Matendo 7

1Kuhani mkuu aliuliza, “Je, mashtaka haya ni ya kweli?” 2Stefano alijibu, “Ndugu zangu na akina baba, sikilizeni. Mungu wa utukufu alimtokea baba yetu Ibrahimu alipokuwa bado Mesopotamia, kabla hajaenda kukaa Harani. 3Mungu alimwambia, ‘Toka katika nchi yako na kwa jamaa zako, uende katika nchi nitakayokuonyesha.’ 4Basi aliondoka katika nchi ya Wakaldayo, akaenda kukaa Harani. Baada ya kifo cha baba yake, Mungu alimhamisha kutoka huko akamleta katika nchi hii mnayoishi sasa. 5Hakumpa sehemu yoyote ya nchi hii iwe urithi wake, hata mahali pa kuweka mguu mmoja. Lakini aliahidi kumpa nchi hiyo iwe milki yake na ya wazao wake baada yake, ingawa wakati huo Ibrahimu hakuwa na mtoto. 6Mungu alisema hivi: wazao wake wangeishi kama wageni katika nchi ya watu wengine, na wenyeji wa nchi hiyo wangewafanya watumwa na kuwatendea ukatili kwa miaka mia nne. 7‘Lakini taifa lile watakalolitumikia kama watumwa nitalihukumu,’ Mungu alisema, ‘na baadaye watatoka, waniabudu mahali hapa.’ 8Mungu alimpa pia agano lenye alama ya tohara. Kwa hiyo Isaka alipozaliwa kwa Ibrahimu, alimtahiri siku ya nane. Isaka naye akamzaa Yakobo, na Yakobo akawazaa wale mababa wakuu kumi na wawili.

9Mababa wakuu hao walimwonea wivu Yusufu, wakamwuza akapelekwa Misri. Lakini Mungu alikuwa pamoja naye, 10akamwokoa katika taabu zake zote. Alimpa kibali na hekima mbele ya Farao, mfalme wa Misri, naye Farao akamfanya kuwa mtawala wa Misri na wa watu wote wa nyumba yake. 11Kisha njaa ilitokea katika nchi yote ya Misri na Kanaani, ikaleta dhiki kubwa, na mababu zetu hawakuweza kupata chakula. 12Yakobo aliposikia kwamba kulikuwa na nafaka Misri, aliwatuma mababu zetu huko safari ya kwanza. 13Katika safari yao ya pili Yusufu aliwajulisha ndugu zake yeye ni nani, na Farao akapata habari za jamaa ya Yusufu. 14Yusufu alituma watu kumwita Yakobo baba yake pamoja na jamaa zake wote, watu sabini na watano kwa jumla, 15naye Yakobo akashuka Misri. Huko alikufa, na mababu zetu pia wakafa. 16Walichukuliwa kurudishwa Shekemu, wakazikwa katika kaburi ambalo Ibrahimu alikuwa amelinunua kwa kiasi cha fedha kutoka kwa wana wa Hamori huko Shekemu.

17Wakati ulipokuwa ukikaribia wa kutimizwa ahadi ambayo Mungu alikuwa amemwahidi Ibrahimu, watu waliongezeka na kuwa wengi sana huko Misri, 18mpaka mfalme mwingine alipoanza kutawala Misri, mfalme ambaye hakujua lolote kuhusu Yusufu. 19Mfalme huyo alifanya hila dhidi ya watu wetu, akawatendea mababu zetu ukatili. Aliwalazimisha kuwaacha nje watoto wao wachanga ili wafe. 20Wakati huo ndipo Musa alipozaliwa, naye alikuwa mtoto mzuri mbele za Mungu. Kwa miezi mitatu alitunzwa nyumbani mwa baba yake. 21Alipoachwa nje, binti Farao alimchukua, akamlea kama mwanawe mwenyewe. 22Musa alifunzwa hekima yote ya Wamisri, naye alikuwa na uwezo katika maneno yake na katika matendo yake.

23Alipofikia umri wa miaka arobaini, aliazimu moyoni mwake kwenda kuwatembelea ndugu zake, watu wa Israeli. 24Alipomwona mmoja wao akidhulumiwa, aliingilia kati kumtetea. Akampiga yule Mmisri hata akafa, akamlipizia kisasi yule mtu aliyekuwa akionewa. 25Alidhani ndugu zake wangetambua kwamba Mungu alikuwa akiwaletea wokovu kupitia mkono wake, lakini hawakutambua. 26Siku iliyofuata aliwakuta baadhi yao wakipigana, akajaribu kuwapatanisha warudiane kwa amani: ‘Wanaume, ninyi ni ndugu. Kwa nini mnatendeana mabaya?’ 27Lakini yule aliyekuwa akimwonea jirani yake alimsukuma Musa kando, akasema, ‘Nani aliyekuweka wewe kuwa mtawala na mwamuzi juu yetu? 28Je, unakusudia kuniua kama ulivyomwua yule Mmisri jana?’ 29Musa aliposikia maneno hayo alikimbia, akaishi kama mgeni katika nchi ya Midiani, ambako alipata wana wawili.

