Matendo 11

1Mitume na ndugu waliokuwa kote katika Uyahudi walipata habari kwamba hata watu wa mataifa walikuwa wamelipokea neno la Mungu. 2Petro aliporudi Yerusalemu, waumini waliotahiriwa walimlaumu. 3Walisema, “Uliingia nyumbani mwa watu wasiotahiriwa, ukaketi kula pamoja nao!” 4Ndipo Petro akawaeleza kila kitu hatua kwa hatua, tangu mwanzo. 5“Nilikuwa katika mji wa Yafa nikiomba, nikazama katika mzubao, nikaona maono. Kitu kama shuka kubwa, kilichoshikwa kwa pembe zake nne, kilikuwa kikiteremshwa kutoka mbinguni, nacho kikanifikia kabisa. 6Nilipoikazia macho na kuichunguza kwa makini, niliona wanyama wa nchi wenye miguu minne, wanyama wa porini, viumbe vitambaavyo ardhini, na ndege wa angani. 7Kisha nikasikia pia sauti ikiniambia, ‘Inuka, Petro! Chinja ule.’ 8Lakini nilijibu, ‘La hasha, Bwana! Hakuna kitu najisi wala kichafu kilichowahi kuingia kinywani mwangu.’ 9Kwa mara ya pili sauti ilisema kutoka mbinguni, ‘Kile ambacho Mungu amekifanya safi, wewe usikiite najisi.’ 10Hili lilitokea mara tatu, kisha vyote vikavutwa tena kurudi mbinguni. 11Wakati huo huo watu watatu walifika kwenye nyumba tuliyokuwamo. Walikuwa wametumwa kwangu kutoka Kaisaria. 12Roho aliniambia niende pamoja nao bila kufanya tofauti yoyote kati yao na sisi. Ndugu hawa sita pia walisafiri pamoja nami, tukaingia nyumbani mwa mtu huyo. 13Alitueleza jinsi alivyomwona malaika amesimama nyumbani mwake, akamwambia, ‘Tuma watu Yafa wamlete Simoni, anayeitwa pia Petro. 14Yeye atakuambia maneno ambayo kwa hayo utaokolewa, wewe pamoja na watu wote wa nyumbani mwako.’ 15Nilikuwa ndiyo kwanza nimeanza kuzungumza, na Roho Mtakatifu akaja juu yao, sawasawa na alivyokuja juu yetu hapo mwanzo. 16Kisha nikayakumbuka maneno ya Bwana, ‘Yohana alibatiza kwa maji, lakini ninyi mtabatizwa kwa Roho Mtakatifu.’ 17Basi, ikiwa Mungu aliwapa wao zawadi ileile aliyotupa sisi tulipomwamini Bwana Yesu Kristo, mimi nilikuwa nani? Je, ningeweza kumzuia Mungu?” 18Waliposikia hayo, walinyamaza, wakamtukuza Mungu, wakisema, “Kumbe Mungu amewajalia hata watu wa mataifa toba inayoleta uzima!”

19Wakati huo waumini waliokuwa wametawanyika kwa sababu ya dhiki iliyotokea kuhusu Stefano walifika hadi Foinike, Kipro na Antiokia. Waliwaambia ujumbe huo Wayahudi tu, wala si mtu mwingine yeyote. 20Hata hivyo, baadhi yao walikuwa watu wa Kipro na Kirene. Walipofika Antiokia, waliwaambia pia watu wa mataifa wanaozungumza Kigiriki, wakawahubiri habari njema ya Bwana Yesu. 21Mkono wa Bwana ulikuwa nao, na idadi kubwa ya watu iliamini na kumgeukia Bwana. 22Habari hizo zilifika kwa kanisa la Yerusalemu, nalo likamtuma Barnaba aende Antiokia. 23Alipowasili na kuiona neema ya Mungu, alifurahi sana. Aliendelea kuwatia moyo wote washikamane na Bwana kwa moyo thabiti, 24kwa kuwa alikuwa mtu mwema, mwenye kujawa na Roho Mtakatifu na imani. Hivyo kundi kubwa la watu liliongezwa kwa Bwana. 25Kisha Barnaba alikwenda Tarso kumtafuta Sauli, 26na alipomwona, akamleta Antiokia. Kwa muda wa mwaka mzima wawili hao walishiriki mikutano ya kanisa na kufundisha kundi kubwa la watu. Ni huko Antiokia ambapo wanafunzi walianza kujulikana kwa jina la Wakristo.

27Wakati huo manabii kadhaa walishuka kutoka Yerusalemu wakaja Antiokia. 28Mmoja wao, aitwaye Agabo, alisimama, na kwa uongozi wa Roho akatabiri kwamba njaa kubwa ingeupata ulimwengu wote. Njaa hiyo ilikuja kweli katika siku za utawala wa Kaisari Klaudio. 29Wanafunzi waliamua kwamba kila mmoja wao, kwa kadiri ya uwezo wake, atatuma msaada kwa ajili ya ndugu walioishi Uyahudi. 30Nao walifanya hivyo, wakaupeleka msaada huo kwa wazee mikononi mwa Barnaba na Sauli.