1 Samweli 5

1Basi Wafilisti walikuwa wameliteka sanduku la Mungu, wakalipeleka kutoka Ebenezeri mpaka Ashdodi. 2Wafilisti walilichukua sanduku la Mungu, wakaliingiza katika hekalu la Dagoni, wakaliweka kando ya Dagoni. 3Watu wa Ashdodi walipoamka mapema siku iliyofuata, kumbe Dagoni alikuwa ameanguka kifudifudi chini mbele ya sanduku la BWANA. Basi wakamchukua Dagoni wakamrudisha mahali pake. 4Asubuhi na mapema siku iliyofuata waliamka, na kumbe Dagoni alikuwa ameanguka kifudifudi chini mbele ya sanduku la BWANA. Kichwa cha Dagoni na mikono yake yote miwili vilikuwa vimekatwa vikiwa kizingitini; kiwiliwili chake tu ndicho kilichobaki. 5Ndiyo sababu, mpaka leo, makuhani wa Dagoni na kila mtu anayeingia katika hekalu la Dagoni huko Ashdodi hawakanyagi kizingiti cha Dagoni.

6Ndipo mkono wa BWANA ukawalemea sana watu wa Ashdodi. Akawaletea maangamizi na kuwapiga kwa majipu, Ashdodi na nchi iliyouzunguka. 7Watu wa Ashdodi walipoona jinsi mambo yalivyokuwa, wakasema, “Sanduku la Mungu wa Israeli lisibaki kwetu. Mkono wake unatulemea sisi na Dagoni mungu wetu.” 8Basi wakatuma ujumbe kwa wakuu wote wa Wafilisti, wakawakusanya pamoja. Wakauliza, “Tufanye nini na sanduku la Mungu wa Israeli?” Wakuu wakajibu, “Sanduku la Mungu wa Israeli lipelekwe Gathi.” Basi wakalipeleka sanduku la Mungu wa Israeli huko.

9Lakini baada ya kulihamisha, mkono wa BWANA ulikuwa dhidi ya mji huo ukautia katika hofu kuu. Akawapiga watu wa mji, wadogo kwa wakubwa, na majipu yakawatokea. 10Basi wakalipeleka sanduku la Mungu Ekroni. Lakini mara tu sanduku la Mungu lilipofika Ekroni, watu wa Ekroni wakalia kwa sauti, “Wametuletea sanduku la Mungu wa Israeli ili kutuua sisi na watu wetu!” 11Basi wakatuma ujumbe wakawakusanya wakuu wote wa Wafilisti. Wakasema, “Lipelekeni mbali sanduku la Mungu wa Israeli. Lirudi mahali pake, lisije likatuua sisi na watu wetu.” Kwa maana hofu ya kifo ilikuwa imeenea mji wote; mkono wa Mungu ulikuwa mzito sana huko. 12Wale ambao hawakufa walipigwa kwa majipu, na kilio cha mji cha kuomba msaada kikapanda mpaka mbinguni.