Matendo 2

1Siku ya Pentekoste ilipofika, wote walikuwa wamekusanyika mahali pamoja. 2Ghafla sauti ilitoka mbinguni, kama ya upepo mkali ukivuma, ikaijaza nyumba nzima walimokuwa wameketi. 3Wakaona ndimi kama za moto zikigawanyika, na ulimi mmoja ukatua juu ya kila mmoja wao. 4Wote wakajazwa Roho Mtakatifu, wakaanza kusema kwa lugha nyingine, kama Roho alivyowapa maneno ya kusema.

5Huko Yerusalemu walikuwa wakiishi Wayahudi wacha Mungu kutoka kila taifa duniani. 6Sauti hiyo iliposikika, umati wa watu ulikusanyika, nao ukachanganyikiwa, kwa sababu kila mmoja aliwasikia wakisema kwa lugha yake mwenyewe. 7Wakiwa wameshangaa sana na kustaajabu, walisema, “Watu hawa wote wanaozungumza ni Wagalilaya, sivyo? 8Basi inawezekanaje kila mmoja wetu kuwasikia wakisema kwa lugha yetu ya asili? 9Sisi ni Waparthi, Wamedi na Waelami; tunaishi Mesopotamia, Uyahudi na Kapadokia, Ponto na Asia, 10Frigia na Pamfilia, Misri na sehemu za Libya karibu na Kirene; baadhi yetu ni wageni kutoka Roma, 11Wayahudi na watu walioingia dini ya Kiyahudi; sisi ni Wakrete na Waarabu. Hata hivyo tunawasikia wakisimulia kwa lugha zetu wenyewe matendo makuu ya Mungu!” 12Wote walistaajabu na kutatizika, wakaendelea kuulizana, “Jambo hili linamaanisha nini?” 13Lakini wengine waliwadhihaki, wakisema, “Wamekunywa divai tamu kupita kiasi!”

14Kisha Petro akasimama pamoja na wale Kumi na Mmoja, akapaza sauti, akawaambia, “Enyi Wayahudi, na nyote mnaoishi Yerusalemu, jueni jambo hili, na myasikilize maneno yangu kwa makini. 15Watu hawa hawajalewa kama mnavyodhani. Ni saa tatu asubuhi tu. 16Hapana, hili ndilo lililonenwa kupitia nabii Yoeli: 17‘Itakuwa hivi katika siku za mwisho, asema Mungu: Nitamimina Roho wangu juu ya wanadamu wote. Wana wenu na binti zenu watatabiri; vijana wenu wataona maono, na wazee wenu wataota ndoto. 18Katika siku zile nitamimina Roho wangu hata juu ya watumishi wangu, wanaume kwa wanawake, nao watatabiri. 19Nitafanya maajabu juu angani na ishara chini duniani: damu na moto na ukungu wa moshi. 20Jua litatiwa giza, na mwezi utakuwa damu, kabla ya kufika kwa siku ya Bwana iliyo kuu na yenye fahari. 21Ndipo kila atakayeliitia jina la Bwana ataokolewa.’

22Enyi Waisraeli, sikilizeni ninayosema: Yesu wa Nazareti alikuwa mtu ambaye Mungu alimthibitisha kwenu kwa matendo ya nguvu, maajabu na ishara ambazo Mungu alizifanya kupitia yeye kati yenu, kama mnavyojua vyema. 23Mungu alikuwa ameweka mpango huo na kuujua tangu mwanzo: Yesu alitolewa mikononi mwenu, nanyi, kwa mikono ya watu wasio na sheria, mkamgongomea msalabani na kumwua. 24Lakini Mungu alimfufua na kumweka huru kutoka katika maumivu ya mauti, kwa kuwa haikuwezekana mauti kumshikilia. 25Daudi anasema kuhusu yeye: ‘Nilimweka Bwana mbele ya macho yangu siku zote; akiwa upande wangu wa kulia, sitatikisika. 26Kwa hiyo moyo wangu umejaa furaha, na ulimi wangu unaimba kwa shangwe; hata mwili wangu utapumzika kwa tumaini, 27kwa kuwa hutaniacha Kuzimu, wala hutamwacha Mtakatifu wako aone kuoza. 28Umenifundisha njia zinazoelekea uzimani, na kuwa pamoja nawe kutanijaza furaha.’

29Ndugu, naweza kuwaambia waziwazi kuhusu babu yetu Daudi: alikufa akazikwa, na kaburi lake liko hapa kwetu hadi leo hii. 30Lakini alikuwa nabii, naye alijua kwamba Mungu alikuwa amemwapia kwa kiapo kwamba atamketisha mmoja wa wazao wake mwenyewe katika kiti chake cha enzi. 31Kwa hiyo aliona mambo yajayo, akanena kuhusu ufufuo wa Kristo: yeye hakuachwa Kuzimu, wala mwili wake haukuona kuoza. 32Ni Yesu huyu ambaye Mungu alimfufua, na kila mmoja wetu ni shahidi wa jambo hilo. 33Kwa hiyo sasa ameinuliwa hadi upande wa kulia wa Mungu. Alipokea kutoka kwa Baba Roho Mtakatifu aliyeahidiwa, na sasa amemimina hiki mnachokiona na kukisikia. 34Daudi mwenyewe hakupanda mbinguni, lakini anasema, ‘Bwana alimwambia Bwana wangu: “Keti upande wa kulia wangu 35hadi nitakapowaweka adui zako chini ya miguu yako kama kiti cha kuwekea miguu.”’ 36Basi nyumba yote ya Israeli ijue kwa uhakika: Mungu amemfanya yeye kuwa Bwana na Kristo, Yesu huyu ambaye ninyi mlimsulubisha.”

37Maneno hayo yaliwachoma mioyo yao. Wakamwuliza Petro na mitume wengine, “Ndugu, tufanye nini?” 38Petro akawajibu, “Tubuni, na kila mmoja wenu abatizwe katika jina la Yesu Kristo, ili dhambi zenu zisamehewe; nanyi mtampokea Roho Mtakatifu kama zawadi. 39Ahadi hii ni yenu na ya watoto wenu, na ya wote walio mbali, kila mtu ambaye Bwana Mungu wetu anamwita kwake.” 40Aliendelea kushuhudia kwa maneno mengine mengi, akawasihi tena na tena, “Kubalini kuokolewa kutoka kizazi hiki kipotovu!” 41Basi wale waliokubali maneno yake walibatizwa; siku ile watu wapatao elfu tatu waliongezwa kwao. 42Walijitoa kikamilifu kwa mafundisho ya mitume na kwa maisha ya kushirikiana, kwa kumega mkate pamoja na kwa maombi.

43Kila mtu alijawa na hofu kuu ya Mungu, na maajabu mengi na ishara vilifanyika kupitia mitume. 44Waumini wote walikaa pamoja, na walihesabu vyote walivyokuwa navyo kuwa mali ya wote. 45Waliuza mashamba na mali zao, wakagawa fedha kwa wote, kulingana na mahitaji ya kila mmoja. 46Siku baada ya siku waliendelea kukusanyika hekaluni kwa umoja; nyumbani walimega mkate, wakila chakula chao kwa mioyo yenye furaha na isiyo na hila, 47wakimsifu Mungu, na watu wote waliwaheshimu. Na kila siku Bwana aliongeza katika kundi lao watu wengine waliokuwa wakiokolewa.