshi la Israeli limekimbia na kwamba Sauli na wanawe wamekufa, wakaiacha miji yao, wakakimbia. Kisha Wafilisti wakaja, wakakaa ndani yake.

8Siku iliyofuata Wafilisti wakaja kuwavua wafu, wakamkuta Sauli na wanawe watatu wamelala pale walipoanguka katika mlima Gilboa. 9Wakakikata kichwa cha Sauli, wakamvua silaha zake, wakatuma wajumbe katika nchi yote ya Wafilisti kupeleka habari njema katika mahekalu ya sanamu zao na kwa watu. 10Wakaziweka silaha zake katika hekalu la Ashtarothi, wakaufungia mwili wake katika ukuta wa Beth-shani. 11Watu walioishi Yabeshi ya Gileadi wakasikia yale ambayo Wafilisti walimtendea Sauli. 12Mashujaa wao wote wakaondoka, wakasafiri usiku kucha. Wakaushusha mwili wa Sauli na miili ya wanawe kutoka ukutani mwa Beth-shani, wakaileta Yabeshi, wakaiteketeza huko. 13Kisha wakachukua mifupa yao, wakaizika chini ya mkwaju huko Yabeshi, wakafunga kwa siku saba.