1 Samweli 8

1Samweli alipozeeka, aliwaweka wanawe kuwa waamuzi juu ya Israeli. 2Mwanawe mzaliwa wa kwanza aliitwa Yoeli, na wa pili Abiya. Walihudumu kama waamuzi huko Beer-sheba. 3Lakini wanawe hawakufuata njia zake. Walikengeuka wakitafuta faida isiyo halali; walipokea rushwa na kupotosha haki.

4Basi wazee wote wa Israeli wakakusanyika pamoja, wakaenda kwa Samweli huko Rama. 5Wakamwambia, “Wewe umezeeka, na wanao hawafuati njia zako. Basi sasa tuwekee mfalme atuamue, kama mataifa yote yalivyo nao.” 6Lakini Samweli hakupendezwa waliposema, “Tupe mfalme atuamue,” naye akamwomba BWANA.

7BWANA akamwambia Samweli, “Wasikilize watu katika kila jambo wanalokuambia. Si wewe waliyekukataa; ni mimi waliyenikataa kuwa mfalme wao. 8Wanakutendea wewe kama walivyozoea kutenda tangu siku ile nilipowapandisha kutoka Misri: mpaka leo wameniacha na kutumikia miungu mingine. 9Basi sasa, fanya wanavyoomba. Lakini lazima uwaonye kwa makini na kuwaeleza mienendo ya mfalme atakayewatawala.”

10Basi Samweli akawaeleza watu waliokuwa wakimwomba mfalme yote ambayo BWANA alikuwa amesema.

11Akasema, “Hii ndiyo itakayokuwa mienendo ya mfalme atakayewatawala: atawachukua wana wenu na kuwatumikisha katika magari yake ya vita na kati ya wapanda farasi wake, nao watakimbia mbele ya magari yake ya vita, 12atawaweka wengine kuwa wakuu wa maelfu na wakuu wa hamsini, na wengine kulima mashamba yake na kuvuna mavuno yake na kutengeneza silaha zake za vita na vifaa vya magari yake ya vita. 13Atawachukua binti zenu wawe watengenezaji wa marashi, wapishi na waokaji mikate. 14Mashamba yenu, mashamba ya mizabibu na mashamba ya mizeituni yaliyo bora atayachukua na kuwapa maafisa wake. 15Atachukua sehemu ya kumi ya nafaka yenu na ya mavuno ya zabibu zenu na kuwapa maafisa wa ikulu yake na watumishi wake. 16Atawachukua watumishi wenu wa kiume na wa kike, vijana wenu walio bora, na punda wenu, na kuwatumikisha kwa kazi zake. 17Atachukua sehemu ya kumi ya kondoo na mbuzi wenu, nanyi wenyewe mtakuwa watumwa wake. 18Siku ile itakapofika mtalia kwa sababu ya mfalme mliyejichagulia, lakini BWANA hatawajibu wakati huo.” 19Lakini watu wakakataa kumsikiliza Samweli. Wakasema, “Hapana, tutakuwa na mfalme juu yetu, 20ili sisi nasi tuwe kama mataifa yote. Mfalme wetu atatuamua na kutoka mbele yetu na kupigana vita vyetu.” 21Samweli aliposikia yote waliyosema watu, akayarudia mbele za BWANA.

22BWANA akamwambia Samweli, “Fanya wanavyoomba, uwape mfalme.” Kisha Samweli akawaambia watu wa Israeli, “Rudini, kila mmoja wenu mjini kwake.”