Matendo 22

1“Ndugu zangu na akina baba, sikilizeni sasa utetezi ninaoutoa mbele yenu.”

2Waliposikia akisema nao kwa Kiebrania, wakazidi kunyamaza. Kisha akaendelea: 3“Mimi ni Myahudi, niliyezaliwa Tarso huko Kilikia, lakini nililelewa hapa katika mji huu. Nilisoma miguuni pa Gamalieli, nikafundishwa kwa usahihi mkubwa sheria ya baba zetu. Nilikuwa na juhudi kwa ajili ya Mungu kama kila mmoja wenu alivyo leo. 4Niliitesa Njia hii hata kufikia kuua watu, nikiwafunga minyororo wanaume kwa wanawake na kuwakabidhi gerezani. 5Kuhani mkuu mwenyewe anaweza kuthibitisha hilo, na baraza lote la wazee pia. Kutoka kwao nilipokea hata barua kwa ndugu zetu Wayahudi huko Dameski, nikaenda huko ili niwalete watu wa huko Yerusalemu wakiwa wamefungwa minyororo, ili waadhibiwe.

6Nilipokuwa njiani nikikaribia Dameski, yapata saa sita mchana, ghafla nuru kali kutoka mbinguni ilinimulika pande zote. 7Nikaanguka chini, nikasikia sauti ikiniambia, ‘Sauli, Sauli, kwa nini unanitesa?’ 8Nikajibu, ‘Bwana, wewe ni nani?’ Akaniambia, ‘Mimi ni Yesu wa Nazareti, yule unayemtesa.’ 9Wenzangu waliiona ile nuru, lakini hawakuisikia sauti ya yule aliyekuwa akisema nami. 10Nikauliza, ‘Nifanye nini, Bwana?’ Bwana akanijibu, ‘Inuka, uende mpaka Dameski. Huko utaambiwa yote uliyopangiwa kufanya.’ 11Utukufu wa nuru ile ulikuwa umeniacha nisiweze kuona, kwa hiyo wenzangu wakaniongoza kwa mkono, nikafika Dameski. 12Kulikuwa na mtu mmoja aitwaye Anania, mcha Mungu aliyeishika sheria, mwenye sifa njema kwa Wayahudi wote walioishi huko. 13Alinijia, akasimama karibu nami, akasema, ‘Ndugu Sauli, ona tena!’ Saa ile ile nikapata kuona, nikamtazama. 14Kisha akasema, ‘Mungu wa baba zetu amekuchagua tangu mwanzo ili ujue mapenzi yake, umwone yule Mwenye Haki, na usikie maneno kutoka kinywani mwake. 15Utakuwa shahidi wake kwa watu wote, ukiwaeleza yale uliyoyaona na kuyasikia. 16Sasa unangoja nini tena? Inuka ubatizwe. Dhambi zako zioshwe mbali unapoliitia jina lake.’

17Baada ya kurudi Yerusalemu, nilikuwa nikiomba hekaluni, nikazama katika mzubao. 18Nikamwona Bwana, naye akaniambia, ‘Fanya haraka! Ondoka Yerusalemu mara moja, kwa sababu watu wa hapa hawatayakubali yale unayowaambia juu yangu.’ 19Nikajibu, ‘Bwana, watu hawa wanajua vizuri nilichofanya. Katika sinagogi moja baada ya jingine niliwafunga gerezani na kuwachapa viboko wale wanaokuamini wewe. 20Stefano, shahidi wako, alipouawa na damu yake kumwagwa, mimi mwenyewe nilikuwepo. Nilikubaliana na walichofanya, na nikayalinda mavazi ya nje ya wale waliomwua.’ 21Kisha akaniambia, ‘Nenda! Mimi nitakutuma mbali, kwa watu wa mataifa.’”

22Umati ulimsikiliza mpaka aliposema hivyo. Kisha wakapiga kelele, “Mwondoe mtu kama huyu katika uso wa dunia! Hakustahili kuachwa aishi!” 23Waliendelea kupiga makelele, wakitupa mavazi yao ya nje na kurusha mavumbi hewani. 24Kwa hiyo kamanda aliamuru Paulo aingizwe ndani ya ngome. Akaagiza ahojiwe huku akichapwa mijeledi, ili ajue kwa nini watu walikuwa wakimpigia kelele namna hiyo. 25Walipokuwa wamekwisha kumnyoosha na kumfunga kwa kamba za ngozi, Paulo alimwambia yule akida aliyesimama pale, “Je, sheria inawaruhusu kumchapa mijeledi raia wa Rumi, tena ambaye hajahukumiwa?” 26Akida aliposikia hayo, alimwendea kamanda, akamwambia, “Unakaribia kufanya nini hiki? Mtu huyu ni raia wa Rumi!” 27Kamanda akaja, akamwuliza, “Niambie, wewe ni raia wa Rumi?” Akasema, “Ndiyo.” 28Kamanda akajibu, “Mimi ilinigharimu fedha nyingi sana kupata uraia huu.” Paulo akajibu, “Lakini mimi ni raia kwa kuzaliwa.” 29Mara moja wale waliokuwa karibu kumhoji wakajitenga naye. Kamanda naye akaogopa alipotambua kwamba Paulo ni raia wa Rumi, kwa kuwa alikuwa amemfunga.

30Kesho yake kamanda alitaka kujua sababu halisi ya mashtaka ambayo Wayahudi walikuwa wakimletea Paulo. Kwa hiyo akamfungua minyororo, akaamuru wakuu wa makuhani na Baraza Kuu lote wakutane. Kisha akamteremsha Paulo, akamsimamisha mbele yao.