Matendo 5

1Hata hivyo, mtu mmoja aitwaye Anania aliuza kiwanja pamoja na mkewe Safira. 2Akajiwekea kwa siri sehemu ya fedha walizopata, na mkewe alijua jambo hilo. Kisha akaleta sehemu iliyobaki, akaiweka miguuni pa mitume. 3Petro alisema, “Anania, kwa nini Shetani ameujaza moyo wako hata ukamwongopea Roho Mtakatifu, ukajiwekea sehemu ya thamani ya kiwanja? 4Kabla hakijauzwa, je, hakikuwa chako? Na baada ya kukiuza, je, fedha hazikuwa zako kuzitumia upendavyo? Kwa nini uliamua moyoni mwako kufanya jambo hili? Hukuwaongopea wanadamu, bali umemwongopea Mungu.” 5Anania aliposikia maneno hayo alianguka, akafa, na hofu kubwa ikawaingia wote waliosikia habari hiyo. 6Vijana walisimama, wakamzungushia sanda, wakamtoa nje, wakamzika.

7Baada ya kama saa tatu hivi, mkewe alifika, bila kujua yaliyokuwa yametokea. 8Petro alimwuliza, “Niambie, je, ninyi wawili mliuza kiwanja kwa kiasi hiki?” “Ndiyo,” akajibu, “hiyo ndiyo bei.” 9Petro akamwambia, “Kwa nini ninyi wawili mlikubaliana kumjaribu Roho wa Bwana? Tazama, wale waliomzika mumeo tayari wako mlangoni. Watakutoa nje wewe pia.” 10Mara moja alianguka miguuni pa Petro, akafa. Vijana walipoingia walimkuta amekufa, wakamtoa nje, wakamzika kando ya mumewe. 11Kanisa lote lilijawa na hofu kubwa, pamoja na wote waliosikia habari za mambo hayo.

12Kwa mikono ya mitume ishara nyingi na maajabu yalitendeka kati ya watu. Waumini wote walikutana kwa nia moja katika Ukumbi wa Sulemani. 13Hakuna hata mmoja wa wale wengine aliyethubutu kujiunga nao, ingawa watu waliwasifu sana. 14Waumini wengi zaidi waliletwa kwa Bwana, idadi kubwa ya wanaume na wanawake pia. 15Watu walifikia hata kuwaleta wagonjwa wao barabarani na kuwalaza juu ya vitanda na machela, wakitumaini kwamba Petro akipita, angalau kivuli chake kiwaangukie baadhi yao. 16Watu wengi walimiminika pia kutoka miji iliyo karibu na Yerusalemu. Waliwaleta wagonjwa na wale waliosumbuliwa na pepo wachafu, na wote waliponywa.

17Lakini kuhani mkuu aliinuka kuchukua hatua, pamoja na wote waliokuwa upande wake, yaani kundi la Masadukayo. Wakiwa wamejaa wivu, 18waliwakamata mitume na kuwafunga katika gereza la umma. 19Lakini usiku ule malaika wa Bwana alifungua milango ya gereza. Akawatoa nje, akawaambia, 20“Nendeni mkasimame hekaluni, mkawaambie watu ujumbe wote wa uzima huu.” 21Waliposikia hayo, waliingia hekaluni alfajiri, wakaanza kufundisha. Wakati huo kuhani mkuu na wenzake walifika. Wakaitisha Baraza Kuu pamoja na wazee wote wa Israeli, wakatuma watu gerezani kuwaleta mitume. 22Walinzi walikwenda, lakini hawakuwakuta mitume gerezani. Wakarudi na taarifa hii: 23“Tulipofika tulikuta gereza limefungwa barabara, na askari walikuwa wamesimama zamuni milangoni. Lakini tulipofungua hatukumkuta mtu yeyote ndani.” 24Taarifa hiyo iliwaacha mkuu wa walinzi wa hekalu na wakuu wa makuhani wakiwa wamefadhaika juu ya mitume, bila kujua mambo hayo yangeishia wapi. 25Kisha mtu mmoja alifika na habari kwao: “Wale watu mliowafunga gerezani wako hekaluni sasa hivi, wamesimama wakiwafundisha watu!” 26Basi mkuu wa walinzi alikwenda pamoja na walinzi wake, akawaleta mitume. Hawakutumia nguvu, kwa sababu waliwaogopa watu, wasije wakapigwa mawe.

27Waliwaleta, wakawasimamisha mbele ya Baraza Kuu. Kuhani mkuu alianza kuwahoji: 28“Tuliwapa amri kali mwache kufundisha kwa jina hili. Sasa tazameni: mafundisho yenu yameenea Yerusalemu yote, nanyi mmekusudia kututwika lawama ya damu ya mtu huyu.” 29Petro na mitume wengine walijibu, “Ni Mungu tunayepaswa kumtii kuliko wanadamu. 30Mungu wa mababu zetu alimfufua Yesu, ambaye ninyi mlimuua kwa kumtundika juu ya mti. 31Huyu ndiye ambaye Mungu amemwinua hadi upande wake wa kulia kuwa Kiongozi na Mwokozi, ili awajalie Israeli toba na msamaha wa dhambi. 32Sisi wenyewe tunashuhudia mambo haya, na Roho Mtakatifu pia, ambaye Mungu amewapa wote wanaomtii.”

33Wajumbe wa Baraza Kuu waliposikia hayo walighadhibika, wakataka kuwaua mitume. 34Lakini mmoja wa Baraza Kuu alisimama, Farisayo aitwaye Gamalieli, mwalimu wa sheria aliyeheshimiwa na watu wote. Aliagiza watu hao watolewe nje kwa muda mfupi, 35kisha akaliambia Baraza Kuu, “Enyi watu wa Israeli, angalieni sana jinsi mtakavyowashughulikia watu hawa. 36Siku za nyuma Theuda alijitokeza, akijifanya kuwa mtu mkubwa, na wanaume wapatao mia nne wakamfuata. Aliuawa, na wale wote waliofuata uongozi wake wakatawanyika, na hakuna kilichobaki. 37Baada yake alitokea Yuda Mgalilaya, wakati wa kuandikishwa kwa watu, akawavuta watu wamfuate. Yeye naye aliangamia, na wote waliokuwa wamemfuata walitawanyika huku na huko. 38Kwa hiyo, hili ndilo ninalowaambia sasa: kaeni mbali na watu hawa, waacheni. Ikiwa mpango huu au kazi hii ina chanzo cha kibinadamu, itasambaratika; 39lakini ikiwa inatoka kwa Mungu, hamtaweza kuwaangamiza. Huenda hata mkajikuta mnapigana vita na Mungu.” Maneno ya Gamalieli yaliwashawishi. 40Waliwaita mitume, wakaamuru wapigwe, kisha wakawaamuru waache kusema kwa jina la Yesu. Halafu wakawaachilia. 41Mitume walitoka mbele ya Baraza Kuu wakiwa na furaha, kwa kuwa walikuwa wameonekana kuwa wanafaa kubeba aibu kwa ajili ya Jina. 42Kila siku, hekaluni na katika nyumba za watu, waliendelea kufundisha bila kukoma, na kuhubiri habari njema kwamba Kristo ni Yesu.