1 Samweli 22

1Daudi akaondoka mahali pale, akatorokea kwenye pango la Adulamu. Ndugu zake na jamaa yote ya baba yake waliposikia habari hiyo, wakashuka kujiunga naye huko. 2Watu waliokuwa na shida, watu waliokuwa na madeni, na watu waliokuwa na uchungu moyoni wote wakaja kujiunga naye, naye akawa kiongozi wao. Walikuwa pamoja naye kama watu mia nne. 3Kutoka huko Daudi akaenda Mizpa katika Moabu, akamwambia mfalme wa Moabu, “Tafadhali waruhusu baba yangu na mama yangu waje wakae pamoja nanyi mpaka nijue Mungu atakalonifanyia.” 4Basi akawapeleka kwa mfalme wa Moabu, nao wakaishi pamoja naye muda wote Daudi alipokuwa ngomeni.

5Kisha Gadi nabii akamwambia Daudi, “Usibaki ngomeni. Ondoka, uende katika nchi ya Yuda.” Basi Daudi akaondoka, akafika katika msitu wa Herethi.

6Sauli akasikia kwamba Daudi na watu waliokuwa pamoja naye wameonekana. Sauli alikuwa ameketi Gibea chini ya mkwaju juu ya kilima, mkuki wake mkononi, na maafisa wake wote walikuwa wamesimama kumzunguka. 7Sauli akawaambia maafisa waliosimama kumzunguka, “Sikilizeni, enyi watu wa Benyamini! Je, mwana wa Yese atampa kila mmoja wenu mashamba na mashamba ya mizabibu pia? Je, atawafanya ninyi nyote kuwa wakuu wa maelfu na wakuu wa mamia? 8Ninyi nyote mmefanya njama juu yangu! Hakuna aliyeniambia mwanangu alipofanya agano na mwana wa Yese. Hakuna hata mmoja wenu anayenionea huruma wala kunijulisha kwamba mwanangu amemchochea mtumishi wangu anivizie, kama anavyofanya leo.”

9Ndipo Doegi Mwedomu, aliyekuwa amesimama pamoja na maafisa wa Sauli, akasema, “Nilimwona mwana wa Yese akija Nobu, kwa Ahimeleki mwana wa Ahitubu. 10Alimwomba BWANA mwongozo kwa ajili yake, akampa chakula na upanga wa Goliathi Mfilisti.” 11Mfalme akatuma kumwita Ahimeleki kuhani, mwana wa Ahitubu, na jamaa yote ya baba yake, makuhani wa Nobu, nao wote wakaja kwa mfalme.

12Sauli akasema, “Sikiliza sasa, mwana wa Ahitubu.” Akajibu, “Naam, bwana wangu.” 13Sauli akamwambia, “Kwa nini wewe na mwana wa Yese mmefanya njama juu yangu? Ulimpa mkate na upanga, ukamwomba Mungu mwongozo kwa ajili yake, ili ainuke juu yangu na kunivizia, kama anavyofanya leo.”

14Ahimeleki akamjibu mfalme, “Ni nani kati ya maafisa wako wote aliye mwaminifu kama Daudi? Yeye ni mkwe wa mfalme, ana nafasi katika walinzi wako binafsi, naye anaheshimiwa nyumbani mwako. 15Je, leo ndiyo mara ya kwanza nilipomwomba Mungu mwongozo kwa ajili yake? Hasha! Mfalme asimlaumu mtumishi wake wala mtu yeyote wa jamaa ya baba yangu, kwa maana mtumishi wako hakujua lolote juu ya jambo hili, dogo wala kubwa.” 16Lakini mfalme akasema, “Hakika utakufa, Ahimeleki, wewe na jamaa yote ya baba yako.” 17Kisha mfalme akawaambia walinzi waliosimama kumzunguka, “Geukeni mkawaue makuhani wa BWANA, kwa sababu wao pia wamejiunga na Daudi. Walijua kwamba alikuwa akikimbia, lakini hawakuniambia.” Lakini maafisa wa mfalme walikataa kuinua mkono kuwapiga makuhani wa BWANA.

18Ndipo mfalme akamwambia Doegi, “Wewe geuka uwaue makuhani.” Basi Doegi Mwedomu akageuka, akawashambulia makuhani yeye mwenyewe. Siku ile akawaua watu themanini na watano waliovaa efodi ya kitani. 19Akaupiga pia Nobu, mji wa makuhani, kwa upanga. Wanaume na wanawake, watoto na watoto wachanga, ng’ombe, punda na kondoo, wote akawaua kwa upanga. 20Lakini mwana mmoja wa Ahimeleki mwana wa Ahitubu, aitwaye Abiathari, akaokoka, akakimbia kujiunga na Daudi. 21Abiathari akamjulisha Daudi kwamba Sauli amewaua makuhani wa BWANA. 22Daudi akamwambia Abiathari, “Siku ile, Doegi Mwedomu alipokuwa pale, nilijua kwamba hakika atamwambia Sauli. Mimi ndiye wa kulaumiwa kwa kifo cha kila mtu wa jamaa ya baba yako. 23Kaa pamoja nami, wala usiogope. Yule anayetaka uhai wangu anataka na uhai wako pia. Ukiwa pamoja nami utalindwa salama.”