Matendo 1

1Theofilo, katika kitabu changu cha kwanza niliandika juu ya yote ambayo Yesu alianza kufanya na kufundisha, 2hadi siku alipochukuliwa juu. Kabla ya hapo, kupitia Roho Mtakatifu, alikuwa amewapa maagizo mitume aliowachagua. 3Kwao pia alikuwa amejionyesha kwamba yu hai baada ya mateso yake, kwa ithibati nyingi zilizo wazi, kwa kuwa kwa siku arobaini aliwatokea na kuwaeleza habari za ufalme wa Mungu. 4Alipokuwa akila chakula pamoja nao, aliwaamuru wasiondoke Yerusalemu, bali wangoje huko kile ambacho Baba aliahidi: “ile ahadi ambayo mmenisikia nikiinena. 5Kwa maana Yohana alibatiza kwa maji, lakini ninyi mtabatizwa kwa Roho Mtakatifu kabla siku nyingi hazijapita.”

6Walipokuwa wamekusanyika, waliendelea kumwuliza, “Bwana, je, huu ndio wakati utakaourejesha ufalme kwa Israeli?” 7Akawajibu, “Vipindi na nyakati ambazo Baba amezipanga kwa mamlaka yake si mambo yenu kuyajua. 8Lakini Roho Mtakatifu atakapowajia, mtapokea nguvu, nanyi mtanishuhudia huko Yerusalemu, kote Uyahudi na Samaria, hadi miisho ya dunia.” 9Baada ya maneno hayo, aliinuliwa juu wao wakitazama, na wingu likamchukua, hata macho yao yasiweze kumwona tena. 10Alipokuwa akienda, wao waliendelea kukaza macho angani, na ghafla wanaume wawili waliovaa nguo nyeupe walikuwa wamesimama kando yao. 11Wakasema, “Wanaume wa Galilaya, kwa nini mnasimama hapo mkiangalia juu angani? Yesu huyu aliyechukuliwa kutoka kwenu kwenda mbinguni atakuja kwa namna ileile mliyomwona akiondoka kwenda mbinguni.”

12Kisha walirudi Yerusalemu kutoka kilima kiitwacho Mlima wa Mizeituni. Kiko karibu na mji, chini ya kilomita moja kutoka huko. 13Walipofika mjini, walipanda kwenda chumba cha ghorofani walimokuwa wakikaa. Walikuwepo Petro, Yohana, Yakobo na Andrea, Filipo na Tomaso, Bartholomayo na Mathayo, Yakobo mwana wa Alfayo, Simoni Mzelote, na Yuda mwana wa Yakobo. 14Wote hao walijitoa kwa bidii kwa maombi, wakiwa na nia moja. Pamoja nao walikuwepo wale wanawake, Mariamu mama wa Yesu, na ndugu zake.

15Katika siku hizo Petro alisimama kuzungumza kati ya ndugu, kundi la watu wapatao mia moja na ishirini waliokusanyika mahali pamoja. 16“Ndugu, ilibidi yatimie yale ambayo Roho Mtakatifu alitabiri katika Maandiko kwa kinywa cha Daudi. Alinena habari za Yuda, aliyewaongoza wale waliomkamata Yesu. 17Yuda alihesabiwa kuwa mmoja wetu, na alipewa sehemu yake katika huduma hii.

18(Mtu huyu alipata shamba lililolipiwa kwa fedha alizopata kwa uhalifu wake. Alianguka kichwa chini, akapasuka katikati, na utumbo wake wote ukatoka nje. 19Habari hiyo ilienea kwa wote walioishi Yerusalemu, na hivyo shamba hilo likaja kuitwa kwa lugha yao Hakeldama, maana yake Shamba la Damu.) 20Kwa maana kitabu cha Zaburi kinasema, ‘Nyumba yake na iwe magofu, asiwepo mtu wa kuishi ndani yake,’ na tena, ‘Mtu mwingine na ashike wadhifa wake.’ 21Kwa hiyo tunahitaji mmoja wa wanaume walioambatana nasi muda wote Bwana Yesu alipokuwa akienda na kurudi kati yetu, 22tangu siku Yohana alipobatiza hadi siku alipochukuliwa kutoka kwetu. Mmoja wao lazima aungane nasi kuwa shahidi wa ufufuo wake.” 23Walipendekeza wanaume wawili: Yusufu aliyeitwa Barsaba, aliyejulikana pia kama Yusto, na Mathia. 24Kisha wakaomba, “Bwana, wewe unayeijua mioyo ya watu wote, tuonyeshe wazi ni yupi kati ya hawa wawili uliyemteua 25kushika nafasi katika huduma hii ya utume ambayo Yuda aliiacha ili aende mahali pake.” 26Walipiga kura kwa ajili ya hao wawili, nayo ikamwangukia Mathia, na tangu hapo akahesabiwa pamoja na mitume kumi na mmoja.