Matendo 14

1Huko Ikonio wale wawili waliingia pamoja katika sinagogi la Wayahudi. Walihubiri kwa namna ambayo kundi kubwa la Wayahudi na Wagiriki liliamini. 2Lakini Wayahudi waliokataa kuamini waliwachochea watu wa mataifa, wakaitia sumu mioyo yao dhidi ya ndugu. 3Basi walikaa huko muda mrefu, wakinena kwa ujasiri, wakimtegemea Bwana. Bwana alilishuhudia neno la neema yake kwa kuwajalia ishara na maajabu kutendeka kwa mikono yao. 4Watu wa mji waligawanyika: wengine waliwaunga mkono Wayahudi, na wengine mitume. 5Watu wa mataifa na Wayahudi, pamoja na viongozi wao, walipokuwa wakijiandaa kuwatendea mitume jeuri na kuwapiga kwa mawe, 6mitume walipata habari, wakakimbilia Listra na Derbe, miji ya Likaonia, na eneo lililoizunguka. 7Huko waliendelea kuhubiri habari njema.

8Huko Listra kulikuwa na mtu mmoja aliyekuwa ameketi, asiyeweza kutumia miguu yake. Alikuwa kiwete tangu kuzaliwa, wala hakuwa amewahi kupiga hatua hata moja. 9Mtu huyo alikuwa akimsikiliza Paulo alipokuwa akihubiri. Paulo alimkazia macho, akaona kwamba alikuwa na imani ya kuponywa. 10Basi akasema kwa sauti kuu, “Simama wima kwa miguu yako!” Yule mtu akaruka juu, akaanza kutembea. 11Makutano walipoona alichofanya Paulo, walipaza sauti zao kwa lugha ya Kilikaonia, “Miungu wamechukua umbo la wanadamu, wameshuka kwetu!” 12Wakaanza kumwita Barnaba Zeusi, na Paulo Herme, kwa sababu Paulo ndiye aliyekuwa msemaji mkuu. 13Zeusi alikuwa na hekalu mbele ya mji. Kuhani wake alileta mafahali na mashada ya maua mpaka kwenye malango ya mji, kwa kuwa yeye na makutano walikusudia kutoa dhabihu. 14Lakini mitume Barnaba na Paulo walisikia habari hiyo. Wakararua mavazi yao, wakaingia mbio katikati ya umati wakipaza sauti, 15“Enyi watu, mbona mnafanya mambo haya? Sisi pia ni wanadamu tu, wenye hali ileile kama ninyi. Tumekuja na habari njema, tukiwaita mwache mambo haya yasiyo na faida, mmgeukie Mungu aliye hai, aliyeumba mbingu na dunia na bahari, na kila kitu kilichomo ndani yake. 16Katika vizazi vilivyopita aliyaacha mataifa yote yafuate njia zao wenyewe. 17Hata hivyo, hakujiacha bila ushahidi. Anawatendea mema: anawapa mvua kutoka angani na majira ya mavuno, anawashibisha kwa chakula na kuijaza mioyo yenu furaha.” 18Hata kwa maneno hayo, waliweza kwa shida tu kuyazuia makutano wasiwatolee dhabihu.

19Lakini Wayahudi kutoka Antiokia na Ikonio walifika, wakayashawishi makutano. Wakampiga Paulo kwa mawe, wakamkokota nje ya mji, wakidhani kwamba amekufa. 20Lakini wanafunzi walipokuwa wamesimama wakimzunguka, aliinuka, akarudi mjini. Siku iliyofuata aliondoka pamoja na Barnaba kwenda Derbe.

21Walihubiri habari njema katika mji huo, wakafanya wanafunzi wengi. Kisha wakarudi Listra, Ikonio na Antiokia. 22Waliwaimarisha wanafunzi katika nafsi zao na kuwahimiza wadumu katika imani, wakisema, “Imetupasa kupitia dhiki nyingi ndipo tuingie katika ufalme wa Mungu.” 23Katika kila kanisa waliwachagulia waumini wazee, na baada ya kuomba na kufunga, wakawaweka chini ya ulinzi wa Bwana waliyekuwa wamemwamini. 24Walipita katika Pisidia, wakafika Pamfilia. 25Walipokwisha kulihubiri neno huko Perge, walishuka mpaka Atalia. 26Kutoka huko walisafiri kwa meli kwenda Antiokia, mahali ambapo hapo mwanzo walikuwa wamekabidhiwa kwa neema ya Mungu kwa ajili ya kazi ambayo sasa walikuwa wameimaliza. 27Walipofika, walilikusanya kanisa, wakaeleza yote ambayo Mungu alikuwa amefanya akitenda kazi pamoja nao, na jinsi alivyowafungulia watu wa mataifa mlango wa imani. 28Wakakaa huko pamoja na wanafunzi kwa muda mrefu.