Matendo 15

1Watu fulani walishuka kutoka Uyahudi, wakaanza kuwafundisha ndugu, “Msipotahiriwa kama desturi ya Musa inavyodai, hakuna njia ya ninyi kuokolewa.” 2Jambo hilo lilisababisha ugomvi mkali na mabishano kati yao na Paulo na Barnaba. Basi ikaamuliwa kwamba Paulo na Barnaba, pamoja na wengine kadhaa kati yao, wapande kwenda Yerusalemu kuwaeleza mitume na wazee swali hilo. 3Kanisa liliwasindikiza, na walipokuwa wakipita katika Foinike na Samaria, walieleza kwa kirefu jinsi watu wa mataifa walivyokuwa wakimgeukia Mungu. Habari hizo ziliwaletea ndugu wote furaha kubwa. 4Walipofika Yerusalemu, walikaribishwa na kanisa, mitume na wazee, nao wakawaeleza yote ambayo Mungu alikuwa amefanya akiwa pamoja nao. 5Kisha baadhi ya waumini waliotoka katika kundi la Mafarisayo walisimama, wakasisitiza, “Watu hawa wa mataifa lazima watahiriwe, na waamriwe kuishika sheria ya Musa.”

6Mitume na wazee walikutana kulifikiria jambo hilo. 7Baada ya mabishano marefu, Petro alisimama akawaambia, “Ndugu, mnajua kwamba siku za kwanza Mungu alinichagua miongoni mwenu ili watu wa mataifa walisikie neno la Injili kutoka kinywani mwangu na kuamini. 8Mungu, anayejua kila moyo, aliwashuhudia kwa kuwapa Roho Mtakatifu, kama alivyotupa sisi pia. 9Hakuweka tofauti yoyote kati yetu na wao, kwa sababu aliisafisha mioyo yao kwa imani. 10Basi kwa nini sasa mnamjaribu Mungu? Mnataka kuweka juu ya shingo za wanafunzi nira ambayo mababu zetu wala sisi wenyewe hatukuwa na nguvu ya kuibeba. 11La, tunaamini kwamba tunaokolewa kupitia neema ya Bwana Yesu, na wao wanaokolewa kwa namna ileile.”

12Kusanyiko lote likanyamaza. Kila mtu aliwasikiliza Barnaba na Paulo walipokuwa wakieleza ishara na maajabu ambayo Mungu alikuwa amefanya kati ya watu wa mataifa kupitia wao. 13Walipomaliza, Yakobo alijibu, “Ndugu, sikilizeni ninalotaka kusema. 14Simeoni ameeleza jinsi Mungu kwanza alivyowaangalia watu wa mataifa kwa wema, ili kujipatia kutoka kati yao watu watakaoitwa kwa jina lake. 15Maneno ya manabii yanakubaliana na jambo hili, kama ilivyoandikwa: 16‘Baada ya hayo nitarudi, nami nitaijenga upya hema ya Daudi iliyoanguka. Nitayajenga upya magofu yake na kuisimamisha tena, 17ili wanadamu wengine wote wamtafute Bwana, yaani mataifa yote yanayoitwa kwa jina langu, asema Bwana, anayefanya mambo haya, 18mambo yaliyojulikana tangu zamani.’ 19Basi uamuzi wangu ni kwamba tusiwawekee magumu watu wa mataifa wanaomgeukia Mungu. 20Badala yake tuwaandikie kwamba wajiepushe na vitu vilivyotiwa unajisi na sanamu, na uasherati, na nyama ya wanyama walionyongwa, na damu. 21Kwa maana tangu vizazi vya zamani Musa amehubiriwa katika kila mji, na maandiko yake yanasomwa kwa sauti katika masinagogi kila Sabato.”

22Kisha mitume na wazee, pamoja na kanisa lote, waliamua kuchagua watu miongoni mwao na kuwatuma Antiokia pamoja na Paulo na Barnaba. Waliwachagua Yuda, aitwaye Barsaba, na Sila, watu waliokuwa na nafasi za uongozi kati ya ndugu. 23Waliwapa barua hii: “Kutoka kwa mitume na wazee, ndugu zenu, kwa ndugu walio wa mataifa katika Antiokia, Siria na Kilikia: Salamu. 24Tumesikia kwamba baadhi ya watu waliotoka kwetu wamewasumbua kwa maneno yao na kuwavuruga mioyo, ingawa sisi hatukuwapa maagizo yoyote kama hayo. 25Kwa hiyo tumekubaliana kwa nia moja kuchagua watu na kuwatuma kwenu pamoja na Barnaba na Paulo tunaowapenda, 26watu ambao wameyatoa maisha yao kwa ajili ya jina la Bwana wetu Yesu Kristo. 27Kwa hiyo tunawatuma Yuda na Sila, nao watawaeleza mambo hayo hayo ana kwa ana. 28Roho Mtakatifu na sisi wenyewe tumeamua tusiwatwike mzigo wowote zaidi ya mambo haya ya lazima: 29jiepusheni na vyakula vilivyotolewa kwa sanamu, na damu, na nyama ya wanyama walionyongwa, na uasherati. Mkijilinda na mambo haya, mtakuwa mnatenda yaliyo mema. Kwaherini.”

30Basi watu hao waliagwa, wakashuka Antiokia. Huko waliikusanya jumuiya yote ya waumini, wakawapa ile barua. 31Walipoisoma, walifurahi kwa sababu ya faraja iliyowaletea. 32Yuda na Sila, ambao nao pia walikuwa manabii, walizungumza na ndugu kwa muda mrefu ili kuwatia moyo na kuwaimarisha. 33Walipokwisha kukaa huko kwa muda, ndugu waliwaaga kwa amani, wakarudi kwa wale waliokuwa wamewatuma. 35Paulo na Barnaba, kwa upande wao, walibaki Antiokia. Pamoja na wengine wengi, walifundisha neno la Bwana na kulihubiri kama habari njema.

36Siku kadhaa baadaye Paulo alimwambia Barnaba, “Haya, turudi tukawatembelee ndugu katika kila mji tulimolihubiri neno la Bwana, tuone wanavyoendelea.” 37Barnaba alitaka wamchukue pia Yohana, aitwaye Marko, aende pamoja nao. 38Lakini Paulo hakuona kuwa ni vema kumchukua mtu aliyewaacha huko Pamfilia, asiendelee pamoja nao katika kazi. 39Ugomvi ukawa mkali kiasi kwamba wawili hao walitengana. Barnaba alimchukua Marko, akasafiri kwa meli kwenda Kipro. 40Naye Paulo alimchagua Sila, akaondoka baada ya ndugu kumkabidhi kwa neema ya Bwana. 41Alipita katika Siria na Kilikia, akiyaimarisha makanisa.