30Miaka arobaini mingine ilipopita, malaika alimtokea katika nyika ya Mlima Sinai, katika mwali wa moto ndani ya kichaka. 31Musa alipoliona jambo hilo alishangaa sana. Alipokaribia ili atazame, sauti ya Bwana ilimjia: 32‘Mimi ni Mungu wa mababu zako, Mungu wa Ibrahimu, Isaka na Yakobo.’ Musa alishikwa na kutetemeka, wala hakuthubutu kutazama. 33Bwana alimwambia, ‘Vua viatu vyako miguuni, kwa sababu mahali unaposimama ni ardhi takatifu. 34Nimeona, naam, nimeona ukatili wanaotendewa watu wangu huko Misri. Nimesikia kuugua kwao, nami nimeshuka ili kuwaokoa. Basi sasa njoo; nitakutuma Misri.’

35Huyu ndiye Musa yule waliyemkataa kwa maneno haya: ‘Nani aliyekufanya mtawala na mwamuzi?’ Mungu alimtuma mtu huyu huyu kuwa mtawala na mkombozi, kwa msaada wa malaika aliyemtokea katika kichaka. 36Yeye ndiye aliyewatoa, akifanya maajabu na ishara katika nchi ya Misri, kwenye Bahari ya Shamu, na nyikani kwa miaka arobaini. 37Huyu ndiye Musa aliyewaambia watu wa Israeli, ‘Mungu atawainulia nabii kama mimi kutoka miongoni mwa watu wenu wenyewe.’ 38Yeye alikuwa katika kusanyiko lile huko nyikani, pamoja na malaika aliyesema naye katika Mlima Sinai na pamoja na mababu zetu, naye alipokea maneno yaliyo hai ili atupatie sisi. 39Lakini mababu zetu hawakukubali kumtii. Walimsukuma kando, na mioyo yao ikarudi Misri. 40Walimwambia Haruni, ‘Tutengenezee miungu itakayotuongoza njia. Kwa maana huyu Musa aliyetutoa katika nchi ya Misri, hatujui kilichompata.’ 41Wakati huo ndipo walipotengeneza ndama. Wakaitolea sanamu hiyo dhabihu, wakafanya sherehe kwa ajili ya kazi ya mikono yao. 42Kwa hiyo Mungu aliwapa kisogo, akawaacha waabudu nyota za angani, kama ilivyoandikwa katika kitabu cha manabii: ‘Je, mliniletea wanyama waliochinjwa na dhabihu kwa miaka arobaini nyikani, enyi nyumba ya Israeli? 43Mliinua hema ya Moleki na nyota ya mungu Refani, sanamu mlizozitengeneza ili kuzisujudia. Kwa hiyo nitawapeleka uhamishoni mbali kupita Babeli.’

44Huko nyikani mababu zetu walikuwa na hema ya ushuhuda, iliyotengenezwa kama alivyoagiza yule aliyesema na Musa, kwa kufuata mfano ambao Musa alikuwa ameuona. 45Mababu zetu waliipokea kwa zamu yao, wakaiingiza nchini pamoja na Yoshua walipochukua nchi za mataifa ambayo Mungu aliyafukuza mbele yao. Ndivyo ilivyokuwa mpaka siku za Daudi. 46Mungu alimtazama Daudi kwa kibali, naye Daudi akaomba ruhusa ya kumtafutia Mungu wa Yakobo makao. 47Lakini ni Sulemani aliyemjengea nyumba. 48Hata hivyo Aliye Juu Kabisa hakai katika majengo yaliyojengwa kwa mikono ya watu, kama nabii asemavyo: 49‘Mbingu ni kiti changu cha enzi, na dunia ni kiti cha kuwekea miguu yangu. Mngeweza kunijengea nyumba ya namna gani, asema Bwana, au ni mahali gani pangekuwa pa pumziko langu? 50Je, haukuwa mkono wangu uliofanya vitu hivi vyote?’ 51Jinsi mlivyo wakaidi! Mioyo yenu na masikio yenu hayajatahiriwa. Siku zote mnapigana na Roho Mtakatifu, nanyi mnafanya yale yale waliyofanya mababu zenu. 52Ni nabii yupi aliyeepuka kuteswa na mababu zenu? Waliwaua wale waliotabiri mapema kuja kwa yule Mwenye Haki, na sasa ninyi mmekuwa wasaliti wake na wauaji wake. 53Mlipokea sheria iliyoletwa kupitia malaika, lakini hamkuishika.”

54Waliposikia maneno hayo, walijawa na ghadhabu kali, wakamsagia Stefano meno. 55Stefano, akiwa amejaa Roho Mtakatifu, alikaza macho yake mbinguni. Akaona utukufu wa Mungu, na Yesu amesimama upande wa kulia wa Mungu. 56Akasema, “Tazameni! Naona mbingu zimefunguka wazi, na Mwana wa Adamu amesimama upande wa kulia wa Mungu.” 57Walipiga kelele kubwa, wakaziba masikio yao, wakamvamia wote kwa pamoja. 58Wakamtoa nje ya mji, wakaanza kumpiga kwa mawe. Mashahidi waliweka mavazi yao ya nje miguuni pa kijana mmoja jina lake Sauli. 59Walipokuwa wakimpiga Stefano kwa mawe, yeye aliomba kwa sauti, “Bwana Yesu, pokea roho yangu.” 60Kisha akapiga magoti, akapaza sauti kwa nguvu, “Bwana, usiwahesabie dhambi hii.” Alipokwisha kusema hayo, akalala.