1 Samweli 11

1Kisha Nahashi Mwamoni akapanda akauzingira mji wa Yabeshi ya Gileadi, na watu wote wa Yabeshi wakamwambia Nahashi, “Ukifanya mkataba nasi, tutakuwa chini yako.” 2Lakini Nahashi Mwamoni akawajibu, “Nitafanya mkataba nanyi, lakini kwa sharti hili tu: nitang’oa jicho la kulia la kila mmoja wenu. Kwa njia hiyo nitaiaibisha Israeli yote.” 3Wazee wa Yabeshi wakamwambia, “Tupe siku saba ili tutume wajumbe katika nchi yote ya Israeli. Kisha, kama hakuna atakayekuja kutuokoa, tutatoka tujisalimishe kwako.” 4Wajumbe walipofika Gibea ya Sauli wakawaeleza watu yaliyotokea, watu wote wakalia kwa sauti. 5Wakati huo huo Sauli alikuwa akirudi kutoka shambani nyuma ya ng’ombe wake wa kulima. Akauliza, “Watu wana shida gani? Mbona wanalia?” Wakamweleza yale ambayo watu wa Yabeshi walikuwa wamesema. 6Sauli aliposikia maneno haya, Roho wa Mungu akamjia kwa nguvu, naye akakasirika sana. 7Akachukua jozi ya ng’ombe wa kulima akawakata vipande vipande, akavipeleka kwa mikono ya wajumbe katika nchi yote ya Israeli pamoja na ujumbe huu: “Yeyote asiyetoka kumfuata Sauli na Samweli, ng’ombe wake watatendwa vivyo hivyo.” Ndipo hofu ya BWANA ikawaangukia watu, nao wakatoka kama mtu mmoja. 8Sauli alipowahesabu huko Bezeki, watu wa Israeli walikuwa laki tatu, na watu wa Yuda elfu thelathini. 9Wakawaambia wajumbe waliokuja, “Waambieni watu wa Yabeshi ya Gileadi, ‘Kesho, kufikia wakati jua litakapokuwa kali, msaada utawafikia.’” Wajumbe waliporudi wakawaambia watu wa Yabeshi, wakafurahi. 10Ndipo watu wa Yabeshi wakawaambia Waamoni, “Kesho tutatoka kwenu, nanyi mtatutendea lolote mnaloona ni jema.”

11Siku iliyofuata Sauli akalipanga jeshi katika vikosi vitatu. Wakati wa zamu ya asubuhi wakaivamia kambi, wakawaua Waamoni mpaka wakati wa jua kali. Walionusurika wakatawanyika kiasi kwamba hawakubaki wawili kati yao pamoja. 12Ndipo watu wakamwambia Samweli, “Ni nani wale waliosema, ‘Je, Sauli atatawala juu yetu?’ Watoeni watu hao, nasi tutawaua.” 13Lakini Sauli akasema, “Hakuna mtu atakayeuawa leo, kwa maana leo BWANA ameleta wokovu katika Israeli.”

14Kisha Samweli akawaambia watu, “Njooni, twende Gilgali tukaufanye upya ufalme huko.” 15Basi watu wote wakaenda Gilgali, na huko, mbele za BWANA huko Gilgali, wakamfanya Sauli mfalme. Wakatoa sadaka za amani huko mbele za BWANA, na Sauli na watu wote wa Israeli wakasherehekea kwa furaha kubwa.