Matendo 17

1Walisafiri kupitia Amfipoli na Apolonia, wakafika Thesalonike, ambako Wayahudi walikuwa na sinagogi. 2Kama ilivyokuwa desturi yake, Paulo aliingia katika sinagogi, na kwa Sabato tatu akajadiliana nao kutoka katika Maandiko, 3akiyafafanua na kuonyesha wazi kwamba ilimpasa Kristo kuteswa na kufufuka kutoka kwa wafu. Akasema, “Yesu huyu ninayewatangazia ndiye Kristo.” 4Baadhi ya Wayahudi walisadiki, wakajiunga na Paulo na Sila; vivyo hivyo Wagiriki wengi waliomcha Mungu, na wanawake wengi mashuhuri wa mji. 5Lakini Wayahudi waliona wivu. Wakawakusanya wahuni kadhaa wa sokoni, wakaunda kundi la fujo, wakaufanya mji wote kuwa na ghasia. Wakaivamia nyumba ya Yasoni, wakiwatafuta Paulo na Sila ili wawalete mbele ya watu. 6Walipowakosa, walimburuta Yasoni na baadhi ya ndugu mbele ya maafisa wa mji, wakipiga kelele, “Watu hawa ambao wamevuruga ulimwengu wote sasa wamefika hapa, 7na Yasoni amewakaribisha nyumbani kwake! Wote wanapinga amri za Kaisari, wakisema kwamba yuko mfalme mwingine, aitwaye Yesu.” 8Umati na maafisa wa mji waliposikia hayo, walifadhaika sana. 9Wakamtaka Yasoni na wale wengine walipe dhamana, kisha wakawaachilia.

10Usiku ule ule ndugu waliwapeleka Paulo na Sila Beroya bila kukawia. Walipofika huko, wakaenda katika sinagogi la Wayahudi. 11Wayahudi wa huko walikuwa na moyo wa kiungwana kuliko wale wa Thesalonike. Waliupokea ujumbe kwa hamu kubwa, na kila siku wakayachunguza Maandiko ili kuhakikisha kama aliyoyasema Paulo yalikuwa kweli. 12Hivyo wengi wao waliamini, pamoja na idadi kubwa ya wanawake wa Kigiriki wenye hadhi, na wanaume pia. 13Lakini Wayahudi wa Thesalonike walipogundua kwamba Paulo alikuwa akitangaza neno la Mungu huko Beroya pia, walikwenda huko nako, wakiuvuruga umati na kuchochea fujo. 14Mara moja ndugu walimpeleka Paulo kuelekea pwani, lakini Sila na Timotheo wakabaki nyuma. 15Wale waliokuwa wakimsindikiza Paulo walimfikisha hadi Athene. Kisha wakarudi wakiwa na maagizo kwa Sila na Timotheo kwamba wamfuate upesi iwezekanavyo.

16Paulo alipokuwa akiwasubiri huko Athene, alifadhaika sana rohoni alipoona jinsi mji ulivyojaa sanamu za miungu. 17Kwa hiyo alijadiliana katika sinagogi na Wayahudi na watu wa mataifa waliomcha Mungu, na kila siku sokoni na yeyote aliyepita pale. 18Baadhi ya wanafalsafa wa Kiepikureo na wa Kistoiko pia walijadiliana naye. Wengine wao walisema, “Huyu mwokotaji wa vipande vya mawazo anajaribu kusema nini?” Wengine walisema, “Anaonekana kuwa anaeneza habari za miungu ya kigeni.” Walisema hivyo kwa sababu alikuwa akihubiri habari njema kuhusu Yesu na ufufuo. 19Wakamchukua, wakampeleka mbele ya Areopago. Wakasema, “Je, tunaweza kujua mafundisho haya mapya unayoyafundisha ni yapi? 20Baadhi ya mambo tunayoyasikia kutoka kwako ni mageni masikioni mwetu, nasi tungependa kujua maana yake.” 21(Waathene wote, pamoja na wageni walioishi huko, hawakuwa na shughuli nyingine ya kupitisha muda isipokuwa kusimulia au kusikiliza wazo jipya la karibuni.)

22Paulo alisimama mbele ya Areopago, akasema, “Enyi watu wa Athene, naona kwamba kwa kila namna ninyi ni watu wa dini mno. 23Nilipokuwa nikitembea na kuvichunguza vitu mnavyoviabudu, niliona hata madhabahu yenye maandishi haya: ‘Kwa mungu asiyejulikana.’ Basi kile mnachokiabudu bila kukijua, mimi sasa nawajulisha. 24Mungu, aliyeuumba ulimwengu na vyote vilivyomo, yeye mwenyewe ni Bwana wa mbingu na nchi. Hakai katika mahekalu yaliyojengwa kwa mikono ya watu. 25Wala hahudumiwi na mikono ya wanadamu kana kwamba anapungukiwa na kitu, kwa maana ni yeye anayewapa wote uzima, pumzi na vitu vyote. 26Kutoka kwa babu mmoja aliyafanya mataifa yote ya wanadamu yakae juu ya uso wote wa dunia. Aliweka nyakati walizopangiwa na mipaka ya maeneo watakayoishi, 27ili wamtafute Mungu, na labda wapapase-papase kumwelekea na kumpata. Hata hivyo, yeye hayuko mbali na yeyote kati yetu. 28Ni ndani yake tunaishi, tunajongea na kuwako. Kama baadhi ya washairi wenu wenyewe walivyosema, ‘Sisi pia ni wazao wake.’ 29Basi ikiwa sisi ni wazao wa Mungu, hatupaswi kudhani kwamba asili ya Mungu inafanana na dhahabu, fedha au jiwe, vilivyochongwa kwa ufundi na ubunifu wa wanadamu. 30Mungu alizifumbia macho nyakati zile za kutojua, lakini sasa anawaamuru watu wote, kila mahali, watubu, 31kwa sababu ameweka siku atakayouhukumu ulimwengu kwa haki kupitia mtu aliyemteua. Naye amewapa watu wote hakikisho la jambo hilo kwa kumfufua mtu huyo kutoka kwa wafu.”

32Waliposikia habari za kufufuliwa kwa wafu, wengine walidhihaki, lakini wengine wakasema, “Tutakusikiliza kuhusu jambo hili wakati mwingine.” 33Basi Paulo akaondoka kati yao. 34Lakini watu kadhaa walijiunga naye wakaamini. Miongoni mwao alikuwa Dionisio, mjumbe wa baraza la Areopago, na mwanamke mmoja aitwaye Damari, na wengine pia.