1 Samweli 10

1Kisha Samweli akachukua chupa ya mafuta akayamimina juu ya kichwa cha Sauli. Akambusu, akasema, “Je, BWANA hakukupaka mafuta uwe kiongozi juu ya urithi wake mwenyewe? 2Utakaponiacha leo, utakutana na watu wawili karibu na kaburi la Raheli huko Selsa, katika nchi ya Benyamini. Watakuambia, ‘Punda uliokwenda kuwatafuta wamepatikana. Baba yako ameacha kuwafikiria punda, na sasa ana wasiwasi juu yako. Anasema, “Nifanye nini kuhusu mwanangu?”’ 3Kisha utaendelea kutoka huko mpaka ufike kwenye mwaloni wa Tabori. Watu watatu watakutana nawe huko wakiwa njiani kupanda kwenda kumwabudu Mungu huko Betheli. Mmoja atakuwa amebeba wana-mbuzi watatu, mwingine mikate mitatu, na wa tatu kiriba cha divai. 4Watakusalimu na kukupa mikate miwili, nawe utaipokea kutoka kwao. 5Kisha utafika Gibea ya Mungu, mahali palipo na vituo vya askari wa Wafilisti. Mara utakapoingia mjini, utakutana na kundi la manabii wakishuka kutoka mahali pa juu. Kinubi, matari, filimbi na zeze vitakuwa vikiwatangulia, nao watakuwa wakitabiri. 6Roho wa BWANA atakujia kwa nguvu, nawe utatabiri pamoja nao na kubadilishwa kuwa mtu tofauti. 7Ishara hizi zikishakutokea, fanya lolote ambalo wakati huo unadai, kwa maana Mungu yu pamoja nawe. 8Kisha shuka Gilgali kabla yangu. Nitashuka nikujie huko ili kutoa sadaka za kuteketezwa na kutoa dhabihu za sadaka za amani. Ni lazima usubiri siku saba mpaka nitakapokuja, kisha nitakujulisha unalopaswa kufanya.” 9Sauli alipogeuka kumwacha Samweli, Mungu akambadilisha moyo, na ishara hizo zote zikatimia siku ile.

10Walipofika Gibea, kundi la manabii likakutana naye huko. Roho wa Mungu akamjia kwa nguvu, naye akatabiri kati yao. 11Wote waliomjua tangu zamani walipomwona akitabiri pamoja na manabii, watu wakaulizana, “Mwana wa Kishi amepatwa na nini? Je, Sauli naye yumo kati ya manabii?” 12Mtu mmoja aliyeishi huko akajibu, “Na baba yao ni nani?” Ndivyo methali hii ilivyoanza: “Je, Sauli naye yumo kati ya manabii?” 13Alipomaliza kutabiri, akaenda mahali pa juu. 14Baba mdogo wa Sauli akamwuliza yeye na mtumishi wake, “Mlikuwa wapi?” Sauli akasema, “Tulikuwa tukiwatafuta punda. Tulipoona hawapatikani popote, tukaenda kwa Samweli.” 15Baba mdogo wa Sauli akasema, “Tafadhali niambie Samweli aliwaambia nini.” 16Sauli akamjibu baba yake mdogo, “Alituhakikishia kwamba punda wamepatikana.” Lakini hakumwambia yale Samweli aliyosema kuhusu ufalme.

17Samweli akawaita watu wakusanyike mbele za BWANA huko Mizpa. 18Akawaambia Waisraeli, “BWANA, Mungu wa Israeli, asema hivi: ‘Niliwapandisha Israeli kutoka Misri. Niliwaokoa ninyi na nguvu za Wamisri na za falme zote zilizokuwa zikiwaonea.’ 19Lakini leo mmemkataa Mungu wenu, yeye anayewaokoa na taabu na dhiki zenu zote. Mmemwambia, ‘Badala yake tuwekee mfalme.’ Basi sasa jihudhurisheni mbele za BWANA kabila kwa kabila na ukoo kwa ukoo.” 20Kisha Samweli akayaleta mbele makabila yote ya Israeli, na kura ikaangukia kabila la Benyamini. 21Kisha akalileta mbele kabila la Benyamini ukoo kwa ukoo, na ukoo wa Wamatri ukachaguliwa. Mwishowe Sauli mwana wa Kishi akachaguliwa. Lakini walipomtafuta, hakuwepo. 22Basi wakamwuliza BWANA tena, “Je, mtu huyo amekwisha kufika hapa?” BWANA akajibu, “Yule pale, amejificha kati ya mizigo.” 23Wakakimbia wakamtoa huko, naye aliposimama kati ya watu alikuwa mrefu kuliko wote kwa kimo cha mabega na kichwa. 24Samweli akawaambia watu wote, “Mnamwona mtu ambaye BWANA amemchagua? Kati ya watu wote hakuna aliye kama yeye.” Ndipo watu wote wakapiga kelele, “Mfalme na aishi maisha marefu!”

25Samweli akawaeleza watu haki na wajibu wa ufalme. Akaziandika katika kitabu akakiweka mbele za BWANA. Kisha Samweli akawaaga watu wote warudi nyumbani. 26Sauli naye akaenda nyumbani Gibea, na pamoja naye wakaenda watu hodari ambao Mungu alikuwa ameigusa mioyo yao. 27Lakini watu fulani wasiofaa kitu wakasema, “Huyu jamaa atatuokoaje?” Wakamdharau, wala hawakumletea zawadi. Lakini yeye akanyamaza kimya.