Matendo 8

1Sauli, kwa upande wake, aliunga mkono kabisa kifo cha Stefano. Siku hiyo hiyo yalizuka mateso makali dhidi ya kanisa la Yerusalemu, na wote isipokuwa mitume walitawanyika katika maeneo ya mashambani ya Uyahudi na Samaria. 2Watu fulani wacha Mungu walimzika Stefano, wakamwombolezea kwa sauti kubwa. 3Lakini Sauli alianza kuliangamiza kanisa. Alikwenda nyumba kwa nyumba, akawaburuta nje wanaume na wanawake vilevile, akawatia gerezani.

4Wale waliokuwa wametawanyika walikwenda huku na huko, wakihubiri habari njema ya ujumbe huo. 5Filipo alishuka kwenda mji wa Samaria, akaanza kuwahubiri watu wa huko habari za Kristo. 6Makundi ya watu, wote kwa pamoja, waliyasikiliza kwa makini maneno ya Filipo, walipomsikia na kuona ishara alizofanya. 7Pepo wachafu waliwatoka watu wengi wakipiga makelele, na wengi waliopooza na viwete waliponywa. 8Kwa hiyo kukawa na furaha kubwa katika mji ule.

9Kulikuwa na mtu mmoja aitwaye Simoni, ambaye kwa muda fulani alikuwa akifanya uchawi katika mji huo na kuwastaajabisha watu wa Samaria. Alijifanya kuwa mtu mkubwa, 10na watu wote, tangu wadogo hadi wakubwa, walifuata maneno yake kwa hamu. Walisema, “Mtu huyu ni ile nguvu ya Mungu iitwayo Kuu.” 11Walimfuata kwa sababu kwa muda mrefu alikuwa amewastaajabisha kwa uchawi wake. 12Lakini Filipo alipohubiri habari njema za ufalme wa Mungu na za jina la Yesu Kristo, walimwamini, na wanaume na wanawake wakabatizwa. 13Hata Simoni mwenyewe aliamini, na baada ya kubatizwa alikaa karibu na Filipo. Alipoona ishara na matendo makuu ya nguvu yaliyokuwa yakitendeka, alistaajabu sana.

14Mitume waliokuwa Yerusalemu waliposikia kwamba Samaria imelikubali neno la Mungu, waliwatuma Petro na Yohana kwao. 15Hao wawili walishuka, wakawaombea watu wa huko ili wampokee Roho Mtakatifu, 16kwa kuwa Roho alikuwa bado hajamshukia hata mmoja wao. Walikuwa wamebatizwa tu kwa jina la Bwana Yesu. 17Kisha Petro na Yohana waliweka mikono yao juu yao, nao wakampokea Roho Mtakatifu. 18Simoni aliona kwamba Roho alitolewa mitume walipowawekea watu mikono, akawaletea fedha. 19“Nipeni na mimi mamlaka haya,” akasema, “ili kila nitakayemwekea mikono yangu ampokee Roho Mtakatifu.” 20Petro akamjibu, “Uangamie wewe pamoja na fedha yako! Ulidhani unaweza kupata kipawa cha Mungu kwa fedha. 21Huna sehemu yoyote wala fungu katika hili, kwa sababu machoni pa Mungu moyo wako hauko sawa. 22Basi tubu, uache uovu wako huu, umwombe Bwana. Huenda akakusamehe kwa yale uliyokuwa ukiwaza moyoni, 23Kwa maana naona kwamba umejaa sumu chungu, na umefungwa na uovu.” 24Simoni akajibu, “Ninyi wenyewe mniombee kwa Bwana, ili nisipatwe na lolote kati ya mambo mliyosema.”

25Petro na Yohana walipokwisha kushuhudia na kulinena neno la Bwana, walianza safari ya kurudi Yerusalemu, wakihubiri habari njema njiani katika vijiji vingi vya Wasamaria.

26Malaika wa Bwana alimwambia Filipo, “Jiandae, uende upande wa kusini, kwenye njia inayoshuka kutoka Yerusalemu kwenda Gaza.” (Hii ni njia ya nyikani.) 27Basi Filipo aliinuka, akaenda. Na huko njiani palikuwa na mtu kutoka Ethiopia, towashi, afisa mkuu aliyesimamia hazina yote ya Kandake, malkia wa Waethiopia. Alikuwa amekwenda Yerusalemu kuabudu, 28na sasa alikuwa akirudi nyumbani, ameketi katika gari lake la farasi, akisoma kitabu cha nabii Isaya. 29Roho alimwambia Filipo, “Nenda mpaka kwenye gari lile, ukae karibu nalo.” 30Filipo alikimbia mpaka kwake, akamsikia akisoma kwa sauti kitabu cha nabii Isaya. “Je, unajua ni nini unachosoma?” akamwuliza. 31“Ningewezaje,” akasema, “kama hakuna mtu wa kuniongoza?” Akamwomba Filipo apande, aketi kando yake. 32Kifungu cha Maandiko alichokuwa akisoma ni hiki: “Kama kondoo alipelekwa kuchinjwa, na kama mwana-kondoo asiyetoa sauti anapokatwa manyoya, yeye hakufungua kinywa chake. 33Alipodhalilishwa, alinyimwa hukumu ya haki. Ni nani awezaye kusema habari za wazao wake? Kwa maana uzima wake unaondolewa duniani.” 34Towashi akamwambia Filipo, “Tafadhali niambie, nabii anazungumza habari za nani hapa? Je, anajisema mwenyewe, au anamsema mtu mwingine?” 35Ndipo Filipo alianza kusema. Kuanzia andiko lile lile, alimjulisha Yesu kuwa ndiye habari njema. 36Walipokuwa wakiendelea na safari njiani, walifika mahali penye maji. Towashi akasema kwa mshangao, “Hapa kuna maji! Je, kuna sababu yoyote nisibatizwe?” 38Akatoa amri gari lisimamishwe, na wote wawili, Filipo na towashi, wakashuka majini, na Filipo akambatiza. 39Walipotoka majini, Roho wa Bwana alimchukua Filipo ghafla. Towashi hakumwona tena, lakini aliendelea na safari yake akiwa na moyo wa furaha. 40Filipo, kwa upande wake, alitokea Azoto. Akaendelea kupita katika eneo hilo, akihubiri habari njema katika kila mji mpaka alipofika Kaisaria.