Matendo 28

1Tulipokwisha kufika salama pwani, tukagundua kwamba kisiwa kile kiliitwa Malta. 2Wenyeji wa huko walitutendea wema wa ajabu. Kwa kuwa mvua ilikuwa imeanza kunyesha na kulikuwa na baridi, waliwasha moto, wakatukaribisha sote. 3Paulo alikusanya mzigo wa kuni, akauweka juu ya moto. Joto likamtoa nyoka mwenye sumu, naye akajishikiza mkononi mwake. 4Wenyeji walipomwona yule mnyama akining’inia mkononi mwake, wakaambiana, “Hakika mtu huyu ni muuaji. Ametoka baharini salama, lakini Haki hatamwacha aishi.” 5Lakini Paulo alimkung’uta mnyama yule motoni, wala hakudhurika hata kidogo. 6Waliendelea kungoja avimbe au aanguke ghafla afe. Baada ya kungoja muda mrefu, walipoona kwamba hakuna jambo la ajabu lililokuwa likimtokea, walibadili maoni yao, wakaanza kusema kwamba yeye ni mungu.

7Karibu na mahali pale palikuwa na shamba kubwa la mtu mkuu wa kisiwa, jina lake Publio. Alitukaribisha nyumbani kwake na kututunza kama wageni wake kwa siku tatu. 8Baba wa Publio alikuwa amelala kitandani, akiugua homa za mara kwa mara na kuhara damu. Paulo alikwenda kumwona, akaomba, akaweka mikono yake juu yake, akamponya. 9Baada ya hayo, wagonjwa wengine wote wa kisiwa hicho waliendelea kumjia, nao wakaponywa. 10Walitupa heshima nyingi, na wakati wa kusafiri ulipofika, walipakia melini vitu vyote tulivyohitaji.

11Miezi mitatu baadaye tuliondoka kwa meli kutoka Aleksandria iliyokuwa imekaa kisiwani majira yote ya baridi. Sanamu iliyokuwa mbele ya meli hiyo ilikuwa ya Ndugu Pacha. 12Tulifika Sirakusa, tukakaa huko siku tatu. 13Kutoka huko tuling’oa nanga, tukafika Regio. Baada ya siku moja upepo ulianza kuvuma kutoka kusini, na siku ya pili tukafika Puteoli. 14Huko tuliwakuta ndugu fulani, nao wakatusihi tukae nao siku saba. Na hivyo ndivyo tulivyofika Roma. 15Ndugu wa huko walikuwa wamesikia habari zetu, wakaja kutulaki mpaka Soko la Apio na Nyumba Tatu za Wageni. Paulo alipowaona, alimshukuru Mungu, akatiwa moyo.

16Tulipofika Roma, Paulo alipewa ruhusa ya kuishi katika makazi yake mwenyewe, ingawa askari alimlinda.

17Siku tatu baadaye Paulo aliwaita pamoja viongozi wa Wayahudi. Walipokwisha kukusanyika, akawaambia, “Ndugu, sijafanya jambo lolote dhidi ya watu wetu wala dhidi ya desturi za mababu zetu. Hata hivyo, nilikamatwa Yerusalemu, nikakabidhiwa mikononi mwa Warumi kama mfungwa. 18Warumi walinihoji, wakawa tayari kuniachilia, kwa kuwa hapakuwa na shtaka lolote dhidi yangu linalostahili kifo. 19Lakini viongozi wa Wayahudi wa huko walipopinga, sikuwa na njia nyingine ila kukata rufaa kwa Kaisari. Sikufanya hivyo kwa sababu nilikuwa na shtaka lolote dhidi ya watu wangu mwenyewe. 20Hii ndiyo sababu nimewaalika hapa, ili niwaone na kuzungumza nanyi: ninavaa mnyororo huu kwa ajili ya tumaini la Israeli.” 21Wakamjibu, “Hatujapokea barua zozote kutoka Uyahudi zinazokuhusu, na hakuna hata mmoja wa Wayahudi wenzetu aliyefika hapa aliyeleta habari ya jambo lolote baya juu yako. 22Lakini tunaona ni vyema tusikie maoni yako mwenyewe. Tunachojua kuhusu madhehebu haya ni kwamba yanapingwa kila mahali.”

23Waliweka siku pamoja naye, na siku hiyo kundi kubwa zaidi likaja mahali alipokuwa akikaa. Kuanzia asubuhi hadi jioni aliwaeleza mambo, akishuhudia kikamilifu juu ya ufalme wa Mungu na kujitahidi kuwasadikisha kuhusu Yesu kutoka katika sheria ya Musa na Manabii. 24Baadhi yao walikubali maneno yake, lakini wengine walikataa kuamini. 25Wakiwa wamegawanyika wao kwa wao, walianza kuondoka, lakini kwanza Paulo alisema jambo moja zaidi: “Roho Mtakatifu alinena kwa usahihi kabisa kwa mababu zenu kupitia nabii Isaya, 26aliposema, ‘Nenda kwa watu hawa uwaambie, “Mtasikiliza na kusikiliza, lakini hamtaelewa kamwe. Mtatazama na kutazama, lakini hamtatambua kamwe. 27Moyo wa watu hawa umepumbaa. Masikio yao ni mazito kusikia, na wameyafunga macho yao, wasije wakaona kwa macho yao, wakasikia kwa masikio yao, wakaelewa kwa moyo wao na kugeuka, nami nikawaponya.”’ 28Basi jueni hili: wokovu huu utokao kwa Mungu umetumwa kwa watu wa mataifa. Wao watasikiliza.”

30Kwa miaka miwili kamili Paulo aliishi katika nyumba aliyoipanga, akiwapokea wote waliokuja kumtembelea. 31Huko aliuhubiri ufalme wa Mungu na kufundisha habari za Bwana Yesu Kristo, kwa ujasiri wote, bila kizuizi.