1 Samweli 30

1Siku ya tatu Daudi na watu wake wakafika Siklagi. Waamaleki walikuwa wamevamia Negebu na Siklagi. Walikuwa wameushambulia Siklagi na kuuteketeza kwa moto. 2Walikuwa wamewateka wanawake waliokuwa humo, vijana kwa wazee. Hawakumwua mtu yeyote, ila waliwachukua wote, wakaenda zao. 3Daudi na watu wake walipofika mjini, wakaukuta umeteketezwa kwa moto, na wake zao, wana wao na binti zao wametekwa. 4Daudi na askari waliokuwa pamoja naye wakalia kwa sauti mpaka wakaishiwa nguvu ya kulia. 5Wake wawili wa Daudi nao walikuwa wametekwa: Ahinoamu wa Yezreeli na Abigaili, mjane wa Nabali wa Karmeli. 6Daudi akawa katika dhiki kuu, kwa sababu askari walikuwa wakizungumza juu ya kumpiga kwa mawe. Kila mmoja alikuwa na uchungu kwa ajili ya wanawe na binti zake. Lakini Daudi akapata nguvu kutoka kwa BWANA Mungu wake.

7Daudi akamwambia Abiathari kuhani, mwana wa Ahimeleki, “Tafadhali niletee efodi hapa.” Basi Abiathari akamletea Daudi efodi. 8Kisha Daudi akamwuliza BWANA, “Je, nikifuatie kikosi hiki cha wavamizi? Je, nitawapata?” BWANA akamjibu, “Wafuatie. Hakika utawapata, na hakika utawaokoa mateka.” 9Basi Daudi akaondoka pamoja na watu 600 waliokuwa pamoja naye. Wakafika kwenye kijito cha Besori, mahali walipobaki wale walioachwa nyuma. 10Daudi na watu 400 wakaendelea kufuatia, na watu 200 wakabaki nyuma, wakiwa wamechoka mno kuvuka kijito cha Besori. 11Wakamkuta Mmisri mmoja nje porini, wakamleta kwa Daudi. Wakampa chakula akala, na maji akanywa. 12Wakampa pia kipande cha andazi la tini zilizoshindiliwa na vishada viwili vya zabibu kavu. Alipokwisha kula, nguvu zake zikamrudia, kwa maana hakuwa amekula wala kunywa kwa siku tatu, mchana na usiku.

13Daudi akamwuliza, “Wewe ni wa nani, na unatoka wapi?” Akajibu, “Mimi ni kijana Mmisri, mtumishi wa Mwamaleki. Bwana wangu aliniacha nyuma siku tatu zilizopita kwa sababu niliugua. 14Tulivamia Negebu ya Wakerethi, sehemu iliyo ya Yuda, na Negebu ya Kalebu, nasi tukauteketeza Siklagi kwa moto.” 15Daudi akamwuliza, “Je, utaniongoza mpaka kwa kikosi hiki cha wavamizi?” Akajibu, “Niapie kwa Mungu kwamba hutaniua wala kunitia mikononi mwa bwana wangu, nami nitakupeleka kwao.” 16Basi akamwongoza mpaka huko, na hao walikuwa wametawanyika katika eneo lote, wakila, wakinywa na kusherehekea kwa sababu ya nyara nyingi walizoteka kutoka nchi ya Wafilisti na kutoka nchi ya Yuda. 17Tangu mapambazuko ya giza mpaka jioni ya siku iliyofuata Daudi akawapiga. Hakuna hata mmoja wao aliyeokoka isipokuwa vijana 400 waliopanda ngamia, wakakimbia. 18Daudi akavirudisha vyote ambavyo Waamaleki walikuwa wamechukua, akawaokoa pia wake zake wawili. 19Hakuna kitu chao kilichopotea, kidogo wala kikubwa, wana wala binti, nyara wala kitu kingine chochote ambacho wavamizi walikuwa wamechukua. Daudi akarudisha vyote. 20Daudi akachukua pia kondoo wote na ng’ombe wote. Watu wake wakawaswaga mbele ya mifugo mingine, wakasema, “Hizi ni nyara za Daudi.” 21Kisha Daudi akarudi kwa wale watu 200 waliokuwa wamechoka mno kumfuata, walioachwa kwenye kijito cha Besori. Wakatoka kumlaki Daudi na askari waliokuwa pamoja naye, naye Daudi alipowakaribia akawasalimu.

22Lakini kila mtu mwovu na asiyefaa kitu kati ya wale waliokwenda pamoja na Daudi akasema, “Kwa kuwa hawakwenda pamoja nasi, hatutawapa chochote katika nyara tulizozirudisha. Kila mtu na amchukue mkewe na watoto wake, aende zake.”

23Lakini Daudi akasema, “Ndugu zangu, msifanye hivyo kwa vitu ambavyo BWANA ametupa. Yeye ametulinda salama, naye ametutia mikononi kikosi cha wavamizi kilichotushambulia. 24Ni nani angewasikiliza katika jambo hili? Fungu la mtu anayebaki na mizigo litakuwa sawa na fungu la mtu anayeshuka vitani. Watagawana sawasawa.”

25Tangu siku ile ikawa hivyo: Daudi akaifanya kuwa kanuni na agizo kwa Israeli, nayo inadumu mpaka leo.

26Daudi aliporudi Siklagi, akapeleka sehemu ya nyara kwa wazee wa Yuda, waliokuwa rafiki zake, akisema, “Hii hapa zawadi kwa ajili yenu, kutoka katika nyara za adui za BWANA.” 27Akapeleka kwa wale wa Betheli, wa Ramothi ya Negebu na wa Yatiri, 28kwa wale wa Aroeri, wa Sifmothi na wa Eshtemoa,

29kwa wale wa Rakali, wa miji ya Wayerameeli na wa miji ya Wakeni, 30kwa wale wa Horma, wa Bor-ashani na wa Athaki, 31kwa wale wa Hebroni, na kwa mahali pote ambapo Daudi na watu wake walikuwa wakizunguka.