Matendo 26

1Agripa akamwambia Paulo, “Una ruhusa ya kusema kwa ajili yako mwenyewe.” Basi Paulo akanyosha mkono, akaanza kujitetea: 2“Mfalme Agripa, najihesabu kuwa mwenye bahati kwamba ni mbele yako leo nitajibu mashtaka yote ambayo baadhi ya Wayahudi wananishtaki, 3hasa kwa kuwa unazijua vizuri desturi zote na maswali yanayobishaniwa na Wayahudi. Kwa hiyo nakuomba unisikilize kwa uvumilivu.

4Wayahudi wote wanajua jinsi nilivyoishi tangu ujana wangu, tangu mwanzo kabisa wa maisha yangu miongoni mwa watu wangu na huko Yerusalemu. 5Wamenijua kwa muda mrefu, na kama wangetaka, wangeweza kushuhudia kwamba niliishi kama Farisayo, katika madhehebu yaliyo makali kuliko yote ya dini yetu. 6Na sasa nimesimama hapa nikihukumiwa kwa sababu ya tumaini langu katika ahadi ambayo Mungu aliwapa wahenga wetu. 7Ni ahadi ambayo makabila yetu kumi na mbili yanatumaini kuiona ikitimia, wanapomwabudu Mungu kwa bidii usiku na mchana. Mtukufu Mfalme, ni kwa ajili ya tumaini hili ndipo ninashtakiwa na Wayahudi. 8Kwa nini mtu yeyote kati yenu aone kuwa ni jambo lisilosadikika kwamba Mungu huwafufua wafu? 9Mimi mwenyewe niliwahi kuamini kwamba ni lazima nifanye kila niwezalo kulipinga jina la Yesu wa Nazareti, 10na hivyo ndivyo nilivyofanya huko Yerusalemu. Kwa mamlaka kutoka kwa wakuu wa makuhani niliwafunga gerezani wengi wa watu watakatifu wa Mungu, na walipohukumiwa kuuawa, nilipiga kura yangu dhidi yao. 11Mara kwa mara niliwafanya waadhibiwe katika masinagogi yote, nikajaribu kuwalazimisha wakufuru. Hasira yangu dhidi yao haikuwa na kipimo, nikawasaka hata katika miji iliyo nje ya nchi yetu.

12Hiyo ndiyo iliyokuwa kazi yangu nilipokuwa njiani kwenda Dameski nikiwa na mamlaka na agizo la wakuu wa makuhani. 13Mtukufu Mfalme, saa sita mchana, nilipokuwa nikisafiri njiani, niliona nuru kutoka mbinguni, iliyong’aa kuliko jua, ikiangaza kunizunguka mimi na wale waliokuwa wakisafiri pamoja nami. 14Sote tukaanguka chini, nami nikasikia sauti ikiniambia kwa Kiebrania, ‘Sauli, Sauli, kwa nini unanitesa? Unajiumiza mwenyewe kwa kupiga teke michokoo.’ 15Nikauliza, ‘Wewe ni nani, Bwana?’ Bwana akajibu, ‘Mimi ni Yesu, yule unayemtesa. 16Lakini inuka, simama kwa miguu yako. Nimekutokea kwa kusudi hili: nikuchague uwe msaidizi wangu na shahidi wangu, ili uyaeleze yale uliyoyaona kunihusu na yale nitakayokuonyesha bado. 17Nitakulinda kutoka kwa watu wako mwenyewe na kutoka kwa watu wa mataifa. Ninakutuma kwao 18uwafungue macho, ili wageuke kutoka gizani kuingia nuruni, na kutoka katika mamlaka ya Shetani kumrudia Mungu, wapate msamaha wa dhambi zao na sehemu ya urithi pamoja na wale waliotakaswa kwa imani kwangu.’

19Na hivyo, Mfalme Agripa, sikuyapinga maono yale ya mbinguni. 20Nilikwenda kwanza kwa watu wa Dameski, kisha Yerusalemu na nchi yote ya Uyahudi, na kwa watu wa mataifa pia, nikawaambia wote watubu na kumgeukia Mungu, na kuishi kwa namna inayothibitisha toba yao. 21Ni kwa sababu hiyo baadhi ya Wayahudi walinikamata hekaluni, wakajaribu kuniua. 22Mungu amenisaidia, na mpaka siku hii ya leo nimesimama hapa nikiwashuhudia watu wa hali ya chini na wa hali ya juu pia. Sisemi kitu zaidi ya yale ambayo manabii na Musa walitabiri: 23kwamba Kristo lazima ateswe, na kwamba, akiwa wa kwanza kufufuka kutoka kwa wafu, yeye angetangaza nuru kwa watu wetu wenyewe na kwa watu wa mataifa.”

24Paulo alipokuwa akisema hayo katika kujitetea, Festo alipaza sauti, “Umerukwa na akili, Paulo! Elimu yako kubwa inakusukuma kwenye wazimu.” 25“Sina wazimu, Mheshimiwa Festo,” Paulo akajibu. “Maneno ninayosema ni kweli na ni ya busara. 26Mfalme anayafahamu mambo haya, na ndiyo sababu ninaweza kusema naye waziwazi. Nina hakika kwamba hakuna lolote kati ya haya lililompita. Hata hivyo, halikutendeka katika pembe fulani iliyojificha. 27Mfalme Agripa, je, unawaamini manabii? Najua kwamba unawaamini.” 28Agripa akamwambia Paulo, “Kwa muda mfupi hivi unataka kunishawishi niwe Mkristo!” 29Paulo akajibu, “Iwe itachukua muda mfupi au mrefu, ombi langu kwa Mungu ni kwamba si wewe peke yako, bali kila mmoja anayenisikiliza leo, awe kama mimi nilivyo, ila bila minyororo hii.”

30Kisha mfalme akasimama, pamoja na mkuu wa mkoa, Bernike na wale waliokuwa wameketi pamoja nao. 31Walipokwisha kutoka nje, wakaambiana, “Hakuna jambo analolifanya mtu huyu linalostahili kifo au kifungo.” 32Agripa akamwambia Festo, “Mtu huyu angeweza kuwa huru, kama asingalikata rufaa kwa Kaisari.”